.jpg)
ក្រុងតូក្យូ៖ វាជាពិព័រណ៍ថ្មីក្ដៅៗបំផុតប្រចាំទីក្រុង។ បទពិសោធពិព័រណ៍សិល្បៈឌីជីថលរំលេចទៅដោយប្រព័ន្ធពន្លឺភ្លើងដ៏អស្ចារ្យ ដែលជួយបង្កើនកម្ដៅបន្ថែមដល់បន្ទប់សោណា។ បែកញើស តែជាកម្មវិធីសិល្បៈដ៏ចម្លែកក្នុងទីក្រុងតូក្យូ ដែលបើកដំណើរការកាលពីថ្ងៃចន្ទ បានអនុញ្ញាតឱ្យភ្ញៀវទទួលបាននូវ «បទពិសោធសិល្បៈក្នុងពេលផ្លូវចិត្ដមានអារម្មណ៍ស្ងប់សុខ»។
ភ្ញៀវត្រូវពាក់ឈុតឯកសណ្ឋានហែលទឹក តែអាចស៊កអាចធម្មតាពីក្រៅដើម្បីចូលទស្សនាពិព័រណ៍នេះ ដែលមានបន្ទប់សោណាក្នុងសីតុណ្ហភាពខុសៗគ្នាចំនួន ៧ ដោយស្ថិតក្រោមបរិយាកាសពន្លឺភ្លើងពណ៌ចាប់ពីពណ៌ស្វាយដល់ពណ៌បៃតងចាស់។
ក្រោយពីសម្រាកក្នុងបរិយាកាសកម្ដៅពន្លឺភ្លើងពណ៌ប៉ុន្មាននាទី បន្ទាប់ពីងូតទឹកផ្កាឈូកត្រជាក់ដើម្បីបន្ធូរបន្ថយអារម្មណ៍តានតឹង ពួកគេអាចដើរមើលតាមបន្ទប់សោណាផ្សេងៗទៀតដើម្បីបានឃើញស្នាដៃសិល្បៈដែលហៅថា «បន្ទប់សោណាសណ្ដំ»។
ពិព័រណ៍ រួមមាន ភ្លើងពណ៌មេអំបៅដ៏រស់រវើក «គ្រីស្ដាល់ពន្លឺ» និងគជ់ក្រហមធំ ដែលជះពន្លឺក្នុងទីងងឹត។ បរិវេណខ្លះក៏បំពាក់បណ្ដាញទឹកត្រជាក់ ឬចំណាយទឹកត្រជាក់ដើម្បីបំភាយប៉ះរាងកាយ និងបង្កើតភាពទាក់ទញ។
ពិព័រណ៍សិល្បៈសោណាហៅថា «ផ្សារភ្ជាប់ឡើងវិញ: សិល្បៈជាមួយសោណារីនកាន់» គឺជាសេវាកម្មថ្មីចុងក្រោយពីក្រុមពីសំណាក់ teamLab ជាក្រុមពិសោធច្នៃប្រឌិតផ្នែកសិល្បៈរបស់ជប៉ុន ដែលសហការជាមួយកម្មវិធីវីដេអូ TikTok លើគម្រោងនេះ។
ជាសិល្បៈឌីជីថលច្នៃប្រឌិតថ្មីដ៏ល្បីល្បាញលក្ខណៈអន្ដរជាតិ ការងាររបស់ teamLab បានបញ្ចូលគំនូររូប សំឡេង និងឌីហ្សាញបរិវេណយ៉ាងយកចិត្ដទុកដាក់ដើម្បីបង្កើតជាបទពិសោធបែបថ្មី។
ក្រុមនេះ បានឱ្យដឹងថា៖ «ដោយការជ្រើសរើសបទពិសោធងូតទឹកក្ដៅ និងត្រជាក់ ភ្ញៀវអាចបើកចិត្ដទូលាយ ទទួលយកបទពិសោធចំពោះរាងកាយពុំធ្លាប់មាន និងក្លាយជាទម្រង់សិល្បៈថ្មីសន្លាង»។
ប៉ុន្ដែសេចក្ដីថ្លែងការណ៍ពីព្រឹត្ដិការណ៍នេះ បានទទួលស្គាល់ថា សម្រាប់ភ្ញៀវខ្លះ ដែលធ្វើអ្វីលើសពីការកំណត់ ដោយព្រមានចំពោះពួកគេកុំធ្វើអ្វីផ្ដេសផ្ដាសក្នុងបន្ទប់សោណា និងចូរឱ្យប្រាកដថា ត្រូវទទួលទានទឹកញឹកញាប់។
ដោយសារតែត្រូវបញ្ចេញញើសច្រើន ភ្ញៀវក៏តម្រូវឱ្យពាក់ម៉ាសខាងក្នុងអគារពិព័រណ៍ ដែលនឹងបើកដំណើរការរហូតដល់ថ្ងៃទី ៣១ ខែសីហា ខាងមុខ៕ AFP/HR
