.jpg)
ការជួបជុំគឺដើម្បីរឹតចំណងមិត្តភាពលើកកម្ពស់ការងារមនុស្សធម៌ និងការគោរពច្បាប់ចរាចរណ៍។ រូបថត Yousos Apdoulrashim
ភ្នំពេញៈ ជាមួយវត្តមានម៉ូតូធំចម្រុះជាច្រើនម៉ាក ម្ចាស់ទោចក្រយានយន្តធំកម្លាំងខ្លាំងប្រមាណ ៤០០ នាក់ មកពីបណ្តាក្រុមម៉ូតូធំនានាទូទាំងរាជធានីភ្នំពេញបានមកចូលរួមក្នុងកម្មវិធីជួបជុំក្រុមអ្នកបើកម៉ូតូធំ Riders Get Your Gear Be Ready For The 3rd of March បានបង្កើតជាវេលាជួបជុំដ៏មានអត្ថន័យពេញ ១ រាត្រីសម្រាប់អ្នកស្រឡាញ់ចូលចិត្តម៉ូតូនៅឯ Bar Fly City Mall ភ្នំពេញ។
លោក Kang Predi ជនជាតិឥណ្ឌូនេស៊ី និងជាអ្នករៀបចំកម្មវិធីនេះបានឲ្យដឹងថា៖ «ការបង្កើតកម្មវិធីនេះឡើង ដើម្បីបង្កើតឲ្យមានការចងចាំ និងបង្កើននូវចំណងមិត្តភាពសម្រាប់មិត្តអ្នកជិះម៉ូតូធំ ព្រោះថាប្រទេសកម្ពុជាមានគ្រោះថ្នាក់ចរាចរណ៍ជាច្រើនដែលក្នុងនោះក៏មានគ្រោះថ្នាក់កើតឡើងដោយសារម៉ូតូផងដែរ។ ដូច្នេះកម្មវិធីនេះខ្ញុំក៏ចង់បង្កើនការយល់ដឹងអំពីការជិះម៉ូតូប្រកបដោយសុវត្ថិភាពក្នុងចំណោមសហគមន៍អ្នកជិះម៉ូតូធំផងដែរ»។
ទន្ទឹមនឹងនេះមន្ត្រីអង្គការក្រៅរដ្ឋាភិបាលវ័យ ៤៩ ឆ្នាំរូបនេះបានរំឭកថា កន្លងមកសមាគមអ្នកបើកម៉ូតូធំតែងតែបានធ្វើការណែនាំពីសុវត្ថិភាពក្នុងការជិះម៉ូតូដល់សមាជិករួមក្រុម ទោះជាយ៉ាងណាសមាជិកក្រុមមួយចំនួនក៏នៅតែជួបគ្រោះថ្នាក់ចរាចរណ៍។
អ្នកជិះម៉ូតូធំមកចូលរួមជំនួបកាលពីចុងសប្ដាហ៍។ រូបថត Yousos Apdoulrashim
ជារៀងរាល់ឆ្នាំគឺមានសមាជិក ១ ឬ ២ នាក់បានបាត់បង់ជីវិតដោយក្រុមរបស់លោកគឺមានតែបង្ហាញពីការសោកស្តាយតែប៉ុណ្ណោះ។
ក្រុមម៉ូតូធំដែលបង្កើតឡើងមុនដំបូងគេនៅកម្ពុជាមានឈ្មោះ CBC (Cambodia Biker Club) ដែលគិតមកដល់ពេលនេះអាយុ ៧ ឆ្នាំមកហើយជាមួយការកើនឡើងជាបន្តបន្ទាប់នៃចំនួនក្រុមអ្នកបើកម៉ូតូធំ។
ក្រៅពីបំណងលើកស្ទួយមិត្តភាពរវាងអ្នកស្រឡាញ់ម៉ូតូ អ្នកបើកម៉ូតូធំមួយរូបលោក Nikki Phav វ័យ ៥៦ ឆ្នាំ និងមានបទពិសោធបើកម៉ូតូតាំងពីអាយុ ១៣ ឆ្នាំ បានប្រាប់ថា៖ «ទី ២ គឺធ្វើឡើងក្នុងការងារមនុស្សធម៌ដូចជាការជួយទៅដល់ក្មេងចាស់ប្រុសស្រី ជនក្រីក្រ រួមទាំងការជួយកសាង ឬជួសជុលសាលារៀន និងសកម្មភាពសង្គមផ្សេងៗ។ ទី ៣ គឺការផ្សព្វផ្សាយពីសុវត្ថិភាពចរាចរណ៍ ការបើកបរ ការប្រើប្រាស់ប្រដាប់ការពារខ្លួនរបស់អ្នកចូលចិត្តជិះម៉ូតូ ជាពិសេសគឺការអប់រំក្មេងជំនាន់ក្រោយដែលស្រឡាញ់វិស័យម៉ូតូ»។
រីឯលោក ខៀវ បញ្ញារិទ្ធ ជាសមាជិកក្រុមម៉ូតូធំ M sport បង្ហាញពីអារម្មណ៍សប្បាយចិត្តពេលបានចូលក្នុងកម្មវិធីនេះ និងបានស្នើឲ្យយុវជនដែលស្រឡាញ់ម៉ូតូត្រូវបង្កើតជាក្រុមម៉ូតូ ដើម្បីជាប្រយោជន៍ចូលរួមអភិវឌ្ឍប្រទេសជាតិ។
លោក បញ្ញារិទ្ធ បានណែនាំបញ្ជាក់ទៀតថា៖ «ចៀសវាងពីការធ្វើអំពើមិនល្អបង្កើតជាក្រុមបងតូចបងធំ ដែលនាំឲ្យប្រជាជនមានការយល់ច្រឡំថា អ្នកបើកម៉ូតូសុទ្ធតែជាមនុស្សអាក្រក់ និងត្រូវបើកបរឲ្យបានត្រឹមត្រូវ ម៉ូតូត្រូវមានគ្រប់លក្ខណបច្ចេកទេស និងត្រូវចូលរួមគោរពច្បាប់ចរាចរណ៍ទាំងអស់គ្នា»៕
វីដេអូ៖
