ភ្នំពេញ: អ្នកប្រហែលជាបានឃើញលោកគ្រងស្បង់ចីពរស្អាតបាត ឧហ្សាហ៍បង្ហោះរូបភាពនិមន្ដឡើងយន្ដហោះទៅស្រុកក្រៅ ដោយប្រើសម្ភារប្រ៊េនៗ រួមទាំង កាបូបស្បែក LV ស្បែកជើងថ្លៃៗ ទូរស័ព្ទ iPhone X លើសពីមួយគ្រឿង ថេប្ល៊ិត iPad Air និងវ៉ាលិស idoky PH502 ជាដើម។ គួបផ្សំនឹងកាយវិការថតសែលហ្វីក្នុងភក្ត្របែបស្រទន់ធ្វើឲ្យព្រះតេជគុណទទួលងារជា សង្ឃ ឃ្យូតៗ លើបណ្ដាញសង្គម។
តើព្រះសង្ឃឃ្យូតលេងស្ទីលគួរឲ្យក្នាញ់លើបណ្ដាញសង្គម ប្រើសម្ភារប្រ៊េនៗ និងមិនចេះខ្ពើមរអើមអ្នកជំងឺមហារីកចេញដំបៅរលេះរលួយអង្គនេះជានរណា? តើលោកមានឧបនិស្ស័យជាមួយព្រះពុទ្ធសាសនាដល់ពេលណា និងមានបំណងធ្វើអ្វីខ្លះនាពេលអនាគត?
ប្រសូតក្នុងក្រុមគ្រួសារធូរធារមួយក្នុងរាជធានីភ្នំពេញ ព្រះសង្ឃ សុភ័ណ្ឌ កក្កដា បានចាប់ផ្ដើមសាងផ្នួសគ្រងស្បង់ចីពរតាំងពីព្រះអង្គព្រះជន្ម ១១ វស្សាក្នុងនាមជាកូននេនមានឧបនិស្ស័យជាមួយព្រះពុទ្ធសាសនា។
ព្រះភិក្ខុដែលសុំមិនលាតត្រដាងប្រវត្ដិ និងបញ្ហាគ្រួសារមានសង្ឃដីកាថា៖ «អាត្មាបួស ១០ វស្សាចូល ១១ ហើយ ហើយអាត្មាមិនទាន់នឹកឃើញរឿងលាចាកសិក្ខាបទនៅពេលនេះទេ។ អស់និស្ស័យពេលណាពេលហ្នឹង។ ចំពោះរឿងរ៉ាវគ្រួសារប្រហែលជាមិនអាចទេ! អាតា្មអត់សូវចង់ឲ្យបង្ហាញអត្ដសញ្ញាណក្រុមគ្រួសារទេ»។
ស្រាយចម្ងល់របស់អ្នកលេងហ្វេសប៊ុកជាច្រើនតែងតែងឿងឆ្ងល់ចំពោះលុយកាក់ចែកទានជួយទុរគតជន និងប្រើប្រាស់សម្ភារថ្លៃៗយីហោល្បីៗ ព្រះសង្ឃព្រះជន្ម ២២ វស្សាអង្គនេះបានឲ្យដឹងថា ភាគច្រើនជាបច្ច័យបានមកពីការនិមន្ដសូត្រមន្ដ និងបិណ្ឌបាតពីពុទ្ធបរិស័ទទាំងក្នុង និងក្រៅប្រទេស។
ព្រះតេជគុណបន្ដថា៖ «បានបច្ច័យពីញាតិញោមគាត់ប្រគេនអ៊ីចឹងទៅ ក៏បែងចែកជួយដល់ក្មេងៗ ពីព្រោះអាត្មាមិនសំងំរស់ម្នាក់ឯង។ អាត្មា ស្គាល់ឯកឧត្ដម អ្នកឧកញ៉ា និងលោកជំទាវដែលពួកគាត់តែងតែផ្ញើប្រាក់ជួយដោយមិនចង់ចេញមុខរួមទាំង កុមារីម្នាក់ដែលអ្នកមានទ្រព្យធនជួយយកទៅចិញ្ចឹមបីបាច់។ អាហ្នឹងជាបច្ច័យដែលពួកគាត់យកមកប្រគេនអាត្មា ពេលខ្លះញាតិញោមគាត់ប្រគេនជាវត្ថុទាំងនោះតែម្ដង ពេលអាត្មាទៅស្រុកក្រៅ ពីព្រោះអ្នកនៅស្រុកក្រៅពួកគាត់ដឹងពីសុខទុក្ខរបស់លោកអ៊ីចឹង»។
ព្រះសង្ឃដែលសម្រេចចិត្ដសាងផ្នួសតាំងពីកុមារភាពអង្គនេះបាននិមន្ដចូលរួមក្នុងកម្មវិធីសាសនាជាច្រើនប្រទេសដោយភាគច្រើនជាការនិមន្ដទៅសូត្រមន្ដប្រោះព្រំដល់ពុទ្ធបរិស័ទខ្មែរនៅក្រៅប្រទេស។
ព្រះភិក្ខុ សុភ័ណ្ឌ កក្កដា មានសង្ឃដីកាថា៖ «អាត្មាបាននិមន្ដទៅក្នុងកម្មវិធីព្រះពុទ្ធសាសនានានានៅក្រៅប្រទេស ដូចជា សហរដ្ឋអាមេរិក បារាំង ស្វ៊ីស អ៊ីតាលី អូទ្រីស ដាណឺម៉ាក ម៉ារ៉ុក ចិន ភូមា ស្ដ្រីលង្កា ឡាវ ថៃ ម៉ាឡេស៊ី និងសិង្ហបុរីជាដើម»។
ឆ្លើយតបនឹងអ្នកប្រើប្រាស់បណ្ដាញសង្គមមួយចំនួនដែលសរសេរសាររិះគន់ចំពោះកាយវិការ និងសម្ញែងសម្ភារបែបឃ្យូតៗ ព្រះតេជគុណ បានឲ្យដឹងថា៖ «បើសិនពួកគាត់គិតថា អាត្មាល្អ អ៊ីចឹងអាត្មាក៏ល្អ។ អាត្មាមានថ្ងៃនេះបានក៏ដោយសារតែពួកគាត់។ ពួកគាត់លើកសរសើរអាត្មារហូតដល់អាត្មាល្បី ដោយសារពួកគាត់។ វាស្រេចលើពួកគាត់ជាអ្នកដាក់ពិន្ទុឲ្យអាត្មាចុះ។ ឲ្យតែញាតិញោមដែលក្រីក្រមានសេចក្ដីសុខជាមួយនឹងអាត្មា គឺប៉ុណ្ណឹងគ្រប់គ្រាន់ហើយ»។
មហិច្ឆតាសង្គ្រោះកុមារកំព្រា និងជនចាស់ជរាគ្មានទីពឹង រយៈពេល ១១ ឆ្នាំជាមួយការចាប់ផ្ដើមបរិច្ចាគទានផ្ទាល់ខ្លួនបន្ដិចបន្ដួចដល់ទុរគតជន អ្នកជំងឺរងនូវជំងឺកាចសាហាវ និងជនពិការរហូតដល់សកម្មភាពដឹកនាំពួកគេទៅទទួលទានអាហារឆ្ងាញ់ៗ ស្វែងការព្យាបាលរកអ្នកចិញ្ចឹមបីដាច់កុមារកំព្រាបន្ដ និងជួយដល់ការអប់រំរបស់ពួកគេ ព្រះតេជគុណដែលអ្នកប្រើប្រាស់បណ្ដាញសង្គមស្ញប់ស្ញែងពីរូបឆោមរបស់ព្រះអង្គកំពុងបោះជំហានទៅបង្កើតអង្គការក្នុងបំណងជួយកិច្ចការសង្គមកាន់តែទូលំទូលាយ។
ព្រះភិក្ខុ សុភ័ណ្ឌ កក្កដា ដែលតែងតែរំលេចរូបភាពលើបណ្ដាញសង្គមមិនឲ្យអ្នកមើលអត់ទ្រាំមិននិយាយពាក្យឃ្យូតមិនបាន មានសង្ឃដីកាថា៖ «អាត្មាមានក្ដីស្រមៃសាងសង់អគារមួយសម្រាប់ទទួលក្មេងៗកំព្រា និងចាស់ជរារស់នៅឲ្យសុខស្រួលនៅទីនោះ។ អគារដែលអាត្មាប៉ងនោះអាចស្ថិតនៅជាយក្រុងដោយការជួលដីនឹងមិនមានតម្លៃខ្ពស់ដូចនៅក្នុងក្រុងនោះទេ»។
ដោយសារព្រះជន្មនៅក្មេងខ្ចីសេចក្ដី និងត្រូវពឹងអាស្រ័យចម្បងទៅលើពុទ្ធបរិស័ទក្នុងការទ្រទ្រង់អង្គការក្នុងក្ដីស្រមៃ ព្រះតេជគុណដែលស្គាល់ពុទ្ធបរិស័ទចង់បរិច្ចាគជាឯកឧត្ដម និងឧកញ៉ានានានោះហាក់មិនទាន់បានបង្ហាញជំហរច្បាស់ប្រាកដលើបំណងចុះបញ្ជីអង្គការក្នុងពេលឆាប់ៗនេះនោះទេ។
ព្រះតេជគុណ កក្កដា បានបន្ដថា៖ «អាត្មាពិតជាចង់បង្កើតអង្គការ តែវាមានការលំបាកដែលទាមទារមនុស្សច្រើន។ បើថ្ងៃអនាគតពេលមានគ្នីគ្នាអី អាចតស៊ូបានដែលមិនគិតពីផលប្រយោជន៍ខ្លួនឯង ដោយគិតប្រជាជនជាធំ ទើបអាចបង្កើតបាន»។
ជាមួយដំណើរបោះជំហានសន្សឹមៗទៅចាប់បង្កើតជាអង្គការក្រោមព្រះហស្តសង្ឃវ័យក្មេង និងរមែងរងនូវការរិះគន់ ព្រមទាំងកោតសរសើរ ព្រះភិក្ខុ បានបញ្ជាក់ថា៖ «បើសិនជាតស៊ូអី ១០ ឆ្នាំប្រហែលជាក្ដីស្រមៃអាចក្លាយជាការពិត។ អាត្មាធ្វើទៅតាមលទ្ធភាព ពីព្រោះអាត្មានឹកគិតដល់ជនចាស់ជរាដែលអត់មានទីពឹង និងក្មេងកំព្រា ខ្វះអាហារ ខ្វះជម្រក និងការសិក្សា»។
ពុទ្ធបរិស័ទ ឬសប្បុរសជនដែលមានបំណងចូលរួមកិច្ចការមនុស្សធម៌ ជាមួយនឹងព្រះភិក្ខុ សុភ័ណ្ឌ កក្កដា អាចទាក់ទងតាមលេខទូរស័ព្ទ ០៨៧ ៣១ ៣២ ៤៦៕