ភ្នំពេញ៖ ខណៈ ឆ្នាំ ២០២០ ត្រូវបានចាត់ទុកជាវេលាដ៏គួរឱ្យភ័យខ្លាចដោយសារតែវិបត្ដិកូវីដ ១៩ Ubiquest Phnom Penh បានរៀបចំកម្មវិធីមួយចំនួន ដើម្បីបន្ធូរបន្ថយភាពតានតឹងក្នុងផ្លូវអារម្មណ៍។
រៀបចំឡើងនៅកោះដាច់ ជាទីឋានដ៏ស្រស់ត្រកាលនៃដែនកោះសម្បូរដំណាំហូបផ្លែ និងជំនោរត្រជាក់ពីទន្លេ ស្ថិតនៅឯជាយក្រុងចម្ងាយប្រមាណ ១៥ គីឡូម៉ែត្រ ពីបេះដូងរាជធានីភ្នំពេញ ព្រឹត្ដិការណ៍កម្សាន្ដនេះមានគោលបំណងជំរុញវិស័យទេសចរណ៍ក្នុងស្រុក។
ទោះបីជាកោះដាច់នៅស្ថិតក្នុងបរិវេណរាជធានីភ្នំពេញ ប៉ុន្ដែវាស្ថិតនៅឆ្ងាយពីទិដ្ឋភាពអ៊ូអរ និងផ្សែងអួអាប់របស់ទីក្រុងដែលអ្នកចូលរួមអាចធ្វើដំណើរស្រូបខ្យល់អាកាសបរិសុទ្ធ និងទស្សនាទេសភាពប្លែកភ្នែក។
Ubiquest Phnom Penh បានរៀបចំកម្មវិធីចំនួន ២ រួចមកហើយ ដូចជាការប្រណាំងរ៉ឺម៉ក កាលពីថ្ងៃទី ៣ ខែតុលា និងការប្រារឰកម្មវិធីហាឡូវីន នៅថ្ងៃទី ៧ ខែវិច្ឆិកា។
កញ្ញា សម្បត្តិ ស្រីមុំ ជាអ្នកគ្រប់គ្រងផ្នែកពាណិជ្ជកម្មតាមប្រព័ន្ធអេឡិចត្រូនិកបានប្រាប់ ភ្នំពេញ ប៉ុស្តិ៍ ថា៖ «កាលនោះ មានគ្នាប្រហែល ៣០ នាក់ចូលរួម។ វាទទួលបានជោគជ័យដោយអ្នកចូលរួមគាត់ទទួលបានភាពរីករាយគ្រប់ៗគ្នា។ យើងអាចគ្រប់គ្រងស្ថានការណ៍បានទាំងអ្នកបើក tuk-tuk និងអ្នកជិះសុទ្ធតែមានសុវត្ថិភាព»។
កញ្ញានិយាយថា លើកនេះ ក្រុមហ៊ុនបានរៀបចំកម្មវិធីមានលក្ខណៈប្លែកពីកម្មវិធីមុនៗ។ រាល់ដងភាគច្រើនកម្មវិធីត្រូវបានរៀបចំឡើងចំនួន ១ ថ្ងៃប៉ុណ្ណោះ តែម្ដងនេះមកជាមួយកម្មវិធីរីករាយ និងប្លែកៗ ៣៥ ថ្ងៃ ចាប់ពីថ្ងៃទី ១៩ ខែ ធ្នូ ឆ្នាំ ២០២០ ទៅដល់ថ្ងៃទី ២៣ ខែ មករា ឆ្នាំ ២០២១។
«ថ្នាក់បង្រៀនកុមារចម្អិនម្ហូប» ធ្វើឡើងនៅម៉ោង ២ រសៀល ដែលមានតម្លៃ ១២ ដុល្លារម្នាក់ សម្រាប់ក្មេងអាយុចន្លោះពី ៧ ទៅ ១១ ឆ្នាំ ជាមួយមេចុងភៅចំណាន អាលីស្យា។
«ទេសចរណ៍តំបន់បេតិកភណ្ឌនាពេលរាត្រី» ជាដំណើរកម្សាន្ដជិះរថយន្ដ ដើម្បីទស្សនាសំណង់អគារប្លែកៗនៅកម្ពុជាក៏ដូចជាអគារបន្សល់តាំងពីសម័យអាណានិគមបារាំង។
កម្មវិធីទាំង ២ នេះ ត្រូវបានរៀបចំឡើងពេញ ១ ថ្ងៃ ខណៈក្រុមហ៊ុននៅមានកម្មវិធីច្រើនទៀតក្នុងការផ្ដល់ការកម្សាន្ដប្លែកៗ។
«រង់ចាំតាណូអែល» គឺជាកម្មវិធីសម្រាប់កុមារអាយុចន្លោះពី ៨ ទៅ ១២ ឆ្នាំ ដែលឪពុកម្ដាយអាចនាំកូនៗរីករាយជាមួយល្បែងជាច្រើន រួមទាំងការទទួលទានអាហារថ្ងៃត្រង់ និងមើលកុននៅសណ្ឋាគារ Plantation។
«ស្វែងរករតនសម្បត្ដិនៅ Factory Phnom Penh» ជាកម្មវិធី ដែលគ្រប់គ្នាអាចនាំក្រុមគ្រួសារមកលេងកម្សាន្ដ ដើម្បីធ្វើការប្រកួតប្រជែង។ អ្នកឈ្នះពីការប្រកួតនឹងទទួលបានរង្វាន់ត្រឡប់ទៅផ្ទះវិញ។
ចំណែកនៅថ្ងៃទី ២៣ ខែមករា Time Zone ជាកម្មវិធីដែលមានការរៀបចំប្លែក និងរីករាយជាងគេ។
វាជាការប្រណាំងកង់នៅលើកោះដាច់។ តម្លៃចូលរួមគឺ ៣៦ ដុល្លារសម្រាប់មនុស្សម្នាក់ៗ។
កញ្ញា ស្រីមុំ វ័យ ២៥ ឆ្នាំ បានឱ្យដឹងទៀតថា៖ «ក្នុងចំណោមកម្មវិធីទាំងនេះ មានតែ Time Zone ទេ ដែលមានលក្ខណៈប្រណាំងប្រជែងរវាងក្រុមជាកម្រិតធំជាងគេ។ សកម្មភាពផ្សេងទៀតភាគច្រើនមិនតម្រូវឱ្យមានការប្រកួតទេ វាជាការកម្សាន្ដ និងសាកល្បងនូវបទពិសោធថ្មី»។
អ្នកគ្រប់គ្រងរូបនេះ បានបន្ដថា មនុស្សគ្រប់រូបប្រាកដធុញថប់ខ្លាំងពីបញ្ហាកូវីដ ហើយកញ្ញាសង្ឃឹមថា កម្មវិធីទាំងនេះជាអាចផ្លាស់ប្តូរបរិយាកាសបានយ៉ាងល្អ។
កញ្ញានិយាយថា៖ «ខ្ញុំជឿថា គ្រប់គ្នាជាពិសេសភ្ញៀវទេសចរដែលមកធ្វើដំណើរកម្សាន្ដ និងជាប់ទីនេះ ខែបុណ្យណូអែលផង ពួកគាត់ប្រាកដជានឹកចង់ចំណាយពេលជាមួយគ្រួសារ ធ្វើអ្វីសប្បាយៗជាមួយនឹងគ្នា ហើយសម្រាប់អ្នកក្នុងស្រុកក៏ដូចគ្នា»។
ស្រីមុំ បន្ដថា៖ «ទើបយើងយល់ថា ការរៀបចំកម្មវិធីនេះយ៉ាងហោចណាស់ក៏ជួយប៉ះប៉ូវបានខ្លះ»។
យ៉ាងណាមិញ កញ្ញាបានលើកឡើងថា ក្នុងករណីដែលរាជរដ្ឋាភិបាលតម្រូវឱ្យផ្អាក ឬយ៉ាងណាក្រុមហ៊ុននឹងប្រគល់ប្រាក់គ្រប់ចំនួនទៅកាន់អ្នកបានកក់មុនវិញ។
កញ្ញាបន្ថែមថា បើប្រព្រឹត្តទៅធម្មតា Ubiquest Phnom Penh នៅបន្ដប្រកាន់ភ្ជាប់នូវគោលការណ៍អនាម័យ និងមិនរៀបចំកម្មវិធីមនុស្សកកកុញ ស្របតាមក្រសួងសុខាភិបាលយ៉ាងខ្ជាប់ខ្ជួន។
សម្រាប់ព័ត៌មានលម្អិត លោកអ្នកអាចចូលទៅកាន់វេបសាយ: https://hello.last2ticket.com/event/3433 ឬក៏ហ្វេសប៊ុក @Ubiquestphnompenh៕