ខេត្តកណ្តាលៈ ខណៈមានវ័យ ៦៤ ឆ្នាំ ហើយទើបស្នាដៃចម្លាក់ពីទង់ដែងជ្រលក់ទឹកប្រាក់ ឬចម្លាក់ក្រូម៉េដ៏ចំណានល្អប្រណីតនានារបស់ជាងទងតាំងសម័យឆ្នាំ ១៩៦៧ មកគឺលោកតា ជា យុទ្ធា ទើបតែមានអ្នកស្គាល់ និងទទួលបានការកុម្ម៉ង់ពីភ្ញៀវច្រើន ហើយក៏ធ្វើឲ្យជីវភាពប្រសើរបន្តិច ក៏ព្រោះតែបណ្តាញសង្គមហ្វេសប៊ុកជួយផ្សព្វផ្សាយ។
បណ្តុំស្នាដៃល្អប្រណីតមានក្បូរក្បាច់យ៉ាងចំណានតាមក្បួនខ្នាតបែបខ្មែរមានដូចជាផ្តិល កោដ្ឋ ឬស្មុគ រូបសត្វគ្រប់ប្រភេទ និងបណ្តុំរូបទេសភាពធម្មជាតិនានាដែលត្រូវបានឆ្លាក់នៅលើបន្ទះសំលោហៈគឺទង់ដែងជ្រលក់ទឹកប្រាក់ ដែលទើបតែមានអ្នកលេងបណ្តាញសង្គមហ្វេសប៊ុកចែករំលែកបន្តគ្នានាពេលថ្មីនោះគឺជាស្នាដៃរបស់ជាងទងតាំងពីសម័យទសវត្សរ៍ទី ៦០-៧០ គឺលោកជា យុទ្ធា ដែលកំពុងតែរស់នៅភូមិសាលាកាត់សក់ ឃុំវិហារហ្លួង ស្រុកពញាឮ នៃខេត្តកណ្តាល។
លោកតា ជា យុទ្ធា បច្ចុប្បន្នមានវ័យ ៦៤ ឆ្នាំដែលបានប្រកបរបរជាជាងទងនេះតាំងពីឆ្នាំ ១៩៦៧ មកតែមានអ្នកស្គាល់ពីស្នាដៃដ៏ល្អវិចិត្រនេះតិចណាស់ ក៏ព្រោះកន្លងមកស្នាដៃគាត់ត្រូវលក់បន្តទៅឲ្យឈ្មួញកណ្តាលដែលបានទិញពីគាត់ក្នុងតម្លៃទាបពេកមិនអាចប្រកបចិញ្ចឹមជីវិតបានសឹងតែបោះបង់ចោលអាជីពនេះម្តងៗដែរ ដោយសារគ្មានការផ្សព្វផ្សាយ និងមិនសូវមានអ្នកឲ្យតម្លៃផងនោះ លុះត្រាមកដល់សម័យទំនើបមានហ្វេសប៊ុកបានជួយផ្សាយឲ្យនេះ។
ជាងទងវ័យចំណាស់ដែលមានកូន ៤ នាក់ (ប្រុស ២ និងស្រី ២) ខណៈកូនប្រុសទី ២ ឈ្មោះ វែន រ៉ាម៉ូ វ័យ ៣៣ ឆ្នាំមានដុងផ្នែកចម្លាក់នេះដែរ កំពុងតែរៀនជំនាញបន្តពីគាត់ ដែរបានបង្ហើបប្រាប់ភ្នំពេញ-ប៉ុស្តិ៍ថា៖ «ខ្ញុំប្រកបរបរនេះគឺតាំងពីឆ្នាំ ១៩៦៧ មករហូតដល់បច្ចុប្បន្ន។ តែខកខានកាលពីសម័យប៉ុលពតលុះដល់ឆ្នាំ ១៩៨៥ ទើបចាប់ផ្តើមប្រកបរបរនេះសាជាថ្មីតក់ៗវិញ។ ជំនាញនេះខ្ញុំមិនបានចូលសាលារៀនឡើយកាលនោះខ្លួនខ្ញុំមានវ័យ ១៥ ឆ្នាំបានរៀនតពីអ៊ំប្រុស និងគ្រូធ្លាប់រៀននៅសាលារចនាដែរ។ តែការលក់ដូរវិញ តាំងពីមុនមកនោះ មិនថ្លៃឡើយ ខណៈខ្ញុំក៏អន់ចិត្តស្ទើរតែចង់បោះបង់ចោលម្តងៗ ហើយខ្ញុំក៏ឈប់លក់ឲ្យឈ្មួញទៀតគឺរក្សានូវស្នាដៃនានាទុករហូតមក។ ទើបតែប៉ុន្មានឆ្នាំចុងក្រោយនេះកូនប្រុសបានបង្កើតគណនីហ្វេសប៊ុក ហើយផ្សាយស្នាដៃទាំងនោះទើបមានអ្នកចាប់អារម្មណ៍សួរនាំទិញបន្តបន្ទាប់រហូតអស់ហើយពេលនេះ»។
ស្នាដៃចម្លាក់នានាគឺមានរូបភាពបានដកស្រង់ចេញពីរឿងរាមកេរ្តិ៍ មានរូបព្រះរាមចេញទ័ពទៅច្បាំង ឬព្រះរាមគង់ក្នុងសុវណ្ណព្រះពន្លាក្នុងពេលបើកកិច្ចប្រជុំការងារសឹកសង្គ្រាមជ័យជាមួយពួកពលសកលយោធា ព្រះខ័នសឹកស្ដេចស្វា ទម្រង់ក្បាច់ភ្ញីអង្គរលម្អដងយកតាមដាវមេទ័ពតាព្រហ្ម- (ក្រុងឧដុង្គ) ហនុមានសម្តែងឬទ្ធិ ជាដើម។ ក្រៅពីនេះមានរូបទេសភាពស្រុកស្រែ ដូចជា កសិករភ្ជួរដី អ្នកឡើងត្នោតទេសភាពភ្នំ សត្វគ្រប់ប្រភេទតាមការចង់បាន និងរូបទេសភាពប្រាសាទអង្គរវត្តផងដែរ។
យ៉ាងណាទម្រាំបានផលជាស្នាដៃខ្នាតតូចមួយនោះ មិនមែនប្រើពេលវេលាតែ ២-៣ ម៉ោងអាចធ្វើបានឡើយគឺប្រើពេលយ៉ាងតិចបំផុតក៏ ១ ខែ ដែរ ខណៈក្បាច់ខ្លះយូរដល់ទៅជាង ២ ខែឯណោះ។
លោកតា ជា យុទ្ធា ក៏បង្ហើបប្រាប់វេលា និងតម្លៃចម្លាក់នេះថា៖ «ដូចជាផ្តិលមួយមានមុខកាត់មាត់ទំហំ ២ តឹកនោះក៏ប្រើពេលជាង ១ ខែ ហើយតម្លៃគិតតាមចំនួនគីឡូ។ សម្រាប់ស្នាដៃដូចជាផ្តិលជាដើមនោះគឺ ១ គីឡូ ថ្លៃ ២០០ ដុល្លារ។
ចំណែកចម្លាក់រូបប្រាសាទអង្គរវត្តដែលមានទំហំ ៣ តឹក គុណ ៥ តឹកនោះ គឺមានចាប់ពីតម្លៃ ៥០០ ដុល្លារ និងទំហំ ៣ តឹកគុណ ៦ តឹក តម្លៃអាចមានដល់ទៅ ២០០០ ដុល្លារ»។
ប្រសិនបើលោកអ្នកចាប់អារម្មណ៍ចង់កុម្ម៉ង់ចម្លាក់ពីទង់ដែងដែលមានក្បាច់ចម្លាក់ដ៏ល្អប្រណីតនោះអាចទំនាក់ទំនងផ្ទាល់តាមលេខទូរស័ព្ទ ០៩២ ៦៧ ០០ ៣៨ ឬអាចសួរតាមហ្វេសប៊ុកឈ្មោះ Ramoon Ven ឬ Ra Mo៕