ក្រុងតូក្យូ៖ ដំណើរទៅកាន់សួនជិះឧបករណ៍កម្សាន្ត និងឧទ្យានទឹកនៅជប៉ុន នឹងលែងដូចមុនទៀតហើយ ក្រោមឥទ្ធិពលនៃបទពិសោធការឆ្លងវីរុសផ្លូវដង្ហើមថ្មីកូរ៉ូណា។
នៅលើរថភ្លើងឡើងចុះដ៏រំជើបរំជួល មិនមានសម្រែកហ៊ោកញ្ជ្រៀវឡើយ។
ការរក្សាគម្លាតសុវត្ថិភាពនៅផ្ទះខ្មោចលង ត្រូវបានអនុវត្តខ្ជាប់ខ្លួន។ ការលើកដៃស្ទាបប៉ះតុក្កតាតួអង្គនានា នៅសួនកម្សាន្តជប៉ុន ក៏ត្រូវបានហាមប្រាមក្នុងសម័យមានការរីករាលដាលនៃវីរុសកូរ៉ូណា។
ខណៈសួនជិះឧបករណ៍កម្សាន្តនានានៅជប៉ុនចាប់ផ្ដើមបើកដំណើរការសន្សឹមៗ ប្រតិបត្តិករឧទ្យានបានមូលមតិគ្នាចេញនូវគោលការណ៍សុវត្ថិភាពរួម។
ក្នុងចំណោមគោលការណ៍សុវត្ថិភាពទាំងនោះ ភ្ញៀវសួនកម្សាន្តត្រូវបានស្នើឲ្យពាក់ម៉ាស់គ្រប់ពេលវេលា និងហាមស្រែកឡូឡានៅលើរថភ្លើងរំជើបរំជួល (rollercoasters) និងឧបករណ៍ជិះកម្សាន្តដទៃទៀត។
ភ្ញៀវដែលស្វែងរកការកម្សាន្តបែបព្រឺព្រួចនៅ «ផ្ទះខ្មោច» ក៏ត្រូវបានរក្សាគម្លាតរវាងមនុស្ស និងតួអង្គខ្មោចចាំលងបន្លាចផងដែរ។
បុគ្គលិកសួនកម្សាន្តដែលគ្រងឈុតតុក្កតា និងតួអង្គវីរបុរសនានា ក៏មិនអាចចាប់ដៃជាមួយភ្ញៀវ ឬកុមារដូចពីមុនទៀតឡើយ។
កន្លែងកម្សាន្តប្រើប្រាស់ឧបករណ៍វ៉ែនតា VR នឹងមិនអាចដំណើរការញឹកញាប់ដូចមុនឡើយ លុះត្រាតែឧបករណ៍ទាំងនោះត្រូវបានសម្អាតមេរោគក្រោយពីប្រើប្រាស់ម្ដងៗ។
ចំពោះមាតាបិតាដែលមានកូនតូចៗវិញ បម្រាមថ្មីនឹងធ្វើឲ្យពួកគេធូរចិត្ត ដោយអាជីវករលក់តុក្តកា និងចំណីផ្អែម ត្រូវបានហាមមិនឲ្យដាក់តាំងរបស់ទាំងនោះសម្រាប់ប៉ះលេង ឬភ្លក្សដូចមុនទៀតទេ។
សេចក្ដីប្រកាសពីប្រតិបត្តិការសួនកម្សាន្តតាមបែបបទថ្មីបានបរិយាយថា៖ «គោលការណ៍សុវត្ថិភាពនេះនឹងមិនធានាថាគ្មានការឆ្លងមេរោគនោះទេ ប៉ុន្តែវានឹងរួមចំណែកកាត់បន្ថយអត្រាឆ្លង»។
ទោះយ៉ាងណា សួនកម្សាន្តដ៏ធំនៅជប៉ុនដូចជា តូក្យូ ឌីស្នីលែន នៅតែបន្តបិទទ្វារដោយពុំទាន់មានកាលបរិច្ឆេទស្វាគមន៍ភ្ញៀវជាថ្មី។ រីឯសួនយូនីវើសល ស្ឌូឌីយោ ត្រូវបានប្រកាសថា នឹងផ្ដើមប្រតិបត្តិការវិញនៅថ្ងៃចន្ទនេះ៕ AFP