ភ្នំពេញ: ខណៈជំងឺបាក់ទឹកចិត្តធ្វើឲ្យមនុស្សមួយចំនួនតូចសម្រេចចិត្តបញ្ចប់ជីវិត និងបានក្លាយជាប្រធានបទទាក់ទាញពេញបណ្ដាញសង្គម វេជ្ជបណ្ឌិតឯកទេសជំងឺផ្លូវចិត្តនៅកម្ពុជាក៏បានចែករំលែកនូវជំងឺផ្លូវចិត្តមួយទៀតគឺ «ជំងឺខ្លាចទីប្រជុំជន» ឬ Agoraphobia ជាភាសាឯកទេស។
ជំងឺផ្លូវចិត្តជាច្រើនប្រភេទបានកំពុងតែលាក់ខ្លួននៅក្នុងសង្គមគ្រាន់តែមនុស្សមិនសូវបានស្គាល់ និងចាប់អារម្មណ៍លើអាការនៃជំងឺទាំងអស់នោះតែប៉ុណ្ណោះ។ ក្នុងនោះ «ជំងឺខ្លាចទីប្រជុំជន» គឺជាផ្នែកមួយនៃជំងឺថប់អារម្មណ៍។ អ្នកជំងឺមិនមែនខ្លាចតែកន្លែងមានមនុស្សច្រើនប៉ុណ្ណោះទេ តែក៏អាចខ្លាចកន្លែងស្ងាត់ កន្លែងបិទជិត ទីខ្ពស់នៅក្នុងទឹក និងអាចខ្លាចរហូតសូម្បីតែការធ្វើដំណើរផ្លូវឆ្ងាយជាដើម។
លោកវេជ្ជបណ្ឌិតឯកទេសជំងឺផ្លូវចិត្ត ឈឹម សុធារ៉ា បានបញ្ជាក់ប្រាប់ ភ្នំពេញ ប៉ុស្តិ៍ ថា៖ «អាការនៃជំងឺខ្លាចទីប្រជុំជននេះគឺអ្នកជំងឺចេះតែខ្លាចនៅពេលដែលខ្លួននៅម្នាក់ឯង។ ពេលឈឺគ្មានអ្នកណាមកជួយទាន់ពេលវេលា។ ឧទាហរណ៍បើអ្នកជំងឺទៅផ្សារ ហើយជួបជាមួយមនុស្សច្រើន អ្នកជំងឺខ្លាចខ្លួនឯងថប់ដង្ហើមហើយដួលគ្មាននរណាមកជួយទាន់។ មួយទៀតខ្លាចមិនហ៊ាននៅផ្ទះតែម្នាក់ឯង។ អ្នកជំងឺចេះតែគិតថា បើខ្លួនឈឺ ឬយ៉ាងម៉េចយ៉ាងម៉ា គ្មានអ្នកណាមកជួយខ្លួនទាន់ ហើយអ្នកជំងឺចេះតែខ្លាចព្រួយបារម្ភគ្រប់ពេលវេលា»។
យោងតាមលោកវេជ្ជបណ្ឌិត ជំងឺនេះមានលក្ខណៈផ្សេងៗគ្នាគឺមុនដំបូងអ្នកជំងឺអាចមានជំងឺថប់អារម្មណ៍ជាមុនសិន។ ជួលកាលទៀត អ្នកជំងឺមានជំងឺថប់អារម្មណ៍ខ្លាំងឡើងរហូតដល់កើតជាជំងឺស្រឺត។
ម្ចាស់ពានរង្វាន់វេជ្ជបណ្ឌិតហ្គីសឡែន ឆ្នាំ ២០១៧ នៅប្រទេស ប៊ែលហ្ស៊ិក លោក ឈឹម សុធារ៉ា បានបន្តប្រាប់ពីសភាពជំងឺនេះថា៖ «ជួនកាលគាត់ជួបហេតុការណ៍ភ័យរន្ធត់អីមួយអ៊ីចឹងទៅធ្វើឲ្យគាត់ដក់នៅក្នុងចិត្តតែម្តង អ៊ីចឹងឲ្យតែជួបហេតុការណ៍ស្រដៀងហ្នឹងគឺធ្វើឲ្យគាត់ភ័យតែម្ដង អ៊ីចឹងពេលបេះដូងញ័រខ្លាំងគាត់គិតថាគាត់អាចដួលអាចសន្លប់ អ៊ីចឹងអ្នកជំងឺខ្លាចណាស់។ ហើយបើឲ្យអ្នកជំងឺគាត់ទៅហាត់ប្រាណ គាត់អត់ទៅទេ ព្រោះពេលណាហាត់ប្រាណបេះដូងលោតញាប់ អ៊ីចឹងបេះដូងលោតញាប់ គាត់ភ័យគាត់ខ្លាចតែម្តង»។
ថ្វីដ្បិតជំងឺនេះមិនបណ្តាលឲ្យអ្នកជំងឺស្លាប់ តែអ្នកជំនាញរំឭកថា បើគ្មានការពារព្យាបាលនោះទេ អ្នកជំងឺគឺដូចជាមនុស្សពិការ មិនអាចទៅណាម្នាក់ឯងបានព្រោះបារម្ភខ្លាចស្លាប់ ខ្លួនអាចនឹងឆ្កួត ឬប្រឈមការគាំងបេះដូង។ កត្តាទាំងនេះរំខានជីវិតគាត់ខ្លាំងមែនទែន។
លោក ឈឹម សុធារ៉ា បានឲ្យដឹងទៀតថាជំងឺខ្លាចទីប្រជុំជនកើតលើមនុស្សមិនរើសវ័យទេ ហើយការព្យាបាលតម្រូវផ្នែកវេជ្ជសាស្ត្រផង (ការប្រើប្រាស់ថ្នាំ) និងចិត្តសាស្ត្រផង។
លោកបានណែនាំថា៖ «អ្នកជំងឺគួរតែរកគ្រូពេទ្យជំនាញ ព្រោះគ្រូពេទ្យត្រូវពន្យល់អ្នកជំងឺឲ្យស្គាល់ពីខ្លួនឯងឲ្យច្បាស់បង្រៀនឲ្យអ្នកជំងឺចេះគ្រប់គ្រងអារម្មណ៍ បង្រៀនពីវិធីដកដង្ហើម ជាពិសេសត្រូវបង្រៀនអ្នកជំងឺឲ្យរៀនប្រឈមមុខនឹងកន្លែងដែលគាត់ភ័យ ដូច្នេះអ្នកជំងឺនឹងអាចជាសះស្បើយដោយខ្លួនឯងបាន»៕