.jpg)
លោកបានចេញដំណើរពីភូមិម៉ោង ៥ ល្ងាច ដោយប្រើជាង ៣ ម៉ោង ទើបទៅដល់ខ្នងផ្សារ។ រូបថត សហការី
កំពង់ស្ពឺ-កោះកុង៖ បើទោះបីជាទំនោរនៃដំណើរកម្សាន្ដបែបផ្សងព្រេងបាននិងកំពុងតែពេញនិយមសម្រាប់ពលរដ្ឋខ្មែរតាំងពីមុនវិបត្ដិកូវីដសកលយ៉ាងណាក៏ដោយ ក៏ការដើរឡើងភ្នំបែកផ្សែងលើផ្ទៃដីរាប់សិបគីឡូម៉ែត្រតែម្នាក់ឯងទាំងយប់ទាំងថ្ងៃនៅតែជាសកម្ម-ភាពដ៏កម្រ និងគួរឱ្យស្រៀវឆ្អឹងខ្នងបំផុត។
ពន្លឺភ្លើងពិលចេញពីដៃមនុស្សដើរចាំងឆ្លុះទៅកាន់គល់ឈើ ដើមឈើ ចុងឈើ និងដុំថ្មរដិបរដុប ដែលអ្នកខ្លះឃើញហើយបញ្ចេញមតិទាំងព្រឺឆ្អឹងខ្នង បង្ហាញពីសកម្មភាពដើរឡើងភ្នំខ្នងផ្សារទាំងយប់របស់យុវជនកម្ពុជាម្នាក់ ក្នុងដំណើរពីតំបន់ខ្នងផ្សារទៅតំបន់អារ៉ែង បំណងជម្នះចិត្ដចង់ផ្សងព្រេងតែម្នាក់ឯង។
យុវជន នៅ វាសនា ដែលកាលពីថ្ងៃទី ១៥ ខែកុម្ភៈ វេលាម៉ោងជិត ៧ យប់ បានសរសេរអមវីដេអូឃ្លីបនារាត្រីកាលដ៏ស្ងាត់ជ្រងំក្នុងព្រៃនៅលើទំព័រហ្វេសប៊ុករបស់ខ្លួនថា៖ «Challenge ឡើងខ្នងផ្សារម្នាក់ឯងពេលយប់ម្ដង។ ចាប់ផ្ដើមដើរពីភូមិម៉ោង ៥ ល្ងាច»។
សំណេរហ្វេសប៊ុកនេះមាន អ្នកប្រើប្រាស់បណ្ដាញសង្គមជាច្រើនបញ្ចេញមតិស្រដៀងៗគ្នាថា៖ «តើពិតទេ? ខ្លាចណាស់។ ទៅម្នាក់ឯង?»។
អ្នកខ្លះថែមទាំងបានសរសេរថា៖ «ខ្ញុំមិនហ៊ានមើល [វីដេអូថតពេលយប់] ផង»។ ហើយអ្នកខ្លះទៀត បានសរសេរបែបបន្លាចថា៖ «ជួបមីង ជួបអូន ផ្ដាំសួរសុខទុក្ខផងបង»។
ក្រោយពីសម្រាកនៅវាលស្រល់ខ្នងផ្សារ ១ យប់ មុនពេលព្រឹកឡើង យុវជនវ័យ ២៩ ឆ្នាំ ដែលអះអាងថា ដំណើរដើរឡើងភ្នំទៅកាន់ខ្នងផ្សារមិនក្រោម ២៥ ដង និងទៅកាន់តំបន់អារ៉ែងថែមទៀត។
លោក វាសនា បានឱ្យដឹងថា៖ «ខ្ញុំបានមកដល់គោលដៅហើយ ដោយចំណាយពេល ៣ ម៉ោងនិង ១៥ នាទី គិតចាប់ពីភូមិតាំងបំពង់ ដល់កន្លែងបោះតង់ខាងមុខខ្នងសំពៅ។ ថ្ងៃស្អែក ខ្ញុំនឹងបន្ដដំណើរទៅកាន់ភូមិជំនាប់ ស្រុកថ្មបាំង តំបន់អារ៉ែង ខេត្ដកោះកុង ដែលមានចម្ងាយ ៥៧ គីឡូម៉ែត្រ»។
វាលខ្នងក្រពើ ជាទីដែលយុវជន វាសនា ដើរឆ្លងកាត់នៅថ្ងៃទី ២ ឆ្ពោះទៅតំបន់អារ៉ែង ដោយប្រើពេល ១៦ ម៉ោង។ រូបថត សហការី
នាពេលព្រឹកព្រលឹមក្រោយស្រស់ស្រូបអាហារកញ្ចប់រួចរាល់ យុវជនស្រឡាញ់បរិស្ថានតំបន់ខ្នងផ្សាររូបនេះបានបន្ដដំណើរដោយចំណាយពេលរហូតដល់ ១៦ ម៉ោង។
លោកនិយាយថា៖ «ដំណើរផ្សងព្រេងថ្ងៃទី ២ ដោយចាប់ផ្ដើមចេញពីខ្នងសំពៅ ខ្នងផ្សារម៉ោង ៦:៣០ ព្រឹក ឥឡូវខ្ញុំមកដល់គោលដៅដោយជោគជ័យនៅម៉ោង ១០ យប់ ដែលខ្ញុំបានចំណាយពេល ១៦ ម៉ោង ដោយដើរថ្មើរជើង ឆ្លងភ្នំខ្នងក្រពើ រូងជំនាង ព្រៃតាម៉ៅ វាលទ័ពយួន ខ្នងសាងាំ កាត់ព្រៃជាច្រើនកន្លែង និងឧបសគ្គជាច្រើន»។
លោក វាសនា ដែលប្រកបរបរផ្ទាល់ខ្លួនបន្ដិចបន្ដួចបានបន្ដថា៖ «យ៉ាងណាមិញ ខ្ញុំមិនបានមានអារម្មណ៍ថា បោះបង់ចំពោះដំណើរមួយនេះទេ។ ដោយមានការតាំងចិត្ដយ៉ាងមុតមាំទើបខ្ញុំអាចសម្រេចនូវ Challenge របស់ខ្ញុំបាន។ ខ្ញុំធ្វើបានហើយ។ តោះអ្នកបន្ទាប់ទៀត អាចសាកល្បងនូវ Challenge មួយនេះបាន»។
ថ្វីដ្បិតតែលោក វាសនា បានប្រកាសជោគជ័យនៅថ្ងៃទី ២ យ៉ាងណាក៏ដោយ ក៏ដំណើរផ្សងព្រេងតែម្នាក់ឯងនេះត្រូវបន្តដល់គោលដៅចុងក្រោយ គឺទឹកធ្លាក់ឆាយយោង មុនវិលមកកាន់ទីតាំងចាស់វិញ។
លោក វាសនា បានសរសេរលើហ្វេសប៊ុកថា៖ «អរុណសួស្ដីពីទឹកដីអារ៉ែងនាថ្ងៃទី ៣ វេលាម៉ោង ១០ ព្រឹក។ ខ្ញុំចេញដំណើរបន្ដទៅកាន់ ឆាយយោងគេង ១ យប់ រួចវិលទៅខ្នងក្រពើហើយចុះទៅភូមិតាំងបំពង់ តំបន់រលាក់កងជើងវិញ»។
យុវជនដែលដើរផ្សងព្រេងក្នុងតំបន់ខ្នងផ្សារមិនតិចជាង ២៥ ដងបានប្រាប់ ភ្នំពេញ ប៉ុស្ដិ៍ អំឡុងពេលដំណើរពីភូមិជំនាប់ ថ្មបាំងទៅកាន់ឆាយយោងថា៖ «មូលហេតុធ្វើឱ្យខ្ញុំចូលចិត្ដឡើងខ្នងផ្សារច្រើនជាងគេ គឺខ្ញុំស្រឡាញ់ទិដ្ឋភាពស្រស់ត្រកាល ដែលអាកាសធាតុប្រែប្រួលតាមកាលវេលា ជាពិសេសសម្បូរឆាយពពកស្អាតៗមើល»។
យុវជន នៅ វាសនា ដែលដើរផ្សងព្រេងទាំងយប់។ រូបថត សហការី
លោកបានបន្ដថា៖ «ការដើរភ្នំ គឺល្អសម្រាប់សុខភាព និងបានជួយផ្សព្វផ្សាយតំបន់ទេសចរណ៍ថ្មីៗ និងជួយខាងសហគមន៍ឱ្យមានចំណូលផ្គត់ផ្គង់គ្រួសាររបស់ពួកគាត់បន្ថែមពីលើការដាំដំណាំ»។
យ៉ាងណាមិញយុវជនចិត្ដសឿងដើរកាត់ព្រៃភ្នំទាំងយប់នេះបានសារភាពថា វាធ្វើឱ្យលោកព្រឺក្បាលបន្ដិចមែនរួមទាំងកង្វល់ស្បៀងប្រចាំថ្ងៃជាពិសេសទឹក។
លោកបានបន្ថែមទៀតថា៖ «សម្រាប់ចិត្ដខ្លាច គឺមានបន្ដិចបន្ដួច ដោយខ្លាចបំផុតនោះដើរជួបខ្លាឃ្មុំ។ ការលំបាកតាំងពីថ្ងៃចាប់ផ្ដើមរហូតដល់ថ្ងៃនេះបញ្ហាប្រឈម គឺទឹកសម្រាប់ញ៉ាំដោយសារខែនេះជារដូវប្រាំង ដែលពិបាករកទឹកណាស់»។
លោកបានបញ្ជាក់ថា៖ «ការធ្វើដំណើរក្នុងព្រៃនៅពេលយប់ វាប្រឈមនឹងបញ្ហាកើតឡើងគ្រប់ពេលវេលា។ ប៉ុន្ដែខ្ញុំបានសម្រេចចិត្ដទទួលយកនូវរឿងរ៉ាវគ្រប់យ៉ាងរួចរាល់ហើយ»។
យុវជន វាសនា ប្រាប់ ភ្នំពេញ ប៉ុស្ដិ៍ មុនពេលនិយាយពាក្យលាបន្ដដំណើរថា៖ «អរគុណចំពោះសប្បុរសជនដែលបានជួយជាថវិកា និងស្បៀងចំពោះដំណើរផ្សងព្រេងនេះ»។
អ្នកមានបំណងជួយយុវជនផ្សងព្រេងស្ទួយទេសចរណ៍ធម្មជាតិអាចទាក់ទងទូរស័ព្ទលេខ ០៧៧ ៩១៥ ៨៨៥ ឬគណនេយ្យ ABA: 001 164 005 ឈ្មោះ Nov Veasna៕
