.jpg)
អ្នកទោសនៅបង់ក្លាដែសរីករាយនឹងការប្ដូរម្ហូបពេលព្រឹកនៅពន្ធនាគារ។ រូបថត AFP
ក្រុងដាក្កា: បច្ចុប្បន្នភាពតារាងមុខម្ហូបពេលព្រឹកតាំងពីសម័យអាណានិគមអាយុកាល ២០០ ឆ្នាំ ដែលប្រើក្នុងពន្ធនាគារបង់ក្លាដែស។
លោក បាស្លឺរ រ៉ាស៊ីដ អនុប្រធាននាយកដ្ឋានពន្ធនាគារ Prison Directorate បាននិយាយថា អ្នកទោសជាង ៨១ ០០០ នាក់ ចាប់ពីថ្ងៃអាទិត្យនឹងទទួលបាននូវរបបអាហារពេលព្រឹកកាន់តែប្រសើរដោយជំនួសនំប៉័ង និងទឹករងូដែលប្រើតាំងពីសម័យអាណានិគមនិយមអង់គ្លេសក្នុងសតវត្សរ៍ទី ១៨។
លោក រ៉ាស៊ីដ បានប្រាប់ AFP ថារបបអាហារថ្មីនឹងមាន នំប៉័ង បន្លែ បង្អែម និង khichdi បាយឆាជាមួយសណ្ដែក។ កន្លងមកអ្នកទោសត្រូវាបានផ្ដល់នំប៉័ងតែ ១១៦ ក្រាម និងទឹករងូ ១៤,៥ ក្រាមប៉ុណ្ណោះ។
ពន្ធនាគារចំនួន ៦០ សម្រាប់អ្នកទោស ៣៥ ០០០ នាក់ បានរងនូវការរិះគន់យ៉ាងអសោចពីក្រុមអង្គការសិទ្ធិមនុស្សចំពោះការផ្ទុកលើសចំនួនកំណត់។ អ្នកទោសក៏តែងតែត្អូញត្អែរចំពោះគុណភាព និងបរិមាណនៃម្ហូបអាហារសម្រាប់ពួកគេផងដែរ។
លោក រ៉ាស៊ីដ បានបន្ដថាការផ្លាស់ប្ដូររបបអាហារនេះគឺជាផ្នែកមួយនៃកំណែទម្រង់ជាហូរហែដើម្បីជួយដល់អ្នកទោសមានកម្លាំងចិត្ដ និងឆាប់កែខ្លួន។ លោកបានអះអាងថា៖ «យើងកំពុងតែព្យាយាមសម្របសម្រួល។ ដូច្នេះអ្នកទោសអាចកែប្រែខ្លួនអំឡុងពេលស្នាក់នៅក្នុងពន្ធនាគារ»។
លោកបន្ដថាអ្នកទោសរាប់ពាន់នាក់ពេញចិត្ដនឹងអាហារពេលព្រឹកថ្មីនៅពន្ធនាគារកណ្ដាល Keraniganj ទីក្រុងដាក្កា។
លោកបានលើកឡើងថា៖ «អាហារល្អធ្វើឲ្យគ្រប់គ្នារីករាយ»។
មន្ដ្រីរូបនេះបានបន្ថែមទៀតថារដ្ឋាភិបាលបង់ក្លាដែសក៏បានដាក់ឲ្យដំណើរការខ្សែទូរស័ព្ទតម្លៃថោកមានអេក្រង់ធំសម្រាប់អ្នកទោសក្នុងពន្ធនាគារផងដែរ៕ HR
