ក្រុងលីម៉ា: ប៉េរូ បានឲ្យដឹងកាលពីថ្ងៃពុធថា ការនាំចេញខ្ញីរបស់ខ្លួនស្ទើរតែកើនឡើងត្រីគុណអំឡុងពេលវិបត្ដិកូរ៉ូណា ដោយសាររុក្ខជាតិហឹរនេះត្រូវបានចាត់ទុកជាសារធាតុជំរុញប្រព័ន្ទស៊ាំងជំងឺ។
ក្រសួងពាណិជ្ជកម្ម បានប្រកាសថា ការនាំចេញខ្ញីបានបង្ហាញពីកំណើនចីរភាពរយៈពេលត្រីមាសដំបូងរហូតដល់ ១៦៨ ភាគរយ បើធៀបនឹងរយៈពេលដូចគ្នាក្នុងឆ្នាំ២០១៩។
ការនាំចេញភាគច្រើនគឺទៅកាន់អេស្ប៉ាញ ហូឡង់ និងសហរដ្ឋអាមេរិក។ អេស្ប៉ាញ បាននាំចូលខ្ញីប៉េរូកើនរហូតដល់ជាង ៥០០ ភាគរយ។
ខ្ញី ឬហៅថា Kion ជាភាសាប៉េរូ សម្បូរសារធាតុប្រឆាំងជាតិពុល និងមានអត្ថប្រយោជន៍ជាឱសថច្រើនទៀត ដូចជា ការពង្រឹងប្រព័ន្ធស៊ាំងជំងឺ។ នេះបើយោងតាមសេចក្ដីថ្លែងការណ៍របស់ក្រសួងពាណិជ្ជកម្ម។
ក្រសួងបានឲ្យដឹងថា៖ «រដូវចុងក្រោយនេះហាក់បង្ហាញពីកំណើននៃការទទួលទានខ្ញីអំឡុងពេលនៃវិបត្ដិសកលនេះ»។
ខ្ញីលាយទឹកតែក្រូចឆ្មារ និងភេសជ្ជៈក្ដៅផ្សេងៗទៀតគឺជាឱសថធម្មជាតិដ៏ពេញនិយមបំផុតមួយនៅលើបណ្ដាញសង្គមតាំងពីផ្ទុះវីរុសកូរ៉ូណាមក។
ក្រុមអ្នកជំនាញបានព្រមានថា វាមិនមានភ័ស្ដុតាងជាក់លាក់ថា ឱសថអាហារ ដូចជា ខ្ញីនេះអាចព្យាបាលជំងឺឆ្លងពីវីរុសកូរ៉ូណានោះទេ។
ខ្ញីជាឱសថបុរាណសម្រាប់កែរោគផ្ដាសាយ និងគ្រុននៅប៉េរូ ជាការនាំចេញលំដាប់ទី ៤ ក្នុងលោកទៅកាន់ទីផ្សារចិន ថៃ និងឥណ្ឌា។ ក្នុងឆ្នាំ ២០១៩ ប៉េរូនាំចេញខ្ញី ២៣ ៤០០ តោន ក្នុងទឹកប្រាក់ ៤១,៥ លានដុល្លារ។
ប្រទេសនៅតំបន់ជួរភ្នំ អេនត្រេស មានចំនួនអ្នកឆ្លងជំងឺកូវីដ ១៩ ច្រើនបំផុតលំដាប់ទី ២ នៅតំបន់អាមេរិកខាងត្បូង បន្ទាប់ពីប្រេស៊ីល ជាមួយ ២០៨ ០០០ ករណី និងឈរលំដាប់ទី ៣ ចំពោះអ្នកស្លាប់ដែលមានជិត ៦ ០០០ នាក់៕ AFP/HR