.jpg)
ម៉េង ប៊ុនឡូ ទូច ស្រីល័ក្ខ ញឹម ចាន់ថន ដួង ម៉ានិច្ច និង លឹម រដ្ឋា។ ស្រេង ម៉េងស្រ៊ុន
ភ្នំពេញ៖ តារាស្រីស្រង់ភាពល្បីតាមរយៈការសម្តែងសម្ញែងភាពសិចស៊ី ជាងអាជីពជា អ្នកចម្រៀងកញ្ញា ញឹម ចាន់ថន បានស្រវាចូលភាគហ៊ុនផលិតកុនដុំដំបូង «ចិញ្ចៀន» ជាមួយតារាជើងចាស់ ម៉េង ប៊ុនឡូ និងតារាចម្រៀងអ្នកនាង ទូច ស្រីល័ក្ខ ដែលភាពយន្តនេះទើបនឹងសម្ពោធចាក់បញ្ចាំងកាលពីថ្ងៃទី ៣ ខែមករា គ្រប់រោងភាពយន្តលេជេន។
តាមរឿង «ចិញ្ចៀន» ដែលកញ្ញា ញឹម ចាន់ថន មានភាគហ៊ុនក្នុងការផលិត និងសម្តែងខ្លួនឯងផ្ទាល់នេះដែរ បានប្រើ រយៈពេលរហូតដល់ ២ ឆ្នាំឯណោះ ជាមួយថវិកាផលិត ជាង ៤ ម៉ឺនដុល្លារ។
តារាសម្តែងស្រី និងធ្លាប់ជាតារាចម្រៀងកញ្ញា ញឹម ចាន់ថន បានរៀបរាប់ពីភាពលំបាកក្នុងការផលិតខ្សែភាពយន្តដំបូងមកកាន់ ភ្នំពេញ ប៉ុស្តិ៍ ថា៖ «វាពិតជាលំបាកណាស់ មិនថាខ្ញុំជាតួសម្តែង និងបងៗក្រុមការងារទេ ពួកយើងត្រូវជួលផ្ទះអ្នកភូមិនៅក្នុងព្រៃរយៈពេល ១ ខែ ហើយជុំវិញការថតអាចមានគ្រោះថ្នាក់គ្រប់ពេលបើសិនជាពួកខ្ញុំធ្វេសប្រហែស ដោយសារទីតាំងដែលត្រូវថតនោះវាខ្ពស់ៗដូចជានៅលើផ្ទាំងថ្មធំៗ នៅលើភ្នំ និងចូលក្នុងព្រៃជ្រៅ ដើម្បីបានទីតាំងល្អៗថតឲ្យសមនឹងសាច់រឿង»។
កញ្ញា ញឹម ចាន់ថន ក៏បានរំឭកដែរថា មានក្រុមការងារម្នាក់បានជួបគ្រោះថ្នាក់ពេលកំពុងសមឈុតជិះខ្សែរ៉ក មិនបានប្រយ័ត្នក៏ជ្រុលទៅបុកក្បាលនឹងផ្ទាំងថ្មពេញទំហឹង ជាឈុតមួយដែលតារាស្រីរូបនេះត្រូវសម្តែង។
តារាចម្រៀងបោះទុនសម្ដែងកញ្ញា ញឹម ចាន់ថន បានបន្តប្រាប់ពីមូលហេតុ ដែលធ្វើឲ្យកុនមានរយៈពេលផលិតយូរថា៖ «តាមពិតទៅកុនដុំអ៊ីចឹង ប្រើពេលថតតែ ១៥ ថ្ងៃទៅ ១ ខែនឹងរួចហើយ ប៉ុន្តែខាងខ្ញុំពិបាករកទីតាំងថតបំផុត ព្រោះចង់បានកន្លែងណាដែលថ្មីៗ ហើយពេលខ្លះក៏ត្រូវថតឡើងវិញក៏មាន អ៊ីចឹងបានជាធ្វើឲ្យពួកខ្ញុំប្រើពេលយូរយ៉ាងនេះ»។
តារាចម្រៀង និងសម្ដែង កញ្ញា ញឹម ចាន់ថន។ស្រេង ម៉េងស្រ៊ុន
កញ្ញា ញឹម ចាន់ថន បានបង្ហើបដែរថា ក្នុងឈុតរោលរាលដែលសម្តែងជាមួយលោក ម៉េង ប៊ុនឡូ តម្រូវឲ្យនាងបង្ហាញល្វែងលើនោះ គឺ កញ្ញាមិនបានត្រៀមខ្លួនទេ ហើយក៏មិននឹកស្មានថា លោក ម៉េង ប៊ុនឡូ ហ៊ានដោះអាវនាងទាំងអស់ ដោយខ្លួនមិនបានពាក់របស់ការពារអីបន្តិចសោះ ប៉ុន្តែដោយសារតែជ្រុលទៅហើយទើបព្យាយាមធ្វើធម្មតា និងសម្តែងឲ្យបានល្អតែម្តងទៅ។
ទាក់ទងនឹងការផលិតខ្សែភាពយន្តដំបូងនេះ តារាស្រីបោះទុនផលិត និងសម្ដែងរូបនេះក៏បានឲ្យដឹងថា៖ «ទោះបីជាកុនដំបូងទទួលបានជោគជ័យ ឬមិនជោគជ័យក៏នៅតែបន្តផលិតទៀតដែរ ប៉ុន្តែបើ សិនជាខាតការផលិតក៏ប្រើពេលយូរទៅតាមហ្នឹងដែរ ដោយសារតែខ្វះថវិកា»៕
