ភ្នំពេញៈ ក្រោយពីធ្លាប់មានបទពិសោធធ្វើការងារឲ្យគេ ជាច្រើនឆ្នាំ និងមានទំនុកចិត្តមកនោះ ទើបក្រុមជនពិការភ្នែក ៦ រូប បានស្រុះដៃគ្នាសហការជម្នះទៅជួលកន្លែងបើកហាងចាប់សរសៃ ដើម្បីបម្រើដល់អតិថិជនមួយៗ បានជិត ១ ខែ តែក៏កំពុងបុកពោះព្រោះក្តីកង្វល់ មិនសម្បូរភ្ញៀវស្គាល់នៅឡើយ។
ទោះបីជាដឹងថាទីកន្លែងជួលមានតម្លៃខ្ពស់មែនក្តី តែមានក្តីស្រមៃយល់ថា ជាទីសម្បូរភ្ញៀវទេសចរជាតិ និងអន្តរជាតិនោះ មិនបង្អង់យូរក៏បានសហការដាក់ហ៊ុនរួមគ្នាទាំង ៦ រូប បើកហាងធ្វើអាជីវកម្មផ្ទាល់ខ្លួន ដើម្បីចិញ្ចឹមជីវិត ដែលមានឈ្មោះ «ប៊ុនធឿនចាប់សរសៃដៃទេពដោយជនពិការភ្នែក» ដែលមានទីតាំងស្ថិតនៅទល់មុខផ្សាររាត្រី មានអាសយដ្ឋានផ្ទះលេខ ១៨ ផ្លូវ ១០៨ សង្កាត់ផ្សារចាស់ ខណ្ឌដូនពេញ ក្នុងរាជធានីភ្នំពេញ។
សម្តីរៀបរាប់យ៉ាងរអិលមាត់ពីស្ត្រីពិការភ្នែក ដែលជាម្ចាស់ចំណែក នៃភាគហ៊ុនបើក ហាងចាប់សរសៃនេះ អ្នកស្រី ឡុង ស្រីភឿក បានប្រាប់ទាំងអារម្មណ៍នឹកព្រួយក្នុងចិត្តថា៖ «យើងជាជនពិការភ្នែក ៦ នាក់ ដែលកាលពីមុន ធ្លាប់មានបទពិសោធជាច្រើនធ្វើការងារចាប់សរសៃនេះក៏មូលមតិគ្នាថា ដល់ពេលដែលយើងអាចសាករកកន្លែងណាមួយដើម្បីប្រកបរបររកស៊ីដោយខ្លួនឯងហើយ ដោយមិនចង់ធ្វើការឲ្យគេទៀត។ ក្រោយពីបានរួមចិត្តរួមគំនិតគ្នាមក ក៏រកបានកន្លែងល្អនៅម្តុំផ្សាររាត្រី ដែលយើងគិតថា សម្បូរទាំងខ្មែរ និងបរទេសអាចមករកសេវាកម្មចាប់សរសៃយើង»។
ស្ត្រីពិការភ្នែកតាំងពីកំណើត មានស្រុកកំណើតនៅខេត្តព្រះសីហនុ វ័យ ២៩ ឆ្នាំ ធ្លាប់បានរៀនជំនាញចាប់សរសៃតាំងពីឆ្នាំ ២០០៧ ពីគ្រូជំនាន់ទី ១ នៃអង្គការ Maryknoll ដែលបណ្តុះបណ្តាលជំនាញចាប់សរសៃដល់ជនពិការភ្នែករបស់ពួកយើង។
អ្នកស្រី ឡុង ស្រីភឿក ក៏បានប្រាប់ពីអត្ថប្រយោជន៍នៃសេវាកម្មចាប់សរសៃដោយប្រើដៃសុទ្ធសាធ មិនបានប្រើឧបករណ៍គ្រឿងម៉ាស៊ីន ឬប្រើប្រេងលាបរឹតនោះថា៖ «បច្ចេកទេសចាប់សរសៃដោយប្រើដៃក្រុមជនពិការភ្នែករបស់យើង គឺសុទ្ធតែបានឆ្លងកាត់ការរៀនសូត្រពីសាលាអង្គការច្បាស់លាស់។ ការចាប់សរសៃនេះ បានជួយសម្រួលដល់បងប្អូន ដែលមានអាការឈឺចុករួយ ឬជាប់សរសៃសសូងនានា ដែលកើតចេញមកពីការអង្គុយធ្វើការងារយូរពេក ការមានជំងឺស្ត្រេសដោយការងារ ចុកសៀតណែនតាមចង្កះ ឬតាមសរីរាង្គនានា ដែលបណ្តាលមកពីបញ្ហានៃសរសៃឈាមដំណើរការមិនបានល្អ ហើយអាការជំងឺទាំងនេះ ប្រសិនបើទុកយូរវាក៏អាចមានបញ្ហាធ្ងន់ធ្ងរគឺដាច់សរសៃឈាម»។
ស្ត្រីពិការភ្នែករូបនេះបន្តថា៖ «ទោះបីពួកយើងមិនមែនជាគ្រូពេទ្យក្តី តែយើងបានសិក្សាយល់ពីបញ្ហាជំងឺកើតឡើងដោយសារសម្ពាធឈាមមិនដំណើរការល្អនេះ ហើយក៏មានវិធីសាស្ត្រប្រើម្រាមដៃឈ្លីចាប់សរសៃ ដើម្បីសម្រួលអាការឈឺចុកចាប់នានា ឲ្យបានធូរស្បើយតាមដំណាក់កាល និងរហូតបានធូរស្បើយ។ យើងមិនបានប្រើប្រេងនានា ដើម្បីលាបរឹត នាពេលចាប់សរសៃនោះឡើយ គឺគ្រាន់តែប្រើម្រាមដៃចាប់ឈ្លីសម្រួលតាមសរសៃប៉ុណ្ណោះ។ តែចំពោះជំងឺត្បៀតសរសៃឈាមឆ្អឹងខ្នង យើងក៏មិនអាចជួយសម្រួលបានធូរស្បើយទេគឺត្រូវរកពេទ្យ»។
ចំពោះសេវាកម្មចាប់សរសៃ ១ ម៉ោង តម្លៃ $ ៥ ភ្ញៀវខ្មែរ ខណៈតម្លៃ $ ៧ ក្នុង ១ ម៉ោងសម្រាប់ភ្ញៀវបរទេស៕