កំពង់ឆ្នាំង: កាលពីជាង ២០ ឆ្នាំមុនអ្នកស្រី កែវ ខុំ ស្រាប់តែចាប់ផ្ដើមកើតអាការរមាស់ដំបៅពកលើដៃ និងជើងខុសប្រក្រតីព្រមទាំងរលួយស៊ីចូលសាច់ជ្រៅបន្ដិចម្ដងៗដោយមួយថ្ងៃៗស្រែករោទ៍ដូចគោពីការឈឺចាប់ពើតផ្សាលើដំបៅ ដែលបន្តញាំញីជីវិតដូនចាស់រស់ក្រោមជម្រកខ្ទមស្លឹក។
លើសពីការឈឺចាប់មុខដំបៅរលួយរឡេះដែលក្លាយជាពករឹងម្រាមដៃម្រាមជើងលោកយាយ កែវ ខុំ បច្ចុប្បន្ន ៨៥ ឆ្នាំក៏ជួបគ្រោះអាសន្នថែមទៀត ដោយសារតែព្រះអគ្គីបានឆាបឆេះខ្ទមកម្សត់យាយតាដែលសង់ជាប់គ្នាឲ្យក្លាយជាផេះផង់ រកទីជម្រកគ្មាន ក្រោយការធ្វេសប្រហែសរបស់លោកតាពេលបង្កាត់ភ្លើងដាំទឹករួចសម្រាកលក់។
បើទោះបីជាដូនចាស់រួមរស់ជាមួយកូនស្រីម្នាក់ក្នុងចំណោមកូន ៣ នាក់ និងមានស្វាមីឈ្មោះ ហង សួង អាយុ ៨៥ ឆ្នាំដូចគ្នាក្នុងភូមិក្រោយវត្ដ ឃុំខ្លុងពពក ស្រុកទឹកផុស ខេត្ដកំពង់ឆ្នាំងយ៉ាងណាក៏ដោយក៏ប្ដីប្រពន្ធចាស់ៗទាំង ២ រស់នៅក្នុងខ្ទមទីទៃគ្នា។
ព្រះភិក្ខុ ស បញ្ញាឫទិ្ធ ដែលរមែងនិមន្ដធ្វើសកម្មភាពមនុស្សធម៌មានសង្ឃដីកាថា៖ «ឮថាចាស់ៗប្រាប់ថា ពួកគេឆុងឆ្នាំគ្នាមិនអាចរួសរស់ក្នុងដំបូលផ្ទះតែមួយ ទើបពួកគាត់សង់ខ្ទមរស់នៅទីទៃគ្នា តែនៅជាប់គ្នាទេ»។
ព្រះតេជគុណ ព្រះជន្ម ២៣ វស្សាបាននិមន្ដផ្ទាល់ទៅដល់ខ្ទមជនចាស់ជរាទាំង ២ បានបន្ដថា៖ «ប៉ុន្ដែប៉ុន្មានថ្ងៃមុននេះខ្ទមរបស់ពួកគាត់ត្រូវភ្លើងឆេះ ហើយលោកយាយមានជំងឺជាង ២០ ឆ្នាំមកហើយពរ។ អាការគាត់គឺដំបៅរលួយដៃជើង និងឡើងពកដុំៗ»។
ព្រះភិក្ខុ បានរៀបរាប់ពីស្ថានភាពជំងឺដូនចាស់ថា៖ «លោកយាយពិតជាលំបាកណាស់ ពីព្រោះគាត់ឈឺពើតផ្សារៀងរាល់ថ្ងៃ។ ពររយៈពេលជាង ២០ ឆ្នាំហើយ ហើយមើលទៅពិតជាពិបាកមែនទែន»។
ដោយរស់នៅក្រោមការផ្គត់ផ្គង់ពីសំណាក់កូនស្រី និងចៅៗក្នុងដំបូលខ្ទមតែមួយពីមុខរបរស្រែចម្ការបន្ដិចបន្ដួច ដូនចាស់ និងស្វាមីជរាទាំង ២ ហាក់មិនធ្លាប់នឹកឃើញពីការស្វែងរកសេវាកម្មព្យាបាលជំងឺរ៉ាំរ៉ៃនោះទេ។
ព្រះតេជគុណម្ចាស់គណនីហ្វេសប៊ុកសប្បុរសធម៌ «លោកម្ចាស់ គុណធម៌» ដែលបានអញ្ជើញគ្រូពេទ្យខេត្ដកំពង់ឆ្នាំងមកពិនិត្យអាការរោគរបស់លោកយាយ កែវ ខុំ មានសង្ឃដីកាថា គ្រូពេទ្យនៅមិនទាន់ហ៊ានសន្និដ្ឋានពីប្រភេទជំងឺរបស់លោកយាយដោយត្រូវទាមទារឲ្យដូនចាស់រូបនេះទៅសម្រាកព្យាបាលនៅមន្ទីរពេទ្យខេត្ដ។
ព្រះភិក្ខុដែលបានផ្ដល់ថវិកាទិញស្លឹកប្រក់ខ្ទមជូនដូនចាស់បានជ្រកកោនបណ្ដោះអាសន្នបានបន្ដថា៖ «ដោយសារជំងឺរបស់លោកយាយទាមទារការពិនិត្យដិតដល់បន្ថែមទៀត អាត្មា និងគ្រូពេទ្យនៅចាំការសម្រេចចិត្ដរបស់កូនស្រីគាត់ថា តើគួរយកគាត់ទៅសម្រាកព្យាបាលនៅមន្ទីរពេទ្យខេត្ដ។ ការព្យាបាលមិនត្រូវបានគិតប្រាក់ពីគាត់នោះទេ»។
ខណៈពេលនេះ ព្រះសង្ឃសប្បុរសធម៌មានសង្ឃដីកាពីបញ្ហាចោទចម្បងចំពោះពួកគាត់ថា៖ «ភាពចាំបាច់ដែលត្រូវដោះស្រាយនាពេលបច្ចុប្បន្នគឺការហូបចុក និងទីជម្រកសមរម្យ»។
សម្រាប់សប្បុរសជនមានបំណងជួយដល់ដូនចាស់មានជំងឺរ៉ាំរ៉ៃ អាចទាក់ទងព្រះតេជគុណ ស បញ្ញាឫទិ្ធ តាមរយៈលេខ ០១២ ៣១ ៣៥ ១៩ ឬ ០៩៨ ៣១ ៣៥ ១៩៕