ក្រុងតូក្យូ: ពេល ម៉ាណា អ៊ីហ្ស៊ូមិ ចាប់ផ្ដើមសាក់លើរាងកាយដំបូងតាំងពីអាយុ ១៨ ឆ្នាំ នាងមិនព្យាយាមផ្គើនការរិះគន់នោះទេ ដោយគ្រាន់តែចម្លងស្ទីលពីរាជិនីប៉ុបជប៉ុននូវរូបរាងសម្បុរទង់ដែងរបស់ ណាមី អាមូរុ។
អតីតតារាកុនសិច អ៊ីហ្ស៊ូមិ លេងម៉ូដពណ៌សក់ទង់ដែង និងរំលេចស្នាមសាក់ពាក់កណ្ដាលខ្លួន វ័យ ២៩ ឆ្នាំ បានប្រាប់ AFP ថា៖ «ខ្ញុំគិតថា ស្នាមសាក់របស់ អាមូរុ ពិតជាឡូយណាស់។ ពេលម្ដាយខ្ញុំឃើញស្នាមសាក់របស់ខ្ញុំដំបូង គាត់យំ ហើយខ្ញុំគិតថា ឪពុកខ្ញុំប្រាកដជាសម្លាប់ខ្ញុំមិនខាន។ ប៉ុន្ដែខ្ញុំចូលចិត្ដធ្វើខ្លួនឲ្យខុសប្លែកពីគេបែបនេះ»។
សិល្បៈសាក់លើរាងកាយនៅតែជាសា្លកស្នាមដ៏ស្រពេចស្រពិលក្នុងសង្គមជប៉ុន ខណៈប្រទេសនេះ ត្រៀមរៀបចំព្រឹត្ដិការណ៍ប្រកួតកីឡាអូឡាំពិកឆ្នាំ ២០២០។ អ្នកមានស្នាមសាក់ត្រូវបានហាមប្រាមមិនឲ្យចុះអាងទឹកសាធារណៈ កន្លែងលេងទឹក ឆ្នេរ និងកន្លែងហាត់ប្រាណ ខណៈសិល្បៈលើរាងកាយនេះក៏នឹងអាចប៉ះពាល់ដល់អាជីពការងារទៀត។
អ៊ីហ្ស៊ូមិ បាននិយាយបណ្ដើរ ខណៈកំពុងសាក់ក្បាលខ្មោច Aztec តម្លៃ ៥០០ ដុល្លារបណ្ដើរថា៖ «ពិតជាអស់សង្ឃឹមណាស់ ដែលមនុស្សយើងរើសអើងចំពោះសិល្បៈសាក់។ ពួកគេអាចគិតថា ខ្ញុំជាមនុស្សគួរឲ្យខ្លាច។ ប៉ុន្ដែខ្ញុំមិនស្ដាយក្រោយឡើយ»។
ជប៉ុនមានប្រវត្ដិយ៉ាងជូរចត់នឹងសិល្បៈសាក់។ នៅសតវត្សរ៍ទី ១៧ ឧក្រិដ្ឋជនត្រូវបានធ្វើទារុណកម្មគ្រប់បែបយ៉ាង ខណៈក្រុមបងធំ យ៉ាគូហ្សា របស់ជប៉ុនបច្ចុប្បន្ន បង្ហាញភក្ដីភាពចំពោះប្រពៃណីចាក់សាក់ «អ៊ីរ៉េហ្ស៊ុមិ» ពេញរាងកាយ។
ក្រុមអាជ្ញាធរបើកភ្នែកម្ខាងបិទភ្នែកចំពោះបម្រាមសិល្បៈសាក់ តែការបង្ក្រាបថ្មីៗទាក់ទងនឹងការវាយឆ្មក់ក្រសោបរបស់ប៉ូលិសជាច្រើនលើកច្រើនសា និងបានពិន័យឧស្សាហកម្មចាក់សាក់ជប៉ុនបង្កជាបញ្ហាដ៏ច្របូកច្របល់។
យោងទៅតាមក្រុមសង្គ្រោះសិល្បៈជប៉ុន ជាអង្គការមិនស្វែងរកប្រាក់ចំណេញ បានប៉ាន់ប្រមាណថាពលរដ្ឋជប៉ុន ពី ៥០ ម៉ឺនទៅ ១ លាននាក់ ឬម្នាក់ក្នុងចំណោម ១០០ ឬ ២០០ នាក់បានសាក់រូប។
អតីតតារាសម្ដែងកុនសិចអ៊ីហ្ស៊ូមិ ក៏ហាក់មិនចង់ជជែកវែកញែកចំពោះការរើសអើងដ៏ចាស់គំរឹលនេះដែរ។ នាងបាននិយាយថា៖ «ខ្ញុំមានអារម្មណ៍ថា ខ្ញុំមិនចាំបាច់ត្រូវបានបកស្រាយអ្វីពីរាងកាយរបស់ខ្ញុំ ប្រាប់នរណាម្នាក់ឡើយ»៕