ក្រុងអ៊ីស្លាម៉ាបាដ: តាំងពីចាប់កាន់សោម៉ាឡេតជាជាងម៉ាស៊ីនរថយន្ដស្ដ្រីដំបូងក្នុងប្រទេសប៉ាគីស្ថានដ៏អភិរក្ស កញ្ញា អ៊ូម៉ា ណាវ៉ាស មានអារម្មណ៍ភ័យផង និងភ្ញាក់ផ្អើល ផង តែទន្ទឹមនឹងនោះ នាងក៏ទទួលបានការគោរពផងដែរ។
ស្ដ្រីវ័យ ២៤ ឆ្នាំរូបនេះ បានចំណាយពេលជម្នះវិបត្ដិហិរញ្ញវត្ថុ និងការរើសអើងយេនឌ័រ ដើម្បីសម្រេចសញ្ញាបត្រវិស្វករមេកានិច និងបានចូលធ្វើការនៅយានដ្ឋានជួសជុលរថយន្ដ ខាងកើតក្រុងមូលតាន។
កញ្ញា ណាវ៉ាស បានរំឭកថា៖ «ខ្ញុំខិតខំចាប់អាជីពនេះដោយពុះពារគ្រប់ឧបសគ្គ និងបញ្ហាប្រាក់កាក់សិក្សាពីក្រុមគ្រួសារ។ ពេលពួកគេឃើញខ្ញុំធ្វើកិច្ចការដូច្នេះ ពួកគេពិតជាមានការភ្ញាក់ផ្អើលណាស់»។
ចេញពីទីក្រុងក្រីក្រដ៏តូច ឌុនយ៉ាពូរ ភាគខាងកើតខេត្ដពុនចាប ប្រទេសប៉ាគីស្ថាន កញ្ញា ណាវ៉ាស ពឹងអាស្រ័យលើអាហារូបករណ៍ និងតែងតែអត់អាហារពេលនាងខំស្រវាតោងយកសញ្ញាបត្រ។
លទ្ធផលរបស់នាងទទួលបានពិតជាកម្រ ខណៈស្ដ្រីឯទៀតនៅប្រទេសអ៊ិស្លាមគ្រប់គ្រងដោយបុរសនេះរមែងត្រូវបានជំរុញឲ្យរៀបការទាំងវ័យក្មេង និងបូជាសិទ្ធិសេរីភាពគ្រប់យ៉ាងដើម្បីក្រុមគ្រួសារ។
នាងនិយាយយ៉ាងក្លាហានថា៖ «គ្មានឧបសគ្គណាអាចចូលមកបំបែកឆន្ទៈ និងបំណងប្រាថ្នារបស់ខ្ញុំបានឡើយ»។
ការព្យាយាមបានត្រួសត្រាយផ្លូវឲ្យនាងចូលធ្វើការងារនៅក្រុមហ៊ុនចែកចាយតូយ៉ូតាក្នុងទីក្រុងមូលតាន ក្រោយបញ្ចប់ការសិក្សា។ ទើបតែធ្វើការបាន ១ ឆ្នាំ កញ្ញា ត្រូវបានដំឡើងឋានៈ ដោយនាងអាចបំពេញការងារប្រើកម្លាំងយ៉ាងរហ័សរហួនដូចជា ការដោះកង់ឡាន លើប៉ុង ត្រួតពិនិត្យគ្រឿងម៉ាស៊ីន ដែលធ្វើឲ្យអតិថិជនកោតស្ញប់ស្ញែងយ៉ាងខ្លាំង។
អតិថិជនឈ្មោះ អាសាដ អាមេដ បានលាន់មាត់ថា៖ «ពិតជាភ្ញាក់ផ្អើលពេលឃើញនារីក្មេងម្នាក់លើកគ្រឿងបន្លាស់ កង់រថយន្ដធ្ងន់ៗ រួចដាក់ចូលតួវិញក្រោយជួសជុលរួច»។
ការតាំងចិត្តនិងជំនាញរបស់នាង ធ្វើឲ្យសហការីភ្ញាក់ផ្អើល ដោយក្នុងនោះមិត្តរួមអាជីពនាងឈ្មោះ អេម អាតធូលឡាស បានសរសើរថា៖ «មិនថាកិច្ចការណាក៏ដោយ ក៏យើងមើលឃើញថា គាត់ពិតជាមានសមត្ថភាពស្មើបុរសទាំងការព្យាយាម និងការតាំងចិត្ដ»។
ឪពុកនាងឈ្មោះ មូហាមេដ ណាវ៉ាស បាននិយាយថា៖ «ស្ដ្រីមិនចាំបាច់ធ្វើការរោងជាងទេ តែវាជាបំណងរបស់នាង។ ពេលនេះ នាងអាចដំឡើងម៉ាស៊ីនបានល្អ។ ខ្ញុំក៏រីករាយណាស់ដែរ»៕