The Phnom Penh Post Search

Search form




Logo of Phnom Penh Post newspaper Phnom Penh Post - ជន​ពិការ​កំបុត​ដៃ​សង​ខាង​​ ត្រូវ​បាន​សប្បុរស​ជន​មួយ​ក្រុម​គិតគូរ​




ជន​ពិការ​កំបុត​ដៃ​សង​ខាង​​ ត្រូវ​បាន​សប្បុរស​ជន​មួយ​ក្រុម​គិតគូរ​

Content image - Phnom Penh Post
ជនពិការ​កំបុត​ដៃ​ទាំង​សង​ខាង ចូលរួម​សន្និសីទ​សារ​ព័ត៌មាន​រៀបចំ​ដោយ​សប្បុរ​សជន​។ ហុង មិនា

ជន​ពិការ​កំបុត​ដៃ​សង​ខាង​​ ត្រូវ​បាន​សប្បុរស​ជន​មួយ​ក្រុម​គិតគូរ​

ភ្នំពេញៈ ផ្តើម​ចេញ​ពី​ក្តី​អាណិត​អាសូរ​ និង​មើល​ឃើញ​នូវ​ទុក្ខ​លំបាក​ចំពោះ​ការ​​រស់​នៅ​ប្រចាំ​ថ្ងៃ​របស់​ជន​ពិការ​កំបុត​ដៃ​ទាំង​សង​ខាង​នោះ ទើប​​មានការ​កៀរគរ​រក​ប្រាក់​សប្បុរសធម៌​ពី​បណ្តា​សប្បុរសជន​នានា​ទាំង​ក្រៅ និង​ក្នុង​ប្រទេស​បង្កើត​ជា​មូល​និធិ​មួយ​ក្រោម​ការ​ផ្តួច​ផ្តើម​គំនិត​ដោយ​​លោក​ ជា​ រតនា និង​​ភរិយា ​ដើម្បី​ជួយ​សម្រួល​ការ​លំបាក​ និងលើក​ទឹក​ចិត្ត​ពួកគាត់​ឲ្យ​មាន​សង្ឃឹម​ក្នុង​ជីវិត​បើ​ទោះជា​ខ្លួន​មាន​​ពិការភាព​ក្តី​។

លោក ជា​ រតនា ដែលមាន​ងារ​ជា​ឧកញ៉ា និង​ជាអ្នក​ផ្តើម​គំនិត​បង្កើត​មូលនិធិ​ជួយ​ជន​ពិការ​កំបុត​​ដៃ​ទាំសង​ខាង បានគូសបញ្ជាក់​ពី​គោល​បំណង​នៃ​ការ​បង្កើត​មូល​និធិ​ជួយ​ជន​ពិការ​កំបុត​ដៃ​ទាំង​ពីរ​ ក្នុង​ពេល​ធ្វើ​សន្និសីទ​សារព័ត៌មាន​កាល​ពី​ថ្ងៃ​ទី ១៦ ​ខែ​ធ្នូ នៃ​សណ្ឋាគារ​ Sun and Moon ថា៖ «ដោយ​សារ​ខ្ញុំ​បាន​ឃើញពី​សភាពនៃ​ការ​រស់​នៅ​​របស់​បង​ប្អូន​ជន​ពិការ​មាន​ភាព​លំបាកវេទនា​ខ្លាំង​ណាស់​ ក្នុង​ការ​រស់​​នៅ​ប្រចាំ​ថ្ងៃ ជា​​ពិសេស​អ្នកកំបុត​ដៃ​ទាំង​សង​ខាង​តែ​ម្ដង»។

លោក​បន្ដ​​ថា៖ «ដូច្នេះ​​ហើយ​​ខ្ញុំ​ក៏​នឹក​ឃើញ​ថា​ គួរ​តែរកនូវ​វិធីសាស្រ្ដ​ណា​​មួយ​​ដើម្បី​ជួយ​សម្រួល​ដល់ពួកគេ​។ ​ដំបូង​នេះ​យើង​​ត្រូវ​ផ្តោត​ទៅ​លើ​ជនពិការ​កំបុត​ដៃ​ទាំងពីរ​សិន​ មិន​ថា​ពួក​គេ​ពិការ​​ត្រឹម​កំភួនដៃ កែងដៃ ដើម​ដៃ ឬ​ត្រឹម​ក្លៀក​ ដែល​ជា​ភាព​ពិ​ការពីកំណើត ដោយ​សារ​​សង្គ្រាម ឆក់​​ខ្សែ​ភ្លើង ឬរង​គ្រោះ​​ថ្នាក់​ចរាចរណ៍នោះទេ​ គឺ​យើង​នឹង​ជួយ​ពួកគេ​ទាំង​អស់​ទៅ​តាម​ភាពជាក់​ស្តែង​»​។

Content image - Phnom Penh Post
ឧកញ៉ា ជា រតនា ថ្លែង​នៅ​ចំពោះ​មុខ​ជន​ពិការ​ដៃ​។ ហុង មិនា

លោ​ក​បាន​​បង្កើត​មូល​និធិ​សប្បុរស​​ធម៌​​មួយនេះ​ឡើងក្នុង​​គោល​​បំណង​ចង់​​ប្រមែ​ប្រមូល​រក​ទិន្នន័យ​ជនពិការ​កំបុត​ដៃ​ទាំង​សង​​ខាង​ទូទាំង​ប្រទេស​​កម្ពុជា​តែម្តង​ ដើម្បី​ដាក់​ចេញ​នូវ​​ផែ​ន​​ការ​ជួយ​ដល់​​ពួក​គាត់​ទៅតាម​ស្ថាន​ភាព​ជាក់​ស្តែង​ដូច​ជា​ការ​​ជួយ​ឧបត្ថម្ភ​ជាប្រាក់​ ត​ដៃ​សិប្ប​និម្មិត​ និង​ស្វែង​​រក​ដៃ​គូ​បណ្តុះ​បណ្តាល​ជំនាញ​វិជ្ជា​ជីវៈ​អាច​ចិញ្ចឹម​ជីវិតបាន។

លោក ជា​ រតនា បន្ត​​ថា៖ «​យើង​ចង់​បង្ហាញ​ឲ្យ​ជនពិការ​កំបុត​ដៃ​ទាំង​សង​ខាង​យល់​ថា ឥឡូវ​​នេះ​ពួកគាត់​មាន​​អ្នក​បារម្ភនិង​ខ្វាយ​ខ្វល់​ពី​ទុក្ខ​លំបាក​ពួកគាត់​​ហើយ! ហេតុ​នេះ​​ហើយត្រូវ​តែមាន​សង្ឃឹម»។​

ដោយ​ឡែក​​នៅ​ថ្ងៃ​ទី ១០ ​ខែ​មករា​ ឆ្នាំ ២០១៦ ​ខាងមុខ​នេះ នឹង​មានប្រារព្ធ​ពិធីជួប​ជុំ​ជន​ពិការ​កំបុត​ដៃទាំងសង​ខាង​ប្រមាណ ៣០០ នាក់ ​មក​ពី​បណ្តា​ខេត្តក្រុង​ទូទាំង​ប្រទេស​កម្ពុជា​​ផង​ដែរ នៅ​ឯ​វិទ្យាស្ថានជាតិ​អប់រំ​​ ក្នុងកម្មវិធី​សំណេះ​សំណាល​​សួរ​សុខ​ទុក្ខ។

បើ​​គិត​មក​ត្រឹម​ថ្ងៃទី ១៦ ខែ​ធ្នូ​ឆ្នាំ ២០១៥ គេ​ឃើញមាន​ក្រុម​សប្បុរសជន​ចូល​រួម​ឧបត្ថម្ភ​​ថវិកា​ជាដុល្លារ​មាន​​ចំនួន​សរុប ១១១​៨០០ ដុល្លារ និង​ប្រាក់រៀល​ចំនួន​សរុប ​ជាង ១៤,៥ លាន​​រៀល​ពី​បណ្តាសប្បុរសជន​ទាំង​ខ្មែរ និង​បរទេស​​មាន​ចំនួន​សរុប ៤០ រូប​។

​លោក ជា រតនា បាន​បង្ហើប​ឲ្យ​ដឹងទៀត​ថា៖ «មក​ទល់​ពេល​​នេះ​ យើង​ទទួល​បាន​នូវ​បញ្ជី​ឈ្មោះ​ជន​ពិការ​កំបុតដៃ​សង​ខាង​ចំនួន ១៥០ រូប​ហើយ ដែល​មក​ពីបណ្ដា​​ខេត្ត​ក្រុង​ចំនួន ១៩។ ខណៈ​បើក​សន្និសីទ​នេះ​ យើង​ក៏​បាន​អញ្ជើញ​បង​ប្អូន​ជន​ពិការ​កំបុត​ដៃ​ទាំង​សងខាង​​ចំនួន ៦ រូបចូល​រួម​​ផង​ដែរ​ ហើយ​យើង​នៅ​តែត្រូវ​ការ​នូវ​កម្លាំង​សប្បុរសជន​ចូល​រួម​ឲ្យ​បាន​ច្រើន​ទៀត​ដើម្បីឲ្យ​​មូលនិធិ​​នេះ ​ដំណើរ​បាន​យូរ​អង្វែង»៕

អត្ថបទគួរចាប់អារម្មណ៍