The Phnom Penh Post Search

Search form




Logo of Phnom Penh Post newspaper Phnom Penh Post - ជីវិត​ស្ត្រី​មេផ្ទះ​ ១ ៤២៥ ​ភាគ​តួស្រី​រក​បាន ​២,៥ ​លាន​ដុល្លារ

ជីវិត​ស្ត្រី​មេផ្ទះ​ ១ ៤២៥ ​ភាគ​តួស្រី​រក​បាន ​២,៥ ​លាន​ដុល្លារ

អានគីតា លូកខាន់ដ៍ សម្ដែង​ជា​តួនាង អានចាណា​។
អានគីតា លូកខាន់ដ៍ សម្ដែង​ជា​តួនាង អានចាណា​។

ជីវិត​ស្ត្រី​មេផ្ទះ​ ១ ៤២៥ ​ភាគ​តួស្រី​រក​បាន ​២,៥ ​លាន​ដុល្លារ

ខ្សែ​ភាពយន្ត​ភាគ​ឥណ្ឌា​​រឿង «ជីវិត​ស្ត្រីមេផ្ទះ» ដែល​ធ្វើ​ឲ្យ​អ្នក​តាម​ដាន​ចំណាយ​ពេល​រាប់​ឆ្នាំ​ក្នុង​ការ​ទស្សនា​នោះ បាន​ធ្វើ​ឲ្យ​តួ​ឯក​​ស្រី​ក្លាយជា​តារា​ឥណ្ឌា​មាន​ចំណូល​ខ្ពស់​ជាង​គេ និង​នាំ​ឲ្យ​នាង​កើត​​មនោសញ្ចេតនា​ស្នេហា​ពិត​ជាមួយ​តួ​ឯក​ប្រុស​ក្នុង​រឿង​នោះ​ថែម​ទៀត​ផង។

តារា​ស្រី​ឥណ្ឌា​រូបស្រស់​ នាង អានគីតា លូកខាន់ដ៍ បាន​ចាប់​ផ្ដើម​អាជីព​សិល្បៈ​ដំបូង​តាម​រយៈ​​រឿង​ភាគ «ជីវិត​ស្ត្រី​​មេផ្ទះ» ដែល​​ចាប់​ផ្ដើម​ចាក់បញ្ចាំង​នៅ​ប៉ុស្តិ៍​ទូរទស្សន៍​ Zee TV របស់​ឥណ្ឌា​តាំង​ពី​ថ្ងៃ​ទី​១ ខែ​មិថុនា​ ឆ្នាំ​២០០៩ រហូត​ដល់​ថ្ងៃ​ទី​២៥ ខែ​តុលា ឆ្នាំ​២០១៤។

តាមរយៈ​ខ្សែ​ភាពយន្ត​ជាង​១​ពាន់​ភាគ​នេះ តួឯក​ស្រី​ត្រូវ​បាន​គេ​ទម្លាយ​ថា ​រក​ចំណូល​បាន​ជិត​ ២​ ពាន់​ដុល្លារ​​សម្រាប់​ការ​ថត​មួយ​ភាគ ដែល​គេ​អាច​គណនា​ថា​នាង​ទំនង​ជា​រក​បាន​ចំណូលសរុប​​​ខ្ទង់​២,៥៨​លាន​ដុល្លារ​អាមេរិក​។

ភាពយន្ត​នេះ​ក៏​ធ្វើ​ឲ្យ​នាង និង​តួ​ឯក​ប្រុស​ឈ្នះ​ពាន​រង្វាន់​ក្នុង និង​ក្រៅប្រទេស​សរុប ​៦០​ ពាន​ផង​ដែរ។

តួឯកប្រុស​ស្រី​ក្នុង​រឿង ជីវិត​ស្ត្រីមេផ្ទះ​ បណ្ដើរ​គ្នា​ជា​ផ្លូវការ​​​​។
តួឯកប្រុស​ស្រី​ក្នុង​រឿង ជីវិត​ស្ត្រីមេផ្ទះ​ បណ្ដើរ​គ្នា​ជា​ផ្លូវការ​​​​។ រូបថត AFP

ក្នុងភាពយន្ត​ដែល​ត្រូវ​បាន​​នាំ​យក​មក​ចាក់​បញ្ចាំង​​នៅ​ប្រទេស​​កម្ពុជា​តាម​រយៈ​កញ្ចក់​ទូរទស្សន៍​ប៉ុស្ដិ៍​ MyTV តារា​ស្រី​វ័យ​ ៣០ ​ឆ្នាំ​រូប​នេះ​​បាន​សម្ដែង​ជា​តួឯក​ស្រី​ឈ្មោះ​នាង អាន​ចាណា ជា​ភរិយា​របស់​តួ​ឯក​ប្រុស​ឈ្មោះ ម៉ាណាវ សម្ដែង​ដោយ​​លោក សូសាន់ត៍ ស៊ីងហ៍ រ៉ាយភុត​។

អ្នកទាំង​ពីរ​បាន​រួម​សម្ដែង​ជា​មួយ​​គ្នា​​ក្នុង​ភាពយន្ត​​ភាគ​ដ៏​វែង​អន្លាយ​​​នេះ​រហូត​ដល់​ខែ​តុលា ឆ្នាំ​២០១១ នៅ​ពេល​ដែល​លោក សូសាន់ត៍ ស៊ីងហ៍ រ៉ាយ​ភុត​ សម្រេច​ចិត្ត​ដក​ខ្លួន ហើយ​ទុក​តំណែង​តួឯក​ប្រុស​នេះ​ឲ្យ​តួ​ជំនួស​គឺ​លោក ហ៊ីថេន ថេវ៉ានី។

មូលហេតុ​ដែល​នាំ​ឲ្យ​សូសាន់ត៍ លែង​ថត​រឿង​ភាគ​នេះ​ដោយ​សារ​តែ​លោក​​ឃើញ​ថា សាច់​រឿង​វែង​​​ពេក ​ព្រោះ​អ្នកនិពន្ធ​​តំណាល​រហូត​ដល់​អនាគត​ ២០​ ឆ្នាំ​ខាង​មុខ ដោយ​ស្ដែង​ពី​ជីវិត​គ្រួសារ​ខាង​ស្រី និង​ប្រុស​ ព្រមទាំង​កូន​ចៅ​នៅ​កាណាដា និង​ទឹក​ដី​ឥណ្ឌា។

បើទោះ​ជា​តួ​ឯក​ប្រុស​ដំបូង​បាន​ដើរ​ចេញ​ពី​ភាគយន្ត​ភាគ​នេះ​ក្ដី ក៏​លោក និង​តួ​ឯក​ស្រី​បាន​បង្កើត​នូវ​ចំណង​ស្នេហ៍​ក្រៅ​​ឆាក​ រហូត​ឈាន​ដល់​ការ​ភ្ជាប់​​ពាក្យ​នឹង​គ្នា​ជា​ផ្លូវ​ការ​ថែម​ទៀត​ផង។

ទាក់ទិន​នឹង​គម្រោង​រៀបការ​រវាង​លោក​ សូសាន់ត៍ ​និង​នាង ​អានគីតា លូកខាន់ដ៍​ គូស្នេហ៍​តារា​ឥណ្ឌា​នេះ​នៅ​មិន​ទាន់​កំណត់​កាល​បរិច្ឆេទ​នៅ​ឡើយ​ទេ។ មាន​ដំណឹង​លេច​ឮ​មក​ថា​ អ្នកទាំង​ពីរ​នឹង​រៀប​ការ​នៅ​ក្នុង​អំឡុង​ខែ​មិថុនា​ឆ្នាំ​២០១៥ ប៉ុន្តែ​ភាគី​ខាង​ប្រុស​បាន​សរសេរ​​បដិសេធ​នៅ​ក្នុង​បណ្ដាញ​សង្គម​ធ្វីធើរ​​កាលពី​ពេល​ថ្មីៗ​នេះ​ថា គ្មាន​អ្នក​ណា​អាច​កំណត់​ថ្ងៃ​រៀបការ​របស់​លោក​​បាន​ឡើយ៕

អត្ថបទគួរចាប់អារម្មណ៍