សៀមរាប: បើយោងតាមក្រុមអ្នករៀបចំបានឲ្យដឹងថា កូនឈើជាង ៥ ពាន់ដើមត្រូវបានដាំនៅតំបន់ទេសចរណ៍ថ្មីក្រៅក្រុងសៀមរាបក្នុងបំណងទាក់ទាញភ្ញៀវទេសចរច្រើនមកលេងរមណីយដ្ឋានទើបល្បីឈ្មោះនេះ។
ភ្នំពើងតានន់ ដែលស្ថិតនៅចម្ងាយប្រមាណ ៦០ គីឡូម៉ែត្រពីក្រុងសៀមរាប ស្ថិតក្នុងឃុំកោះដូង ភ្ញៀវអាចចូលទៅដល់តាមផ្លូវលំតូច និងចោត។ ប៉ុន្ដែ តាំងពីខែកក្កដា ពើងតានន់ទទួលភ្ញៀវទេសចរទាំងជាតិ និងអន្ដរជាតិភ្លូកទឹកភ្លូកដី។
លោក កែវ គាន ជាបុគ្គលិកមកពីអង្គការអភិវឌ្ឍន៍ និងការពារបរិស្ថាន (EPDO) បាននិយាយថា រមណីយដ្ឋានថ្មីនេះស្វាគមន៍ភ្ញៀវប្រមាណ ៥០០ នាក់ក្នុងមួយថ្ងៃ។ ភាពទាក់ទាញចម្បងគឺជាទេសភាពដ៏ស្រស់ត្រកាលនៃភ្នំរំលេចដោយថ្មសណ្ឋានរូបរាងប្លែក។ ស្ថិតនៅជ្រុងមួយនៃរមណីយដ្ឋាន ភ្ញៀវទេសចរអាចគយគន់ជួរភ្នំដងរែក និងភ្នំគូលែន ពីចម្ងាយ។
លោក គាន បានឲ្យដឹងថា វាមានសណ្ឋានដូចជាឆ្នេរលាតសន្ធឹងវែងអន្លាយ។ លោកបាននិយាយប្រាប់ពីតំណាងព្រេងនិទានថា៖ «អ្នកភូមិនៅទីនេះ ប្រាប់ថា វាធ្លាប់ជាច្រាំងសមុទ្រ។ បើលោកអ្នកមិនជឿ អាចឈរលើថ្ម រួចសម្លឹងទៅទិសខាងកើត វាជាសមុទ្រធំធេងដែលព័ទ្ធជុំវិញដោយជួរភ្នំ។ វាពិតជាស្រស់ស្អាតណាស់។ វាខុសប្លែកពីទេសភាពផ្សេងៗទៀតដែលលោកអ្នកបានឃើញនៅក្នុងខេត្ដសៀមរាប»។
ដើម្បីអភិវឌ្ឍទីរមណីយដ្ឋាននេះ អង្គការអប់រំជនបទ Bamboo Shoot បានសហការជាមួយក្រសួងបរិស្ថាន និងអាជ្ញាធរលើគម្រោងដាំកូនឈើ។ ក្រុមអ្នកស្ម័គ្រចិត្ដជិត ១៥០០ នាក់បាននាំគ្នាដាំកូនឈើជាលើកដំបូងកាលពីពីរសប្ដាហ៍មុន។ នេះបើយោងតាមនាយកអង្គការ Bamboo Shoot លោក ស៊ី សុផល។
លោក សុផល បានបន្ដថា គម្រោងនេះ មានបំណងផ្ដល់ប្រយោជន៍ដល់សហគមន៍ ជាកិច្ចខិតខំប្រឹងប្រែងមួយនៅក្នុងខេត្ដសៀមរាបដើម្បីផ្សារភ្ជាប់ទេសចរណ៍ដល់តំបន់ដាច់ស្រយាល។ លោកគ្រោងនឹងបង្កើតផ្សារសហគមន៍សម្រាប់ថ្ងៃអាទិត្យដែលអ្នកភូមិអាចលក់ចំណីអាហារជាកសិផលរបស់ខ្លួន។
លោក សុផល បានពន្យល់ថា៖ «ភូមិភ្នំនេះមានសក្ដានុពលពិសេសសម្រាប់វិស័យអេកូទេសចរណ៍។ ពួកគេអាចរកចំណូលកាន់តែប្រសើរមិនត្រឹមតែជារបរកសិកម្មប៉ុណ្ណោះទេ ប៉ុន្ដែថែមទាំងទេសចរណ៍ផងដែរ»។
លោកបញ្ជាក់ថា៖ «ប្រជាជន និងភ្ញៀវទេសចរត្រូវសហការគ្នាការពារធនធានធម្មជាតិរបស់យើង»៕
HR
