.jpg)
អ្នកភូមិឈរចោមរោមនៅមុខផ្ទះស្ត្រីដែលពួកគេបានវាយដំធ្វើទារុណកម្មដោយជឿថាជាធ្មប់។ រូបថត AFP
ក្រុងព័រម៉ូរេសប៊ី: ការប្រមាញ់ធ្មប់បានរុញច្រានតំបន់ខ្លះនៃប្រទេសប៉ាពូអាស៊ីនូវែលហ្គីណេ ធ្លាក់ជារដ្ឋភេរវកម្ម ខណៈក្រុមកុលសម្ព័ន្ធបន្ទោសលើវេទមន្ដផ្លូវងងឹតចំពោះពិភពលោកដែលកំពុងផ្លាស់ប្ដូរយ៉ាងឆាប់រហ័សដ៏គួរឲ្យព្រួយបារម្ភ។
ក្នុងឧប្បត្ដិហេតុដ៏គួរឲ្យតក់ស្លុតមួយ ស្ដ្រីចំណាស់ម្នាក់ប្រកាច់រមួលខ្លួន និងសុំអង្វរករយ៉ាងកម្សត់ ខណៈស្ដ្រីរូបនេះត្រូវបានវាយ រំលោភ និងធ្វើទារុណកម្មក្នុងខ្ទមមួយមុនពេលរាងកាយអាក្រាតដិតដាមដោយឈាមត្រូវបានអូសចេញក្រៅឲ្យអ្នកភូមិបន្ដព្រួតគ្នាវាយ និងដុតឆេះប្រកាច់ប្រកិន។
អ្នកជាប់ចោទជាធ្មប់ត្រូវបានគេដុតដែកក្ដៅដាក់លើខ្លួន។ រូបថត AFP
មនុស្សស្ទើរតែគ្រប់រូបរួមគ្នាវាយប្រហារ។ គ្មាននរណាយកដៃខ្ទប់ភ្នែកនោះទេ ហើយក៏គ្មាននរណាព្យាយាមចេញមុខជួយឡើយ។ អ្នកភូមិស្ទើរទាំងអស់គ្នាជឿថា អ្វីដែលពួកគេធ្វើគឺជារឿងត្រឹមត្រូវពីព្រោះវាជាមធ្យោបាយតែ ១ គត់អាចបញ្ឈប់ធ្មប់ដែលបានសម្លាប់អ្នកភូមិ និងស៊ីបេះដូង។
ជំងឺគាំងបេះដូង ទឹកនោមផ្អែម និងហ៊ីវ / អេដស៍ ក្លាយជាជំងឺសង្គមដ៏សាមញ្ញ តែមិនត្រូវបានស្វែងយល់ច្បាស់នៅឡើយទេ។ មនុស្សធាត់ដែលមើលទៅដូចមានសុខភាពល្អប្រក្រតី តែបែរជាស្លាប់ភ្លាមៗក៏រមែងត្រូវបានបន្ទោសលើអំពើធ្មប់ជាជាង កូលេស្ដេរ៉ូលខ្ពស់ជាហេតុផលវេជ្ជសាស្ត្រ។
យ៉ាងតិចមានឃាតកម្មលើមនុស្ស ២០ នាក់ពាក់ព័ន្ធនឹងការចោទប្រកាន់អំពើធ្មប់នៅតាមតំបន់ខ្ពង់រាបមួយចំនួននៃប្រទេសនេះនាប៉ុន្មានឆ្នាំចុងក្រោយ ហើយមនុស្សរាប់សិបទៀតរងការវាយដំយ៉ាងព្រៃផ្សៃ។
សូម្បីតែមន្ទីរពេទ្យព្យាបាលក៏ស្ត្រីរងគ្រោះរារែកដែរ។ រូបថត AFP
លោក អេនតុន លុត ជាបព្វជិតគ្រិស្ដសាសនិកដែលបានចំណាយពេលពេញមួយជីវិតរស់នៅក្នុងខេត្ដអេនហ្គា និងបានសង្គ្រោះធ្មប់ដែលរងការចោទប្រកាន់ដោយខ្លះអាយុត្រឹម ៦ ឆ្នាំបាននិយាយថា៖ «នេះជាអព្ភូតហេតុថ្មី»។
ក្រុមអ្នកស្រាវជ្រាវផ្សេងៗទៀតបាននិយាយថា សកម្មភាពព្រួតគ្នាវាយមនុស្សដ៏កំពុងរីករាលដាលគឺជារឿងថ្មីដែលបានកើតឡើងក្នុងខេត្ដអេនហ្គា ហើយវាយដុំធ្ងន់ធ្ងរ និងការរំលោភបំពានផ្លូវភេទជារឿងគួរឲ្យភ្ញាក់ផ្អើលបំផុត។
លោក លុត បាននិយាយថា៖ «យើងមានជំនឿតាមបែបបុរាណចំពោះខ្មោចព្រាយបិសាច និងជឿលើថ្មដែលអាចនិយាយ និងរឿងរ៉ាវគួរឲ្យចាប់អារម្មណ៍ផ្សេងៗទៀត។ ប៉ុន្ដែការចោទប្រកាន់ស្ដ្រីជាធ្មប់បង្កឲ្យមានមនុស្សស្លាប់ និងបានធ្វើទារុណកម្មនាងយ៉ាងព្រៃផ្សៃ និងបំពានផ្លូវភេទរាប់ម៉ោងរហូតដល់នាងស្លាប់នោះគឺជារឿងថ្មីសន្លាង»៕ HR
