.jpg)
ស្ថិតនៅទីលានដ៏គ្រោះថ្នាក់ កណ្ដុរដោះមីនដែលមានសមត្ថភាពខ្លាំងក្នុងការហិតក្លិន និងទម្ងន់ខ្លួនស្រាលមិនដែលថ្លោះធ្លោយក្នុងបេសកកម្មឡើយ។ រូបថត សហការី
ភ្នំពេញ: នៅលើផ្ទៃដីដែលមិនមានស្នាមដានជើងមនុស្សហ៊ានទៅបៀត កងកម្លាំងពិសេសបានបំពេញបេសកកម្មសម្អាតមីនបង្កប់ក្នុងដីនៅតំបន់អតីតសមរភូមិសង្គ្រាម។
សមាជិកក្រុមបោសសម្អាតមីនទាំងនេះអត់ពាក់អាវក្រោះ ឬប្រើឧបករណ៍ស្ទង់រាវរកលោហធាតុនោះទេ តែពួកគេប្រើសមត្ថភាពហិតរកយុទ្ធភណ្ឌក្រោមដីប្រកបដោយប្រសិទ្ធភាព និងឆាប់រហ័ស។
Lily Shallom បុគ្គលិកទំនាក់ទំនងប្រចាំអង្គការ APOPO នៅក្រុងម៉ូរ៉ូហ្គូរ៉ូ ប្រទេសតង់ហ្សានីបានរៀបរាប់អំពីបេសកកម្មរបស់អ្នកក្លាហានប៉ុនបាតដៃថា ក្រុមការងារបានរៀបចំបរិវេណដី ៣០០x៤០០ ម៉ែត្រការ៉េមុន ១ ថ្ងៃ។ ក្រុមកណ្ដុរក្រោកពីដំណេកម៉ោង ៤ ទៀបភ្លឺ និងចេញដំណើរទៅកាន់ទីលាន ដោយចាប់ផ្ដើមការងារនៅម៉ោង ៦ ព្រឹក។
Lily Shallom ប្រាប់ ភ្នំពេញ ប៉ុស្ដិ៍ តាមអ៊ីមែលថា៖ «បរិវេណដីប៉ុនទីលានតិន្នីសនេះប្រើបុគ្គលិកជាមនុស្ស ២ នាក់ និងបុគ្គលិកកណ្ដុរ ១ ក្បាលដែលវាមានសមត្ថភាពស្វែងរកគ្រាប់មីនកប់នៅក្នុងដីបានយ៉ាងឆាប់រហ័សរួចវាប្រញាប់ចូលម្លប់សម្រាកពីព្រោះវាជាសត្វចាញ់ក្ដៅ និងត្រូវការសម្រាកច្រើន។ បន្ទាប់មកក្រុមការងារជាមនុស្សដែលពាក់ឧបករណ៍ការពារចូលជីកដី និងកម្ទេចគ្រាប់នោះចោល។ ប្រតិបត្ដិការនេះបន្ដរហូតដល់ម៉ោង ១ រសៀល មុនពេលត្រឡប់ចូលមូលដ្ឋានវិញ»។
ដោយបានចូលមកបំពេញការងារជាមួយមជ្ឈមណ្ឌលកំចាត់មីនកម្ពុជា (ស៊ីម៉ាក់) ក្នុងឆ្នាំ ២០១៥ APOPO ដែលត្រូវបានបង្កើតឡើងដោយស្ថាបនិក Bart Weetjens ពេលលោកងឿងឆ្ងល់ថា តើកណ្ដុរចិញ្ចឹមរបស់លោកអាចបង្រៀនស្វែងរកគ្រាប់មីន និងសារធាតុផ្ទុះដទៃបានឬ? ទើបបញ្ជូនកណ្ដុរដោះមីនមកកាន់កម្ពុជាក្រោយពីទទួលជោគជ័យក្នុងប្រទេសអង់ហ្គោឡា និងម៉ូហ្សំប៊ិក។ កម្ពុជាគឺជាប្រទេសដំបូងដែលកណ្ដុរដោះមីនបំពេញបេសកកម្មក្រៅតំបន់អាហ្វ្រិក។
លោក Benjamin Carrichon នាយកមជ្ឈមណ្ឌលទស្សនារបស់ APOPO ប្រចាំខេត្ដសៀមរាបបាននិយាយថា៖ «យើងមកកាន់កម្ពុជាក្នុងឆ្នាំ ២០១៥ ហើយបច្ចុប្បន្នយើងកំពុងប្រតិបត្ដិការក្នុងខេត្ដសៀមរាប ហើយក៏ចាប់ផ្ដើមគម្រោងក្នុងខេត្ដព្រះវិហារជាប់ព្រំដែនថៃផងដែរ។ យើងបានជួយប្រជាពលរដ្ឋរាប់ពាន់គ្រួសាររស់នៅជុំវិញតំបន់ប្រាសាទព្រះវិហារ។ ដូច្នេះយើងបានរំដោះដី ១,១ លានម៉ែត្រការ៉េជូនពលរដ្ឋប្រមាណ ៨៤០០ នាក់ និងរំដោះដីបង្កបង្កើន ៨០៤ គ្រួសារ» ។
លោកបានឲ្យដឹងថាវត្ដមានកណ្ដុរតង់ហ្សានី ២៨ ក្បាលដែលកំពុងបំពេញបេសកកម្មនៅកម្ពុជាបានស្វែងរកឃើញគ្រាប់មិនទាន់ផ្ទុះបាទប្រមាណ ៥៥៥ គ្រាប់រួមទាំងគ្រាប់មីន និងគ្រាប់បែកក្នុងឆ្នាំ ២០១៨ កន្លងទៅ។
ថ្លែងពីបញ្ហាសមត្ថភាពកណ្ដុរដោះមីននៅលើទីលានដ៏គ្រោះថ្នាក់លោក Benjamin Carrichon បានអះអាងថា៖ «តាំងពីបំពេញបេសកកម្មហិតមីនដំបូងអស់រយៈពេល ២០ ឆ្នាំមកនេះកណ្ដុរដោះមីនមិនដែលជួបបញ្ហាថ្លោះធ្លោយម្ដងណាឡើយ ហើយវាអាចហិតរកសារធាតុរំសេវ (TNT) បានយ៉ាងឆាប់រហ័ស ខណៈឧបករណ៍រាវមីននៅមិនទាន់អាចបែងចែកច្បាស់អំពីគ្រឿងផ្ទុក និងលោហធាតុ»។
នៅក្នុងឆ្នាំ ២០១៧ APOPO បានសម្រេចបង្កើតមជ្ឈមណ្ឌលទស្សនាកណ្ដុរដោះមីនក្នុងក្រុងសៀមរាបដើម្បីអនុញ្ញាតឲ្យភ្ញៀវបានដឹងពីបេសកកម្ម និងឃើញពីសមិទ្ធភាពជាពិសេសឲ្យយល់ច្បាស់ពីផលប៉ះពាល់នៃគ្រាប់មីន។
ប្រធានមជ្ឈមណ្ឌលលោក Benjamin បានបន្ដថា៖ «គោលបំណងចម្បងនៃការបង្កើតមជ្ឈមណ្ឌលនេះគឺចង់ផ្សព្វផ្សាយពីផលវិបាករបស់គ្រាប់មីន និងយុទ្ធភណ្ឌមិនទាន់ផ្ទុះដ៏គ្រោះថ្នាក់នៅកម្ពុជា និងទូទាំងពិភពលោក។
បើមានបំណងចង់ជួយគាំទ្រការងាររបស់យើង ពួកគេអាចមានសមត្ថភាពទៅតាមជម្រើស»។
លោកបានប្រាប់ថា៖ «យើងមានជម្រើស ២ ដោយការទិញអាវយឺត និងផ្ដល់ប្រាក់ចិញ្ចឹមកណ្ដុរ ១ ឆ្នាំតម្លៃ ៦០ ដុល្លារ ឬការបរិច្ចាគតាមអនឡាញ។ ចំពោះការចិញ្ចឹមកណ្ដុរម្ចាស់ជំនួយនឹងទទួលបានព័ត៌មានបច្ចុប្បន្នភាពអំពីរបៀបនៃការចិញ្ចឹម និងបេសកកម្មនៅលើចម្ការមីន»។
លោកបញ្ជាក់ថាបច្ចុប្បន្នលោកអាចចិញ្ចឹមកណ្ដុរឈ្មោលឈ្មោះ ម៉ាហ្គាវ៉ា អាយុ ៥ ឆ្នាំមកពីតង់ហ្សានីទម្ងន់ ១២៣០ ក្រាមដែលកំពុងបំពេញបេសកកម្មនៅឃុំស្រែណូយ ខេត្តសៀមរាប។
លោកអរគុណចំពោះការឧបត្ថម្ភពីភ្ញៀវដែលមកកាន់មជ្ឈមណ្ឌល។
នៅឆ្នាំ ២០១៩ នេះអង្គការ APOPO នឹងបង្កើនវត្ដមានអ្នកក្លាហានប៉ុនបាតដៃមកពីតង់ហ្សានី ៣០ ក្បាលទៀតដើម្បីបំពេញបេសកកម្មរំដោះដីជូនប្រជាពលរដ្ឋខ្មែរក្នុងខេត្ដព្រះវិហារពីព្រោះកណ្ដុរអាហ្វ្រិកនេះមានមាឌតូច តែសមត្ថភាពហិតក្លិនពូកែ។
មជ្ឈមណ្ឌលទស្សនាកណ្ដុរដោះមីនរបស់ APOPO បើកទ្វារពីថ្ងៃចន្ទដល់ថ្ងៃសៅរ៍ចាប់ពីម៉ោង ៨:៣០ ដល់ម៉ោង ៥:៣០។ ភ្ញៀវអាចអាន និងមើលសកម្មភាពកណ្ដុរដោះមីន និងអាចចូលរួមឧបត្ថម្ភដោយការបរិច្ចាគប្រាក់ ទិញវត្ថុអនុស្សាវរីយ៍ និងចិញ្ចឹមកណ្ដុរ។
សម្រាប់ព័ត៌មានបន្ថែមសូមទាក់ទងតាមអ៊ីមែល visitor.center@apopo.org ឬលេខទូរស័ព្ទ ០៨១ ៥៩ ៩២ ៣៧៕
បុគ្គលិកពាក់អាវក្រោះការពារតែកណ្ដុរពឹងលើសមត្ថភាពហិត។ រូបថត សហការី
ក្រុមការងារដោះមីនមានទាំងបុគ្គលិកជាមនុស្ស និងកណ្ដុរ។ រូបថត សហការី
