The Phnom Penh Post Search

Search form




Logo of Phnom Penh Post newspaper Phnom Penh Post - ជាង​កាត់​សក់​ខ្មែរ​ចោល​ភ្ញៀវ​ ហូលីវូដ ​មក​បើក​ហាង​នៅ​ខ្មែរ




ជាង​កាត់​សក់​ខ្មែរ​ចោល​ភ្ញៀវ​ ហូលីវូដ ​មក​បើក​ហាង​នៅ​ខ្មែរ

Content image - Phnom Penh Post
អ្នក​ស្រី រឿន រ៉ានី ជាង​កាត់​សក់​លំដាប់ហូលីវូដ មក​បើក​ហាង​នៅ​ខេត្ត​សៀមរាប​។ ឈឹម ស្រីនាង

ជាង​កាត់​សក់​ខ្មែរ​ចោល​ភ្ញៀវ​ ហូលីវូដ ​មក​បើក​ហាង​នៅ​ខ្មែរ

សៀមរាប: នៅ​តាម​ជញ្ចាំង​មាន​បិទ​រូប​មេ​អំបៅ​ចោម​រោម​រូប​មនុស្ស​ស្រី មើល​ទៅ​គួរ​ឲ្យ​ទាក់​ទាញ ស្ត្រី​ស្រស់​ស្អាត​ម្នាក់​ស្លៀកពាក់​ខោអាវ​ខ្មៅ​ដៃ​ម្ខាង​ឈរ​កាន់​កន្រៃ្ត ​ដៃ​ម្ខាង​ឈរ​វែក​សក់​បុរស​ម្នាក់ ទាំង​ទឹក​មុខ​ញញឹម នៅ​ក្នុង​ហាង​សាឡន​ដ៏​ទាន់​សម័យ បាន​និយាយ​ថា៖ «ខ្ញុំ​ពិត​ជា​សប្បាយ​រីករាយ​ណាស់​ដែល​បាន​វិល​ត្រឡប់​មក​ស្រុក​កំណើត​វិញ គឺ​ពិតជា​អស្ចារ្យ​មែន​សម្រាប់​ខ្ញុំ»​។

អ្នក​ស្រី រឿន​ រ៉ានី ​ដែល​មាន​សម្រស់​ក្មេង​ជាង​វ័យ​៤០​ឆ្នាំ​ ជា​ម្ចាស់​ហាង​សាឡន Sister Beauty នៅ​ខេត្ត​សៀមរាប។

ក្នុង​សំនៀង​និយាយ​ខ្មែរ​មិន​សូវ​ច្បាស់ អ្នក​ស្រី​បាន​និយាយ​ថា៖ «កាល​ពី​មុន​ខ្ញុំ​បាន​ចាក​ចេញ​ពី​ស្រុក​ខ្មែរ​ទៅ​រស់​នៅ​ប្រទេស​កាណាដា​តាំង​ពី​ឆ្នាំ​១៩៩៧ ជាមួយ​ស្វាមី ហើយ​បាន​ចាប់​ផ្តើម​រៀន​ខាង​ផ្នែក​ធ្វើ​សក់​នៅ​ទីនោះ»។

Content image - Phnom Penh Post
រាល់​សេវាកម្ម​មានការ​ប្រើ​ឧបករណ៍​ប្លែក​ពី​គេ​។ ឈឹម ស្រីនាង

បន្ទាប់​មក​ទៀត​អ្នក​ស្រី​ក៏​ចាប់​ផ្តើម​ចូល​ធ្វើ​ការ​នៅ​តាម​ហាង​ធំ​ល្បីៗ​នៅ​កាណាដា​ដូច​ជា​ហាង​ធ្វើ​សក់​ Hennessy និង​ហាង​សាឡន​នៅ​ទីប្រជុំជន​ក្រុង​ឈ្មោះ​ថា Ponpandors ដែល​សម្បុរ​ដោយ​ភ្ញៀវ​អ្នក​ធូរធារ ដូច​ជា​អ្នក​ធ្វើ​ការ​ធនាគារ មេធាវី គ្រូពេទ្យ​ ​អ្នក​ជំនួញ​ធំៗ និង​តារា​ល្បីៗ​ជា​ច្រើន។

តារា​លំដាប់​ហូលីវូ​ដដែល​ធ្លាប់​បាន​ស្គាល់​ថ្វី​ដៃ​កាត់​សក់​របស់​អ្នក​ស្រី រឿន រ៉ានី មាន​ដូច​ជា​លោក Matthe Kevin Anderson, Ben Hollingsworth ​ក្នុង​រឿង​ Code Black, Nicole Watson និង Kirby Morrow ជា​ដើម។

អ្នក​ស្រី​បាន​រំឭក​ពី​ភ្ញៀវ​តារា​ហូលីវូដ​ថា៖ «អ្នក​ទាំង​អស់​នោះ​សរសើរ​ពេញ​ចិត្ត​នូវ​​ស្នាដៃ​កាត់​សក់​របស់​ខ្ញុំ ហើយ​ពួក​គេ​ស្ដាយ​ដែល​ខ្ញុំ​ត្រឡប់​មក​ស្រុក​កំណើត​វិញ អត់​មាន​អ្នក​កាត់​សក់​ឲ្យ​ពួក​គេ»។

Content image - Phnom Penh Post
ហាងអ្នកស្រី​ក៏មានសេវា​បក​រោម​ក្លៀក​បុរស​ស្ត្រី​​ដែរ។ ឈឹម ស្រីនាង

អស់​រយៈ​ពេល​២១​ឆ្នាំ​ដែល​អ្នក​ស្រី​រស់នៅ​ទឹកដី​កាណាដា អ្នក​ស្រី​មាន​បទពិសោធ​ផ្នែក​សក់​នេះ​១៨​ឆ្នាំ​។ ទោះ​បី​ជា​ទី​នោះ​អាច​រក​ចំណូល​បាន​ច្រើន​ពិត​មែន តែ​ហេតុ​ផល​នេះ​មិន​អាច​ឃាត់​អ្នក​ស្រី​ឲ្យ​រស់​នៅ​​កាណាដា​បន្ត​ទៀត​ទេ​។

អ្នកស្រី រឿន ​រ៉ានី​ និយាយ​បែប​សំណើច​ថា​៖ «ដោយ​សារ​តែ​​ការ​នឹក​រឭក​​បង​ប្អូន​ពេក​ និង​ចង់​រស់នៅ​ក្បែរ​គ្នា​ក៏​សម្រេច​ត្រឡប់​មក​ស្រុក​វិញ ម្យ៉ាង​ទៀត ចង់​ជួយ​បង្រៀន​ខ្មែរ​យើង​ដែល​គាត់​មាន​​ជំនាញ​ផ្នែក​សក់​នេះ ​បន្ថែម​ពី​បទ​ពិសោធ​របស់​ខ្ញុំ​ចង់​ឲ្យ​គាត់​ចេះ​ពី​របៀប​ធ្វើ​បែប​អន្តរជាតិ ជា​ពិសេស​ការ​លាប​ថ្នាំ​ពណ៌​តាម​ស្តង់ដារ»។

ហាង​ Sister Beauty ដែល​ទទួល​ស្គាល់​ទាំង​ភ្ញៀវ​ក្នុង​ស្រុក និង​ភ្ញៀវ​ទេសចរ​នោះ ស្ថិត​នៅ​ផ្ទះ​លេខ៥៤ ផ្លូវ​ស៊ីវត្ថា ​ជិត​ផ្សារ​ទំនើប​ឡាក់​គី៕

អត្ថបទគួរចាប់អារម្មណ៍