The Phnom Penh Post Search

Search form




Logo of Phnom Penh Post newspaper Phnom Penh Post - ជំរំ Thom ផ្ដល់​បទពិសោធ​ស្និទ្ធស្នាល​រវាង​ភ្ញៀវ និង​ដំរី




ជំរំ Thom ផ្ដល់​បទពិសោធ​ស្និទ្ធស្នាល​រវាង​ភ្ញៀវ និង​ដំរី

Content image - Phnom Penh Post
​ភ្ញៀវ​ទេសចរ​ភ្លក្ស​បទពិសោធ​ជិះ​ដំរី​ច្រកកៀវ​លើ​ខ្នង​ផ្ទាល់​ជាលើក​ដំបូង​។ ហុង រស្មី

ជំរំ Thom ផ្ដល់​បទពិសោធ​ស្និទ្ធស្នាល​រវាង​ភ្ញៀវ និង​ដំរី

ក្រុងម៉េហុងសន: ដំរី​ជំរំ Thom's រស់​នៅ​ក្នុង​ព្រៃភ្នំ​ស្រុក​ប៉ៃ ចម្ងាយ​ប្រមាណ ៧ គីឡូម៉ែត្រ​ពីទី​ប្រជុំជន​ស្រុក​ប៉ៃ ខេត្ដ​ម៉េហុងសន។ រៀងរាល់​ថ្ងៃ ពួកវា​ត្រូវ​បាន​នាំ​ទៅ​ងូត​ទឹក​ទន្លេ និង​បញ្ចុក​ចំណី​សម្រាប់​ជា​សកម្មភាព​កម្សាន្ដ​របស់​ភ្ញៀវទេសចរ។

បទពិសោធ​នៃការ​ជិះសត្វ​យក្សដ៏​សុភាព​ត្រាច់ចរ​តាម​ភូមិឋាន​ពលរដ្ឋ បង្កើត​នូវ​អារម្មណ៍​ស្ញើប ខ្លាច​រអា រំជើបរំជួល អមដោយ​សំឡេង​សើច​ក្អាកក្អាយ ខណៈ​គូទប៉ះ​ផ្ទាល់​លើ​ខ្នង​សត្វ​ធំ​កំពុង​រមួល​ឃ្លោង​ទៅ​តាម​ចង្វាក់​ដំណើរ។

ប្រជាជន​កម្ពុជា​មួយ​ចំនួន​អាច​ធ្លាប់​បាន​ជិះ​ដំរី​នៅ​តំបន់​រមណីយដ្ឋាន​ប្រវត្ដិសាស្ដ្រ​វត្ដភ្នំ ឬក៏​បរិវេណ​ប្រាង្គ​ប្រាសាទ​នៅ​ខេត្ដ​សៀមរាប។ ប៉ុន្ដែ​ការជិះ​ដំរី​នៅ​ជំរំ Thom ភ្ញៀវទេសចរ​អាច​បង្កើត​ភាព​ស្និទ្ធស្នាល​ជាមួយ​ការជិះ​ផ្ទាល់​លើ​ខ្នង ដើរ​តាម​ជម្រាល​ព្រៃភ្នំ រួច​ចុះ​ងូតទឹក​ក្នុង​ទន្លេ។

នៅ​ពេល​ដំរី​អូស​ជើង​បោះ​ជំហាន​ម្ដង​មួយៗ ភ្ញៀវ​អត់​ធ្លាប់​ប៉ះ​កាន់​ដំរី​ចាប់ផ្ដើម​ប្រែប្រួល​ទឹកមុខ និង​បង្ហាញ​អាការ​ចង់​បុក​ពោះ ខណៈ​កាន់​ក្ដាប់​ខ្សែពួរ​យ៉ាង​ណែន​ដៃ។ ប៉ុន្ដែ​ក្រោម​ការ​បង្វឹក និង​ដឹកនាំ​ដោយផ្ទាល់​ពីហ្ម​ដំរី​ជំនាញ ភ្ញៀវ​ហាក់​ទុកចិត្ដ និង​ហ៊ាន​បញ្ចេញ​ស្នាមញញឹម​រីករាយ។

ហ្មដំរី​តែងតែ​ធ្វើការ​ទំនាក់ទំនង​ជាមួយ​នឹង​ដំរី​តាមរយៈ​សំឡេង​ដែល​ទំនង​ជាការ​បង្គាប់​បញ្ជា។ បើ​គ្មាន​ជំនួយ​ពី​ហ្មរដំរី​ទេ ហើយ​បើ​គ្មាន​ប្រាក់​បរិច្ចាគពី​ភ្ញៀវ​ទេ បទពិសោធ​នៃការ​ជិះ​ដំរី​នេះ​ក៏គ្មាន​ដែរ។

សកម្មភាព​ជិះ​ដំរី​ត្រូវ​បាន​បែង​ចែក​ជាច្រើន​ប្រភេទ ទៅ​តាម​ចំណង់​ចំណូលចិត្ដ​ភ្ញៀវ​ចាប់ពី​ការជិះ​រយៈពេល ១ ម៉ោង តម្លៃ ៨០០ បាត​ម្នាក់ (២៣ ដុល្លារ) រហូត​ដល់ ៣០០០ បាត (៨៨ ដុល្លារ) ម្នាក់​រួមទាំង​ការស្នាក់​នៅក្នុង​ខ្ទម​ឫស្សី ឬ​បោះតង់ ព្រមទាំង ការជិះ​ក្បូន​ឫស្សី​តាម​ដង​ទន្លេ​រយៈពេល​កន្លះ​ម៉ោង​ទៅ​ឈប់​សំចត​នៅក្បែរ​ស្ពាន​បុរាណសម័យ​អាណានិគម​ជប៉ុន។

Content image - Phnom Penh Post
​ក្រោយ​ពីជិះ​ដំរី​ទៅងូត​ទឹក​នៅ​ទន្លេ​ ភ្ញៀវ​បន្ដ​ជិះ​ក្បូន​ឫស្សី។ ហុង រស្មី

គួរ​បញ្ជាក់ថា Thom គឺជា​សហគមន៍​កើត​ឡើង​ពីគ្រួសារ​អ្នក​ថែទាំ​ដំរី។ Thom បង្កើត​ភាព​ស្និទ្ធស្នាល​ជាមួយ​នឹង​ដំរី ដោយ​ពួកគេ​យល់​ថា ដំរី​គឺជា​ផ្នែក​មួយ​នៃ​សមាជិក​គ្រួសារ។

សហគមន៍​ដំរី Thom បាន​ឲ្យដឹង​ថា ការជិះ​លើ​ខ្នង​ដំរី​គឺ​គ្មាន​ប្រើ​កៅអី​ឡើយ ពីព្រោះ​ពួកគេ​ស្រឡាញ់​បីដូច​ជា​ក្រុម​គ្រួសារ​តែមួយ។

ពួកគេ​បាន​អះអាង​ថា ការជិះ​បែប​នេះ​មិន​ផ្ដល់​គ្រោះ​ថ្នាក់​អ្វី​ឡើយ និង​គួរតែ​ចូលរួម​ងូតទឹក​ឲ្យដំរី៕

Content image - Phnom Penh Post
ហ្មដំរី​ទាំង​បី​មេកូនងូត​ទឹក​ និង​ប្រឡែង​លេង​ជាមួយ​ដំរី​។ ហុង រស្មី

អត្ថបទគួរចាប់អារម្មណ៍