ភ្នំពេញ៖ ទោះកូវីដ ១៩ ធ្វើឲ្យជីវិតកាន់តែត្រដាបត្រដួសសម្រាប់អ្នករកព្រឹកខ្វះល្ងាច តែវាក៏បានផ្ដល់ពន្លឺខ្លះពីសន្ដានចិត្ដរបស់សប្បុរសជនដែរ។
ជាការតបនឹងអ្វីដែលលោកបានជំពាក់ព្រះរាជាណាចក្រមួយនេះ ដោយខ្លួនមានឱកាសបានស្នាក់នៅជាច្រើនឆ្នាំ ជាងថតរូបព័រទុយហ្គាល់ មីហ្គែល ជេរ៉ូនីម៉ូ បានបង្កើតគំនិតផ្ដួចផ្ដើមនូវអំពើមនុស្សធម៌ជាមួយអង្គការអន្ដរជាតិ ដើម្បីទ្រទ្រង់ជនក្រីក្រនៅកម្ពុជា និងបានផ្ដល់រូបថតស្នាដៃរបស់ខ្លួនថែមទៀត។
មិនត្រឹមតែជាការបរិច្ចាគ លោក មីហ្គែល ជេរ៉ូនីម៉ូ ជាជាងថតរូបនៅភ្នំពេញ បានផ្ដល់រូបភាពស្នាដៃរបស់ខ្លួន ខណៈអ្នកបរិច្ចាគចាប់ពី ៥០ ដុល្លារឡើង។
លោកបាននិយាយថា៖ «លោកអ្នកអាចជ្រើសរើសរូបថត ១ សន្លឹកពីគណនីអ៊ីនស្ដាក្រាមរបស់ខ្ញុំ និងអ៊ីមែលប្រាប់ខ្ញុំ ហើយខ្ញុំនឹងផ្ញើរូបភាពមានទំហំត្រឡប់វិញ ជាការថ្លែងអំណរគុណចំពោះការបរិច្ចាគរបស់លោកអ្នក»។
លោកបន្ដថា លោកចង់តបស្នងដល់ប្រទេសនេះអំឡុងជួបគ្រាលំបាក ជាពិសេស ចំពោះសហគមន៍ងាយរងគ្រោះ ដូចជា ក្រុមអ្នករើសអេតចាយ បុគ្គលក្រៅផ្លូវការ ជនអនាថា និងអ្នកបាត់បង់ការងារពីកូវីដ ១៩ រួមទាំងបុគ្គលិកក្នុងវិស័យទេសចរណ៍ ឬឧស្សាហកម្មកម្សាន្ដនានា។
លោក ជេរ៉ូនីម៉ូ បានប្រាប់ ភ្នំពេញ ប៉ុស្ដិ៍ ថា៖ «ខ្ញុំបានបង្កើតយុទ្ធនាការតាមអនឡាញ ហើយខ្ញុំបានចែករំលែកជាមួយអ្នកដែលមានឱកាសទទួលប្រាក់ចំណូលអំឡុងពេលនេះ និងអាចជួយអ្នកដទៃបានតិចតួច»។
ជាងថតរូបដែលផ្ដោតភាគច្រើនបញ្ហាបរិស្ថានបានឲ្យដឹងថា លោកបានស្នើក្រុមគ្រួសារនៅព័រទុយហ្គាល់ជួយចែករំលែកព័ត៌មានទៅកាន់មិត្ដភក្ដិ និងផ្ទេរប្រាក់សប្បុរសធម៌។
លើសពីនេះ លោកបានចុះដល់មូលដ្ឋានជាមួយក្រុមការងារអង្គការមិត្ដសម្លាញ់ ដើម្បីថតរូបយុទ្ធនាការឆ្លើយតបកូវីដ ១៩ និងធ្វើបច្ចុប្បន្នលើវេបសាយនូវអ្វីដែលបាននិងកំពុងកើតឡើង រួមទាំងការផ្ដល់ជំនួយសង្គ្រោះ ដូចជាអង្ករ ឬសម្ភារអនាម័យជាដើម។
នេះមិនមែនជាលើកដំបូងដែលលោកបានបំពេញកិច្ចការមនុស្សធម៌ក្នុងការជួយអ្នកខ្សត់ខ្សោយ តែនេះជាលើកទី ១ សម្រាប់គម្រោងសហការជាមួយនឹងអង្គការមិត្ដសម្លាញ់នៅកម្ពុជា។
លោកបាននិយាយថា អង្គការមានក្រុមការងារសង្គមជាច្រើន ធ្វើការងារផ្ទាល់ជាមួយសហគមន៍ដែលផ្ដល់ប្រសិទ្ធភាពខ្ពស់បំផុតក្នុងការជួយ។
អង្គការមិត្ដសម្លាញ់បាននិងកំពុងឧបត្ថម្ភពលរដ្ឋក្រីក្រប្រមាណ ១ ពាន់នាក់ ឬ ២០០ គ្រួសារ ជាមួយជំនួយសង្គ្រោះបន្ទាន់ ហើយពួកគេកំពុងជួយលើការងារអចិន្រៃ្តយ៍ ឬគាំទ្រគម្រោងមុខរបរថ្មីថ្មោង បណ្ដុះបណ្ដាលជំនាញ និងបង្ហាត់បង្ហាញជំនាញសាមញ្ញ ដែលអាចសម្រួលដល់ការស្វែងរកការងារ។
លោកបន្ដថា៖ «វាពិតជាសំខាន់ដែលមានគម្រោងវែងឆ្ងាយ ដោយជ្រោមជ្រែងពួកគេឲ្យចេះជួយខ្លួនឯងរយៈពេលយូរ ព្រមទាំងរស់នៅឯករាជ្យ លែងចាំបាច់ទទួលជំនួយសប្បុរស»។
លោកលើកឡើងថា៖ «ឧបមាថា ការឧបត្ថម្ភប្រាក់ ៥០ ដុល្លារអាចជួយទ្រទ្រង់ជីវភាពរស់នៅ ១ គ្រួសាររយៈពេល ១ ខែ ហើយរាល់ទឹកប្រាក់ ៥០ ដុល្លារ លោកអ្នកនឹងទទួលបានរូបភាពស្នាដៃ ១ ឥតគិតថ្លៃ»។
មិនមែនមានន័យថា លោកលើកទឹកចិត្ដឲ្យមានការបរិច្ចាគចាប់ពី ៥០ ដុល្លារឡើង ដើម្បីជាថ្នូរនឹងស្នាដៃរូបថតនោះទេ។
លោកបាននិយាយថា សប្បុរសជនអាចបរិច្ចាគទឹកប្រាក់ទៅតាមតម្រូវការ និងទៅតាមសមត្ថភាព។
លោកបានឲ្យដឹងថា៖ «ខ្ញុំបានដឹងថា នេះជាវេលាដ៏ពិបាកចំពោះមនុស្សគ្រប់រូបលើបញ្ហាការងារ។ ដូច្នេះ វាពិតជាអាស្រ័យលើសន្ដានចិត្ដរបស់លោកអ្នក»។
ការបរិច្ចាគ គឺជាជំនួយសង្គ្រោះជីវិត រួមមាន ស្បៀងអាហារ និងសម្ភារអនាម័យ ការស្រោចស្រង់រយៈពេលយូរអង្វែង និងការកសាងឡើងវិញនូវកិច្ចខិតខំប្រឹងប្រែងលើការបណ្ដុះបណ្ដាលជំនាញ និងការងារ។
ថវិកាក៏ត្រូវបានបែងចែកឲ្យក្រុមការងាររបស់អង្គការដែលបំពេញកិច្ចនិរន្ដរភាពផងដែរ។
លោក ជេរ៉ូនីម៉ូ បានអះអាងថា៖ «សង្ឃឹមថា យើងអាចផ្ដល់អំណាចឲ្យក្រុមគ្រួសារនានារៀនទ្រទ្រង់ដោយខ្លួនឯងដោយការរកចំណូលថ្មីៗ ដែលនឹងឧបត្ថម្ភការរស់នៅប្រចាំថ្ងៃទាំងស្រុង ដោយធានាថា ឪពុកម្ដាយត្រូវបញ្ជូនកូនៗទៅសាលារៀន»។
សម្រាប់ព័ត៌មានលម្អិតអំពីការចូលរួមសកម្មភាពមនុស្សធម៌ សុំចូលទស្សនាអ៊ីនស្ដាក្រាមលោក មីហ្គែល ជេរ៉ូនីម៉ូ migueljeronimophotography ឬទាក់ទងលេខទូរស័ព្ទ ០១០ ២៩៨ ០៩១៕