The Phnom Penh Post Search

Search form




Logo of Phnom Penh Post newspaper Phnom Penh Post - ជោលីជា​ប្រធាន​គណៈកម្ម​ការ កិត្តិយស CIFF ឆ្នាំ ២០១៥




ជោលីជា​ប្រធាន​គណៈកម្ម​ការ កិត្តិយស CIFF ឆ្នាំ ២០១៥

Content image - Phnom Penh Post
អេនជឺ​លីណា ជោលី តារាភាពយន្ដ​ហូលីវូដស្រី​ដ៏ល្បី​។ Afp

ជោលីជា​ប្រធាន​គណៈកម្ម​ការ កិត្តិយស CIFF ឆ្នាំ ២០១៥

ភ្នំពេញ:​ មហោស្រព​ភាពយន្ដ​​អន្ដរជាតិ ​(CIFF) លើកទី ៦​ ជា​ព្រឹត្តិការណ៍​ភាពយន្ដ​ដ៏​ធំ​មួយ​នៅ​កម្ពុជា​​នឹង​នាំយក​ខ្សែភាពយន្ដ​ចំនួន​ ​១៣០ រឿង​ពី​ ៣៤​ ប្រទេស​​មក​ចាក់​បញ្ចាំង​ជូន​ទស្សនិកជន​ទស្សនា​នៅ​រោង​ភាពយន្ដ​ចំនួន ៨​ នៅ​ក្នុង​ក្រុងភ្នំពេញ​ ខណៈកម្ម​វិធី​នឹង​សម្ពោធ​នៅថ្ងៃទី ៤ ខែធ្នូ​ ឆ្នាំ ២០១៥ ​ខាង​មុខ​នេះ។

CIFF គឺ​ជា​ព្រឹត្តិ​ការណ៍​ភាពយន្ដ​ប្រចាំ​ឆ្នាំរបស់​កម្ពុជា​ ក្រោម​​ការ​ដឹកនាំ​របស់​ក្រសួង​វប្បធម៌ និង​វិចិត្រ​សិល្បៈ​ គាំទ្រ​ដោយ​អង្គ​ការ​យូណេស្កូ និងរៀបចំ​ឡើង​​ដោយ​មជ្ឈ​មណ្ឌល​បណ្តុះ​បណ្តាលជំនាញ​ និង​ទទួល​ការ​ថត​ភាព​យន្ដ​នៅប្រទេសកម្ពុជា (CFC) រួម​ជា​មួយ​នឹង​មជ្ឈមណ្ឌល​សោតទស្សន៍​បុប្ផាណា ខណៈ​ឆ្នាំទី ៦ នេះ​ មានលក្ខណៈ​អស្ចារ្យ​ជាង​មុន​ដែល​ប្រមូល​ផ្តុំ​ទៅ​ដោយក្រុម​គណៈកម្ម​ការ​កិត្តិយស​មាន​អាជីព​ក្នុង​វិស័យភាព​យន្ដ​មក​ពី​ប្រភព​ផ្សេងៗគ្នា​ និង​មាន​អ្នកស្រី អេន​ជឺលីណា ជោលី ជាតារាហូលីវូដ​​ដ៏​ល្បីឈ្មោះ​ជាប្រធាន​គណៈកម្មការ​កិត្តិយស។ ឮ

លោក ជា​ សុភាព ​នាយក​រង​នៃ​មជ្ឈ​មណ្ឌល​សោតទស្សន៍​បុប្ផា​ណា​ ​ឲ្យ​ដឹងថា៖ «​CIFF ឆ្នាំ​ផ្តើមនូវ​គំនិត​បង្កើត​គណៈកម្មការកិត្តិយស​ ដែល​​ប្រមូល​ផ្តុំ​ដោយអ្ន​ក​អាជីពក្នុង​វិស័យ​ភាព​យន្ដ និង​​គាំទ្រ​ទៅ​ដល់​ការអភិវឌ្ឍឧស្សាហ​កម្មភាព​យន្ដ​កម្ពុជា​។ យើងមានសមា​ជិក​ក្រុម​គណៈ​កម្ម​ការ​កិត្តិយស ដែលមាន​ប្រភព​មក​ពី​ប្រទេស​ផ្សេៗគ្នា​ដូចជា​ លោក រិទ្ធី ប៉ាន់ និង​លោក សុខ វិសាល ជា​ផលិត​​ករ​ភាពយន្ដនៅ​កម្ពុជា អ្នកស្រី​ ម៉ម កល្យានី អ្នកស្រី ខេលី សូ និងលោក នីកូឡា ស៊ីម៉ុង ជា​ផលិត​ករ​មក​ពីសហរដ្ឋ​អាមេរិក លោក ជែម ជីវ៉ាន់ ជា​ផលិត​ករ​ដែល​មក​ពីប្រទេស​អូស្រ្តាលី និង​ ផាក សុងហូ គឺ​ជា​អ្នករៀបចំ​មហោ​ស្រព​ភាព​យន្ដមក​ពី​កូរ៉េ​ខាង​ត្បូង ខណៈ​អ្នកស្រី អេន​ជឺលីណា ជោលី ដែល​ជា​តារា​ភាពយន្ដ​ហូលីវូដ​ដ៏ល្បី និង​ផលិត​ករ​មកពីសហរដ្ឋអា​មេរិក គឺ​ជា​ប្រធាន​គណៈ​កម្មការ​​កិត្តិយសនៃ​មហោ​ស្រព​ភាព​យន្ដ​អន្ដរជាតិ​ឆ្នាំនេះ»។ ​

Content image - Phnom Penh Post
ទិដ្ឋភាព​អ្នក​ទស្សនានៃ​ការបញ្ចាំង​ភាពយន្ដ​ក្នុងកម្ម​វិធី​មហោ​ស្រពភាពយន្ដ​អន្ដរជាតិ​ឆ្នាំ ២០១៤​។ រូប សហការី

អ្នកស្រី អេន​ជឺលីណា ជោលី ​បង្ហាញ​ពី​ចំណាប់​​អារម្មណ៍​ថា៖ «​ខ្ញុំ​មាន​មោទន​ភាព​ ដែល​បាន​គាំ​ទ្រ​នូវមហោ​ស្រព​ភាព​យន្ដ​អន្ដរជាតិ​នេះ​ និង​គាំ​ទ្រ​ប្រទេសកម្ពុជា​ដែល​គឺ​ជា​ទឹក​ដី​នៃ​ការ​ផលិត​រឿងថ្មី​ដ៏គគ្រឹក​​គគ្រេង​។ ចំពោះ​ប្រវត្តិ​សាស្រ្ដ និង​វប្ប​ធម៌​ដ៏យូរលង់ រួម​ទាំងមាន​​ធន​ធាន​មនុស្ស​​ដ៏​មានទេពកោសល្យ​របស់​​កម្ពុជា គឺ​ជា​ផ្នែក​មួយ​ដ៏ធំសម្រាប់​ផ្ដល់​ឲ្យ​តំបន់​ និងពិភព​លោក​។ នាង​ខ្ញុំ​មានកិត្តិយស​ណាស់​​ ដែល​​បាន​ក្លាយ​ជា​ផ្នែក​មួយ​នៃ​គណៈ​កម្មការរបស់​​មហោ​​ស្រព CIFF នៅ​ឆ្នាំ​នេះ​ ហើយ​​ក៏​រំភើប​​ចិត្ត​ទុក​ជា​មុន ដែរ​សម្រាប់​កា​រ​​បញ្ចូលគ្នារវាង​ខ្សែ​ភាព​យន្ត​កម្ពុជា​ និងខ្សែ​ភាព​​យន្ត​អន្តរជាតិ​ ដែល​យើង​នឹង​ត្រូវ​​យក​​មក​ចែក​រំលែក​ទាំងអស់​គ្នា​នៅ​​ឆ្នាំ​នេះ»។ ​

រោងកុន ៨ រួម​មាន​៖ រោង​កុន​ Major Cineplex by Cellcard រោងកុន Platinum Cineplex រោងកុន Legend Cinema ទាំង​​បី​សាខា​ ហើយ​មហោស្រព​ចតុ​មុខ​ និង​នៅ​រោង​ភាព​យន្តថ្មី​នៅវិទ្យាស្ថាន​បារាំង និងនៅ​ឯ​មជ្ឈ​មណ្ឌល​បុប្ផា​ណា ចាប់​ពីថ្ងៃទី ៥​ ដល់​ទី ១០ ខែ​ធ្នូ​នេះ​។

រីឯ សំបុត្រ​ចូលទស្សនា​អាច​រកជាវ​បាន​ចាប់​ពី​ពេល​នេះ​ នៅ​ឯ​មជ្ឈមណ្ឌល​បុប្ផាណា​ ដោយ​មាន​ជម្រើស​ជាវ​សំបុត្រសម្រាប់​មួយរឿង​តម្លៃ ១ ដុល្លារ ​តែ​បើ​ជាវ​សម្រាប់ ១០ រឿង​តម្លៃ ៥ ដុល្លារ ខណៈ​នៅតាម​បណ្តារោង​កុន​នានា​នឹង​មានដាក់​លក់នៅ​ថ្ងៃទី ៤​ ខែ​ធ្នូ​ ឆ្នាំ ២០១៥ ឯណោះ​៕​

អត្ថបទគួរចាប់អារម្មណ៍