.jpg)
ជាងចម្លាក់រូបនេះអាចរកប្រាក់ចំណូលជាមធ្យមពីការរចនាចម្លាក់លម្អិតនីមួយៗចន្លោះពី ១ ០០០ ទៅ ២ ០០០ ដុល្លារ។ រូបថត សហការី
បាត់ដំបង៖ ហាមាត់ធំជង្គ្រាងហាក់កំពុងរង់ចាំចំណី អើតកផុតក្បាលមនុស្ស តួខ្លួនលើកផុតដីដោយក្រញាំជើងទាំង ៤ យ៉ាងរឹងមាំ ក្រពើឥតវិញ្ញាណសម្ញែងកន្ទុយទ្រនុងបន្លា ស្រកា និងពណ៌សម្បុរលម្អិតដូចសត្វមានជីវិតពិតៗ។
ក្រពើប្រវែងជាង ១០ ម៉ែត្រ របស់ជាងចម្លាក់អ្នកបាត់ដំបង បានធ្វើឲ្យប្រិយមិត្តបណ្ដាញសង្គមជញ្ជក់មាត់ស្ញប់ស្ញែងចំពោះទេពកោលស្យស្នាដៃចម្លាក់លម្អិតដ៏ល្អឯកនេះ។
លើសពីការចាក់ពុម្ព ឬការឆ្លាក់លំៗឲ្យគ្រាន់តែចេញជារូបរាង ជាងចម្លាក់រូបនេះបានចំណាយពេលឆ្លាក់ស្រកាមួយស្រទាប់ម្ដងៗ និងបិទទ្រនុងខ្នងរហូតដល់កន្ទុយ ដោយប្រើពេលវេលារាប់ខែលើស្នាដៃ ដែលលោកអះអាងថា លំបាក និងគួរជាទីពេញចិត្ដជាងគេ។
លោក សុទ្ធ ស៊ីណាត អាយុ ៣៧ ឆ្នាំ បានប្រាប់ ភ្នំពេញ ប៉ុស្ដិ៍ អំពីការផលិតសត្វក្រពើយក្សនេះថា៖ «ក្រពើនេះធំណាស់។ កម្រមានគេធ្វើ ហើយក្នុងការធ្វើរូបក្រពើនេះ យើងអត់បានដាប់ទេ យើងបិទស្រកាម្ដងបន្តិចៗ។ ពិបាកបំផុតនោះគឺ កន្លែងពោះ បាតក្រោមវា ត្រូវថែមច្រើន វាមានសាច់គ្រើម»។
លោកបន្ដថា៖ «ចំណុចសំខាន់មួយទៀត ស្រការបស់វាត្រូវដាក់ឲ្យស្របគ្នា ដែលទាមទារឲ្យមានការសារ៉េជាច្រើនដង ដោយត្រូវចំណាយពេល ៧ ខែទើបរួចរាល់»។
លោក ស៊ីណាត មានស្រុកកំណើតក្នុង ភូមិដង្កោទាប សង្កាត់ទួលតាឯក ស្រុក និងខេត្តបាត់ដំបង ជាជាងចម្លាក់ម្នាក់ដែលកំពុងទទួលបានការចាប់អារម្មណ៍ខ្លាំងពីសំណាក់បងប្អូនខ្មែរ ជាពិសេសតាមបណ្ដាញសង្គមហ្វេសប៊ុកតាមរយៈការបង្ហោះចម្លាក់សត្វធំៗដ៏ល្អឥតខ្ចោះជាច្រើន។
ផ្ដើមពីជាងគំនូរ និងក្បាច់តាំងពីឆ្នាំ ២០០៥ លោកមិនបានសិក្សាជំនាញនេះពីសាលាណានោះទេ ដោយគ្រាន់តែរៀនតជំនាន់ពីឪពុក និងបែកគំនិត ចេះច្នៃប្រឌិតខ្លួនឯង។
ជាងដ៏ចិត្ដអំណត់បង្កើតភាពលម្អិតលើចម្លាក់នីមួយៗរូបនេះ បានឲ្យដឹងថា៖ «នេះមិនមែនជារឿងតែម្យ៉ាងដែលខ្ញុំធ្វើនោះទេ។ ខ្ញុំបានសិក្សាស្រាវជ្រាវបន្ថែម ដោយព្យាយាមមើលគំរូ និងរបៀបធ្វើវាតាមយូធូប ហ្វេសប៊ុក រួមទាំងការស្រាវជ្រាវពីឯកសារនានាផងដែរ»។
រយៈពេល ១៥ ឆ្នាំ ដែលការងារចម្បងផ្ដោតសំខាន់លើចម្លាក់ក្បាច់ និងគំនូរ លោក ស៊ីណាត កម្រទទួលការកុម្ម៉ង់រូបសូនដែលទាមទារពេលវេលាផលិតយូរណាស់។
លោករំឭកថា ដើមឡើយលោកជាជាងគំនូរតាមអារាមនានា ចំណែកឪពុកទើបជាជាងចម្លាក់ពិតប្រាកដ។ ប៉ុន្ដែនៅពេលលោកមានពេលទំនេរ គណៈកម្មការវត្ដបានឲ្យលោកជួយសូនរូប ដែលជាឱកាសលោកបានចាប់ជំនាញចម្លាក់ និងគូររូបពីឪពុកតរហូតមក។
ចំពោះការបំបែកចំណេះពីជាងគំនូរមកជាជាងចម្លាក់បែបល្អវិចិត្រនេះមិនមែនជាកិច្ចការងាយស្រួលនោះទេ តែវាជាសិល្បៈផុសចេញពីទឹកចិត្ដស្រឡាញ់ និងទេពកោសល្យរបស់វិចិត្រករទទួលចំណេះវិជ្ជាពីឪពុកនេះ។
ចម្លាក់ដំបូងៗ ដែលលោកបានរៀនជាមួយឪពុក រួមមាន ព្រះអង្គជិះរទេះសេះទតសួន រូបព្រះអង្គចេញទៅបួស រូបព្រះអង្គកាត់កេសា រូបយក្ស ដែលតម្កល់នៅវត្តកំណប់ ខេត្តបាត់ដំបង។
ប៉ុន្ដែចម្លាក់ថ្មីៗជាច្រើន ដែលកំពុងឆក់យកអារម្មណ៍មហាជន ជាពិសេសអ្នកប្រើប្រាស់បណ្ដាញសង្គមនោះ គឺ ចម្លាក់ឥន្ទ្រី ពស់វែក ដំរី ក្រពើ មាន់ និងសត្វផ្សេងៗទៀត។ លោក ស៊ីណាត បានបញ្ជាក់ស្នាដៃជាច្រើនទាំងនេះប្រមាណពី ២០ ទៅ ៣០ ផលិតពីស៊ីម៉ងដ៍។
ចម្លាក់ក្រពើដ៏លម្អិតទាំងក្រឡា និងពណ៌សម្បុរ ជាស្នាដៃដែលលោកពេញចិត្តជាងគេ។ រូបថត សហការី
នៅអែបមច្ចុរាជក្រពើ គឺជាពស់យក្សកំពុងសម្ដែងឫទ្ធិ ២ ក្បាល បើកវែក រំលេចត្រាក្រឡាពីក្បាលដល់កន្ទុយ ក្នុងនាមជាអសិរពិសដ៏មានឥទ្ធិពល។ ល្មូនទាំង ២ ក្បាលស្ថិតក្នុងសភាពកំពុងវារត្រសង ខណៈ ១ ក្បាលអើតកបើកពពារកម្ពស់ប្រមាណ ១,៥០ ម៉ែត្រ និង ១ ក្បាលទៀតអើតខ្ពស់បន្ដិចនៅកម្ពស់ល្បាក់ ១,៨០ ម៉ែត្រ ក្រសែភ្នែកសម្លឹងឆ្ពោះទៅមុខ។
ដំរីត្រូវបានរចនាប្រមោយឡើងយ៉ាងហំហាន បន្ថែមដោយសរសៃឈាមផុសលើស្លឹកត្រចៀក រួមទាំងពណ៌សម្បុរក្រឡាស្បែក មាឌ និងរាងរៅដ៏ធំក្រអាញ។
ស្នាដៃតូចធំ ចាប់ពីមាន់ រហូតដល់ក្រពើទាំងនេះជាការកុម្ម៉ង់ពីគណៈកម្មការវត្ដបាក់ត្រា ឬវត្ដបក្សីចាំក្រុង នៅខេត្ដពោធិ៍សាត់ ដែលមានចម្លាក់ដំរី និងឥន្ទ្រី ហើយនៅកំពែង មានពស់ និងក្រពើយក្ស។
លោកនិយាយថា៖ «ចម្លាក់ ១ ឈុតធំ រួមមាន មាន់ ព្រះសង្ឃបិណ្ឌបាត ពស់វែក ១ គូ និងក្រពើទាំងនេះ មានតម្លៃ ៧ ៥០០ ដុល្លារ ខណៈគ្រាន់តែក្រពើប្រវែង ១៣ ម៉ែត្រនេះតែឯងមានតម្លៃប្រមាណ ៣ ៥០០ ដុល្លាររួចទៅហើយ»។
ជាទូទៅ ជាងចម្លាក់ដែលកំពុងសកម្មការងារជាមួយកូនជាង ២ នាក់ ចំណាយពេលមធ្យម ៤ ខែ លើចម្លាក់រូបសត្វ ១ ដោយអាស្រ័យចម្បងទៅលើទំហំ និងភាពលម្អិតនៃចម្លាក់នីមួយៗ។
លោកបានលើកឡើងពីការលំបាកថា៖ «ពេលអាកាសធាតុក្ដៅខ្លាំង ស៊ីម៉ងត៍ឆាប់ស្ងួត ប្រេះ ពិបាកចិត ហើយខណៈយើងត្រូវបំពេញការងារក្នុងវត្ដអារាម យើងត្រូវស៊ូទ្រាំនឹងកម្ដៅថ្ងៃ។ បើមានភ្លៀងផងនោះ វាប៉ះពាល់ដល់ការងារឆ្លាក់យ៉ាងខ្លាំង។ វាអាចធ្វើឲ្យស៊ីម៉ងត៍ជ្រាយ និងរបេះ»។
ទោះជាលោកបានបំបែកចំណេះដឹងតពីឪពុកនេះដោយខ្លួនឯង និងទទួលបានការកោតសរសើរច្រើនយ៉ាងណាក្ដី ក៏លោកមិនចង់លាក់ចំណេះដឹងនេះតែម្នាក់ឯងឡើយ។
លោកប្រាប់ថា៖ «ខ្ញុំក៏ចង់ចែករំលែកដល់កូនខ្មែរដទៃទៀតដែរ។ ខ្ញុំមិនលាក់លៀមទេ តែចំពោះការបង្រៀន វាលំបាកត្រង់ថាខ្ញុំមិនប៉ិនប្រសប់បង្រៀននោះទេ។ ខ្ញុំមានទម្លាប់រៀនតែខ្លួនឯង មិនដឹងប្រាប់សិស្សអំពីរបៀបធ្វើយ៉ាងម៉េចទេ»។
បច្ចុប្បន្ន លោក ស៊ីណាត មានកូនជាង ២ នាក់ ដែលមកក្រេបចំណេះវិជ្ជាជាប់លាប់ ខណៈកូនជាងដទៃភាគច្រើនមានភារកិច្ចរវល់ផ្សេងៗ។
លោកថ្លែងថា៖ «ខ្ញុំអរគុណដល់បងប្អូនខ្មែរគ្រប់រូប ដែលបានគាំទ្រស្នាដៃចម្លាក់ធ្វើដោយដៃរបស់ខ្ញុំ។ មួយរយៈនេះ ខ្ញុំក៏ឃើញថា មានអ្នកទាក់ទងច្រើនទាំងតាមហ្វេសប៊ុក និងលេខទូរស័ព្ទ តែខ្ញុំក៏សុំទោសដល់បងប្អូនមួយចំនួនដែល Add Friend មក ខ្ញុំមិនអាចទទួលបាន តែខ្ញុំពិតជារំភើបណាស់ ដែលនេះជាលើកទី១ មានគេស្គាល់ និងគាំទ្រច្រើន»៕
