.jpg)
ដោយមិនចាំបាច់ចុះពីរថយន្ត ភ្ញៀវអាចទទួលបានភាពរីករាយជាមួយវត្តមានដាយណូស័រតូចធំនៅ Jurassic Quest។ រូបថត AFP
ក្រុងឡូសអេនជើលេស៖ ខណៈដែលសួនកម្សាន្តធំៗជាច្រើនបានបិទទ្វារនៅរដ្ឋកាលីហ្វ័រនីញ៉ា ដោយសារតែវិបត្តិកូវីដជាសកលលោក រថយន្តរាប់រយនាំគ្នាបរតម្រង់ជួររង់ចាំចូលច្រកសួនកម្សាន្តដាយណូសរ័រ Jurassic Quest ឯក្រុងឡូសអេនជើលេស សហរដ្ឋអាមេរិក។
អង្គុយនៅក្នុងរថយន្តតួខ្ពស់បរកាត់ដាយណូស័រកវែង diplodocus សិប្បនិម្មិតប្រវែងជាង ២០ ម៉ែត្រ ភ្ញៀវម្នាក់មកពីក្រុងប៉ាសាដឺណា បាននិយាយថា៖ «សព្វថ្ងៃនេះចង់ទៅណាពិតជាពិបាកណាស់។ យើងអត់អាចចេញក្រៅធ្វើអ្វីតាមចិត្តបានទេ។ កន្លែងកម្សាន្តក៏បិទ។ សារមន្ទីរក៏បិទ។ អ៊ីចឹងមានតែជិះមើលសត្វពីក្នុងឡានបែបហ្នឹងទើបទៅរួច»។
ការជិះរថយន្តទស្សនាដាយណូស័រសិប្បនិម្មិត ចម្លងតាមសត្វធ្លាប់មានជីវិតលើភពផែនដីកាលពីជាង១៥០លានឆ្នាំមុន មានតម្លៃសំបុត្រ ៤៩ដុល្លារសម្រាប់រថយន្តមួយគ្រឿង។
Hilary Kadoya បីកូនដាយណូស័រអំឡុងពេលមកកម្សាន្តនៅសួន Jurassic Quest។ រូបថត AFP
គ្រួសារ ចូណាថាន និងអាគីម៉ា ជីមីណេស ដែលមកពីក្រុងបាសាដឺណាដូចគ្នានោះ បានបន្លឺឡើងថា៖ «វាពិតជាអស្ចារ្យណាស់។ វាល្អហើយដែលយើងអាចផ្ដល់ការកម្សាន្តបែបអប់រំដល់ក្មេងៗ និងមនុស្សធំ ខណៈដែលស្ថានភាពមិនអំណោយផលដល់ការចេញក្រៅ»។
អ្នកមកជិះរថយន្តទស្សនាដាយណូស័រទាំងអស់គ្នា សុទ្ធតែទទួលស្គាល់ថា ពួកគេសំណាងហើយដែលមានកន្លែងកម្សាន្តដោយមិនចាំបាច់ចុះពីលើឡាន។
អ្នកស្រី អេឌូរនឡ៍ ហ្គាស្យា ដែលមកជាមួយកូនតូចៗបានលើកឡើងថា៖ «បទពិសោធនៅទីនេះពិតជាអស្ចារ្យណាស់ ជាពិសេសក្មេងៗតូចៗដែលគ្នាអផ្សុកនៅតែផ្ទះ ហើយអត់មានគ្នាលេងជាមួយ។ វាពិតជាលំបាកណាស់ហើយ»។
ការជិះរថយន្តទស្សនាសត្វពីសម័យរយលានឆ្នាំមុន មានហានិភ័យទាបពីការឆ្លងជំងឺ។ រូបថត AFP
គំនិតធ្វើសួនដាយណូស័រសម្រាប់ភ្ញៀវបររថយន្តមកទស្សនានេះ ត្រូវបានអគ្គនាយកក្រុមហ៊ុន Jurassic Quest លោក អាដាម ហ្វ្រេដមេន លើកឡើងថា៖ «ពេលយើងរកនឹកថាតើយើងគួរតែបន្តសកម្មភាពសម្ដែងរបស់យើងអំឡុងពេលកូវីដវាយលុយនេះឬយ៉ាងណា។ ចម្លើយច្បាស់ណាស់គឺថាយើងត្រូវធ្វើអ្វីផ្សេងទៀត ដើម្បីធានាឱ្យបាននូវសុវត្ថិភាពដល់ភ្ញៀវរបស់យើង»។
លោកបន្តទៀតថា៖ «ហើយយើងក៏នឹងឃើញថា យើងអាចឱ្យភ្ញៀវសប្បាយរីករាយបានដោយមិនចាំបាច់បើកទ្វារចុះពីរថយន្ត។ អ៊ីចឹងពួកគេអត់ខ្លាចប៉ះពាល់ជាមួយអ្នកដទៃ ហើយវាកាត់បន្ថយហានិភ័យច្រើន។ ពួកគេនៅតែក្បែរសមាជិកគ្រួសារផ្ទាល់តែប៉ុណ្ណោះ»។
កុមារកាន់ប៉េងប៉ោងរូបដាយណូរស័រ និងអើតកចេញពីដំបូលរថយន្ត ដើម្បីមើលដាយណូស័រសិប្បនិម្មិត។ រូបថត AFP
នៅពេលដែលនិយាយដល់ប្រធានបទដែលកើតឡើងកាលពីជាង ១៥០ លានឆ្នាំមុន នាំឲ្យដាយណូស័រផុតពូចនោះ លោក អាដាម បានថ្លែងថា៖ «អ្វីដែលកើតឡើងក្នុងអំឡុងពេលដូច្នេះ ហើយមនុស្សក៏ចាប់ផ្ដើមគិតថា អេ ចុះ បើវាអ៊ីចេះ? ចុះបើមានរឿងអ៊ីចុះវិញ?»។
លោកបានលើកឡើងទៀតថា៖ «នៅពេលដែលយើងគិតដល់រឿងធ្ងន់ធ្ងរពីអតីតកាល វាអាចបំភ្លឺការយល់ដឹងរបស់យើង ពីការធ្វើដំណើរទៅមុខនៃមនុស្សសត្វមានជីវិត និងអ្វីដែលកើតឡើងក្នុងពិភពលោក និងភពផែនដីយើង»។
លោកបន្តថា៖ «ខ្ញុំយល់ថា វាធ្វើឲ្យយើងមានការយល់ដឹងច្រើន និងមានការចាប់អារម្មណ៍យ៉ាងទូលំទូលាយជាងមុន»៕ AFP/HR
ដាយណូស័រសិប្បនិម្មិតគ្រប់ប្រភេទ ស្វាគមន៍ភ្ញៀវដោយមិនចាំបាច់បើកទ្វារចុះពីរថយន្ត។ រូបថត AFP
កុមារតូចៗជាអតិថិជនសំខាន់ជាងគេ ដែលសប្បាយរីករាយនឹងទស្សនាដាយណូស័រ។ រូបថត AFP
ខណៈសួនកម្សាន្តធំៗជាច្រើនបានបិទទ្វារដោយសារតែវិបត្តិកូវីដ រថយន្តរាប់រយបរតម្រង់ជួររង់ចាំចូលច្រកសួនកម្សាន្តដាយណូសរ័រ។ រូបថត AFP
ក្រុមគ្រួសារខ្លះឆ្លៀតពេលចុះពីរថយន្តមួយភ្លែតដើម្បីផ្ដិតយករូបភាពជាមួយដាយណូស័រ។ រូបថត AFP
ដាយណូស័រកាចសាហាវហារមាត់ស្វាគមន៍ភ្ញៀវមកកាន់ Jurassic Quest នៅរដ្ឋកាលីហ្វ័រនីញ៉ា។ រូបថត AFP
