.jpg)
អ្វីដែលកញ្ញាដេនីសចងចាំមិនភ្លេចគឺស្នាមញញឹមរបស់អ្នកដឹកជញ្ជូនពេលទទួលបានគាវស៊ីឈួន ១ ចានតាមរយៈគម្រោង «WE4YOU»។ សហការី
ភ្នំពេញ៖ ដោយសារកុងហ៊្វូគឺជាក្បាច់គុនចិនផ្ដោតលើវិន័យដ៏តឹងតែង ការអត់ធ្មត់ និងភាពនឹងនរទើបកញ្ញា ដេនីស លីម (Denise Lim) មកពីសិង្ហបុរីនិងដៃគូជនជាតិចិនលោក សន (Sean) ដែលសុទ្ធតែធំធាត់ក្នុងវប្បធម៌ចិន បានសម្រេចដាក់ឈ្មោះ កុងហ៊្វូឃីតឆេន (Kungfu Kitchen ហៅខ្លីថា KFK) ឱ្យភោជនីយដ្ឋានដោយពេញចិត្តនឹងលក្ខណសម្បត្តិនៃវិជ្ជាការពារខ្លួនមួយនេះ។
ភោជនីយដ្ឋានដ៏សាមញ្ញ KFK បានលេចឡើងដំបូងនៅម្ដុំបឹងកេងកងទី ១ ជាហាងបម្រើមុខម្ហូប និងស៊ុបចិនច្នៃបង្កើតថ្មី កាលពីដើមឆ្នាំ ២០២០ ដោយទទួលបានអ្នកគាំទ្រជាច្រើនមកទល់សព្វថ្ងៃ។
នៅពេលដែលរលករីករាលដាលនៃជំងឺកូវីដកាលពីដើមឆ្នាំ ២០២១ ហាងមានឱកាសក្នុងការចូលរួមសហការធ្វើការបរិច្ចាគ និងបើកយុទ្ធនាការជួយដល់អ្នកខ្វះខាតក៏ដូចជាតបស្នងចំពោះការលះបង់របស់អ្នកដឹកជញ្ជូនក្នុងអំឡុងពេលបិទខ្ទប់។
កញ្ញា ដេនីស បានប្រាប់ ភ្នំពេញ ប៉ុស្តិ៍ ពីគំនិតផ្ដួចផ្ដើមទៅលើការបរិច្ចាគ និងយុទ្ធនាការរបស់ហាងថា៖ «យើងដឹងថាវាជាពេលវេលាដ៏លំបាកសម្រាប់ប្រទេសកម្ពុជា។ យើងចង់ព្យាយាមឱ្យអស់ពីសមត្ថភាពក្នុងការចូលរួមជួយតាមដែលយើងអាចធ្វើបាន»។
មីស៊ីឈួនដែលជាអាហារដ៏ពេញនិយមប្រចាំហាងកុងហ្វូឃីតឆិន (KFK)។ សហការី
បទពិសោធចូលរួមសកម្មភាពសង្គមបានធ្វើឱ្យកញ្ញាសម្គាល់ឃើញថា៖ «តាមរយៈយុទ្ធនាការបរិច្ចាគលើកដំបូង «យើងសម្រាប់អ្នក» យើងឃើញថាអតិថិជនជាច្រើនក៏ចង់ចូលរួមជួយអ្នកដែលខ្វះខាតដែរ»។
កញ្ញាបានបកស្រាយបន្ថែមលើយុទ្ធនាការ «យើងសម្រាប់អ្នក» ដែលសហការជាមួយដៃគូ Art and Design ថាយុទ្ធនាការនេះធ្វើឡើងក្នុងគោលបំណងបង្ហាញការថ្លែងអំណរគុណចំពោះបុគ្គលិកដឹកជញ្ជូនដែលធ្វើការជិតស្និទ្ធជាមួយហាង KFK ក្នុងអំឡុងពេលបិទខ្ទប់។
យុទ្ធនាការនេះបើកតាំងពីថ្ងៃទី ២១ ខែមេសា ដោយរាល់ពេលអតិថិជនកុម្ម៉ង់ម្ហូបពីហាង KFK នៅលើកម្មវិធី Nham24 ឬ Foodpanda ដោយប្រើកូដ «WE4YOU» ហាងនឹងផ្ដល់គាវស៊ីឈួន ១ ចានដល់អ្នកដឹកជញ្ជូន ១ រូបនោះ។
ម្ចាស់ហាងវ័យ ៣៥ ឆ្នាំប្រាប់ថា៖ «យើងចង់អរគុណចំពោះដៃគូដឹកជញ្ជូនទាំងអស់ដែលបានប្រថុយជីវិតរបស់ពួកគេក្នុងពេលបំពេញការងារ បំពេញតម្រូវការរបស់អតិថិជនក្នុងការធ្វើដំណើរហួសចំណុចត្រួតពិនិត្យ និងរបាំងបិទផ្លូវ និងអាកាសធាតុដ៏លំបាក។ នេះជាវិធីតូចមួយរបស់យើងក្នុងការនិយាយអរគុណដល់ពួកគាត់»។
គាវខ្ចប់ថ្មីៗ និងបន្តោងសោរូបគាវដ៏គួរឱ្យស្រឡាញ់ដែលនឹងផ្ដល់ជូនអតិថិជនពេលកុម្ម៉ង់ឈុតអាហារ «KungForGood»។ សហការី
ក្រោយពីបញ្ចប់យុទ្ធនាការ «យើងសម្រាប់អ្នក» នៅចុងខែមេសា កញ្ញាបានឱ្យដឹងថាហាងបានចែកគាវដល់អ្នកដឹកជញ្ជូនចំនួនជាង ១២០ នាក់។
អ្វីដែលគួរឱ្យចងចាំនោះគឺកញ្ញាបានមើលឃើញរូបរាងនៃការភ្ញាក់ផ្អើល និងភាពសប្បាយរីករាយនៅលើទឹកមុខរបស់អ្នកដឹកជញ្ជូន ពេលពួកគាត់ទទួលកញ្ចប់គាវយ៉ាងភ្ញាក់ផ្អើល។
ឃើញពីការចូលរួម និងភាពជោគជ័យលើយុទ្ធនាការលើកដំបូងកញ្ញាក៏ចាប់ផ្ដើមនូវយុទ្ធនាការមួយទៀតឈ្មោះថា «KungForGood» ដែលគោលដៅធំគឺជាការតបស្នងដោយមានការជួយគាំទ្រពីអតិថិជនរបស់ហាងកាន់តែច្រើន។
ម្ចាស់ហាងដែលបានមកនៅកម្ពុជារយៈពេលជិត ២ ឆ្នាំ និងចាត់ទុកទីនេះជាផ្ទះរបស់ខ្លួននេះក៏បានរៀបរាប់ពីគោលការណ៍របស់យុទ្ធនាការ «KungForGood» នេះថា៖ «យើងបានបង្កើតជាឈុត «KungForGood» សម្រាប់អតិថិជនអាចធ្វើទទួលទាននៅតាមផ្ទះរៀងខ្លួន។ ក្នុងឈុតនោះរួមមានមីស៊ីឈួន និងគាវស៊ីឈួនជាមុខម្ហូបប្រចាំហាង និងមានបន្តោងសោរូបគាវចាក់ដោយដៃដ៏គួរឱ្យស្រឡាញ់មួយ»។
បន្តោងសោដ៏គួរឱ្យស្រឡាញ់ស្នាដៃរបស់សិប្បករអង្គការ CambodiaKnits។ សហការី
កញ្ញាបន្តទៀតថា៖ «ប្រាក់លក់បានយើងនឹងឱ្យចំណែកបន្តោងសោទៅ CambodiaKnits ដែលជាអ្នកធ្វើ និងបរិច្ចាគចំនួនប្រអប់បាយទៅតាមចំនួនឈុតដែលយើងលក់បានទៅឱ្យក្រុមបម្រើសហគមន៍ Local4Local និងអង្គការក្រៅរដ្ឋាភិបាល Khemara Cambodia ដើម្បីចែកជូនអ្នកដែលខ្វះខាត»។
អាហារសម្រាប់គម្រោងមនុស្សធម៌នេះក្នុង ១ ឈុតគឺតម្លៃតែ ១៤,៩៥ ដុល្លារប៉ុណ្ណោះហើយយុទ្ធនាការនេះនឹងត្រូវធ្វើចាប់ពីថ្ងៃទី ១៣ ដល់ថ្ងៃទី ១៩ ខែឧសភា។
កញ្ញា ដេនីស លីម បានប្រាប់ថាហាង KFK មានបម្រើមុខម្ហូបចិនឆ្ងាញ់ផ្សេងៗទៀតនៅទាំង ២ សាខា។ កន្លងមកមុខម្ហូបដែលទទួលបានការកុម្ម៉ង់ច្រើនជាងគេគឺគាវសាច់ជ្រូក និងគាវសាច់គោមាន់ជូរអែម និងមឹក។ រីឯជម្រើសស៊ុបគឺស៊ុបគោលក់ដាច់ជាងគេបំផុត។ តម្លៃអាហារជាមធ្យមចន្លោះពី ៤ ទៅ ៧ ដុល្លារ។
ដើម្បីបង្កើនទំនុកចិត្ត និងសុវត្ថិភាពរបស់បុគ្គលិក និងអតិថិជនដែលកុម្ម៉ង់ចេញពីហាង បុគ្គលិក KFK គ្រប់រូបសុទ្ធតែទទួលបានការចាក់វ៉ាក់សាំង។
ឈុតស៊ុបសាច់គោដែលទទួលបានការពេញនិយមកុម្ម៉ង់ច្រើនជាងគេ។ សហការី
កញ្ញាថាទាំងនៅហាង និងដៃគូដឹកជញ្ជូន Nham24 គឺហាងធានាជួននូវស្តង់ដាអនាម័យខ្ពស់ដោយការសម្អាតផ្ទះបាយរបាំង និងថង់ចែកចាយព្រមទាំងរក្សាអនាម័យដៃ ដើម្បីធានាបាននូវប្រតិបត្តិការប្រកបដោយសុវត្ថិភាពជាមួយអតិថិជន។
ជាចុងក្រោយកញ្ញាប្រាប់ថា៖ «ខ្ញុំសូមអរគុណចំពោះអ្នកគាំទ្រហាង KFK កន្លងមកទាំងអស់។ យើងសង្ឃឹមថាអាចជួបមុខគ្នាឆាប់ៗនៅពេលដែលស្ថានភាពល្អឡើងវិញ»។
បើកដំណើរការរៀងរាល់ថ្ងៃពីម៉ោង ១០ ព្រឹកដល់ ៨ យប់ហាង Kungfu Kitchen សាខាទី ១ គឺនៅផ្ទះលេខ 24e ផ្លូវ ៣០២ បឹងកេងកងទី១ និងសាខាទី ២ នៅផ្ទះលេខ ៥៤ ផ្លូវ ៤៥៤ ទួលទំពូងទី១។
សម្រាប់ព័ត៌មានបន្ថែម Kungfu Kitchen អាចទំនាក់ទំនងបានតាមទំព័រហ្វេសប៊ុក @KungFuKitchenkh៕
គាវខ្ចប់ និងចម្អិនភ្លាម ១៥ នំមានតម្លៃ ៣,៩ ដុល្លារ។ សហការី
