The Phnom Penh Post Search

Search form




Logo of Phnom Penh Post newspaper Phnom Penh Post - ដូនចាស់ ៨៣ ឆ្នាំ​រស់​នៅ​ឯកា​ពេល​ភ្លៀង​រត់​ជ្រក​ទ្រុង​មាន់​




ដូនចាស់ ៨៣ ឆ្នាំ​រស់​នៅ​ឯកា​ពេល​ភ្លៀង​រត់​ជ្រក​ទ្រុង​មាន់​

Content image - Phnom Penh Post
យាយ សួន តូច ប្រគេន​ល្ហុង​ពីរ​ផ្លែ​ជា​ដំណាំដាំ​ដោយ​ផ្ទាល់ដៃ​ជូន​ព្រះសង្ឈ​​។ អង្គការ ព.អ.ក

ដូនចាស់ ៨៣ ឆ្នាំ​រស់​នៅ​ឯកា​ពេល​ភ្លៀង​រត់​ជ្រក​ទ្រុង​មាន់​

បាត់ដំបងៈ មើល​ទៅ​ពិតជា​គួរ​ឲ្យ​អនិច្ចា​ខ្លាំង​ណាស់​ចំពោះ​ឆាក​ជីវិតរបស់​ដូនចាស់​វ័យ ៨៣ ឆ្នាំ​ សួន តូច ដែល​ខំ​ត្រដរ​រស់​នៅ​ក្នុង​ខ្ទមតូច​មួយ​ប្រក់​ស្លឹកត្នោត​ មាន​ជញ្ជាំង​ស័ង្ក​សី​ចាស់ច្រេះ​ចាប់ធ្លុះ​ធ្លាយ​ និង​យក​ផ្ទាំង​ក្រណាត់​ចងបិទ​បាំង​ការពារខ្យល់​ និង​​ទឹក​ភ្លៀង​ ​​គ្មាន​សាច់​ញាតិ​កូន​ចៅ​មើលថែទាំ​សម្រាប់​ដំណើរ​ជីវិត​ចុង​ក្រោយ ​ប្រៀប​ដូចជា​ដើម​ចក​ដែល​អណ្តែត​រសាត់​កណ្តាល​​មហា​សាគរ។

ដូន​ចាស់ សួន​ តូច វ័យ ៨៣ ឆ្នាំ​រស់​នៅ​ក្នុង​ភូមិរហាសួង ឃុំ​ព្រែកនរិន ស្រុក​ឯក​ភ្នំ ខេត្ត​បាត់​ដំបង ដែល​ជា​ផ្នែក​មួយ​នៅ​ក្នុង​ចំណោម​ក្រុម​គ្រួសារ​ដែល​ជួបនូវ​ភាព​ទីទ័ល​ក្រីក្រ និង​​ស្ថិត​នៅ​ក្នុង​ស្ថាន​ភាព​វ័យចាស់​ជរា​ចំនួន ១៥ គ្រួសារ​នៅ​ភូមិឃុំ​ខាង​លើ។ ​

លោក ឌុល វន្នី ប្រធាន​ក្រុម​ការ​ងារ​នៃ​កម្ម​វិធីគម្រោងចុះ​ជួយ​ជន​ចាស់​ជរា និង​ក្រីក្រ​របស់​អង្គ​ការពុទ្ធសាសនា​ដើម្បី​ការ​អប់រំ​នៃ​កម្ពុជា បាន​រៀប​រាប់​នូវ​ដំណើរ​ឆាក​ជីវិត​របស់​លោក​យាយ សួន តូច ឲ្យ​ដឹង​ថា៖ «តាម​ពិត​ទៅ​នោះ​លោក​យាយ មាន​កូន​ប្រុស​ម្នាក់​ដែរ​នៅ​ជា​មួយគាត់​! តែ​ជា​កូន​ប្រុស​មាន​ភាព​មិន​ប្រក្រតី និង​ចូលចិត្ត​តែ​ដើរ​លេង​ចោល​ផ្ទះ​សំបែងរាល់​ថ្ងៃ​មិនដែលបាន​ចូល​ផ្ទះ​ឡើយ​ ដោយ​ទុក​ម្តាយ​ចាស់​ជរានៅ​ម្នាក់​ឯង​​។ យើង​បាន​ជួប​លោក​យាយ កាល​ពីពេល​ក្រុម​ការងារចុះ​សួរ​សុខ​ទុក្ខ ​នាំ​យកនូវ​អំណោយបន្តិច​បន្តួច​សម្រាប់​ប្រជា​ពល​រដ្ឋ​ក្រី​ក្រ​ចំនួន ១៥ គ្រួសារ​នៅ​ក្នុង​ភូមិ​រហាសួង ឃុំ​ព្រែកនរិន តាំង​ពីនៅ​ថ្ងៃ​ទី ២១ ខែ​ធ្នូ​ ឆ្នាំ ២០១៣ មក​»។

Content image - Phnom Penh Post
ព្រះតេជ​គុណ សៀងហៃ ចុះ​ទៅ​ជួយ​ដូនចាស់​។ អង្គការ ព.អ.ក

លោក​បន្ត​ថា៖ «បច្ចុប្បន្ន​លោក​យាយ​មាន​វ័យ ៨៣ ឆ្នាំទៅ​ហើយ​ រស់នៅ​ក្នុង​ជីវ​ភាព​រក​ព្រឹកខ្វះ​ល្ងាច​ រកល្ងាច​ខ្វះ​ព្រឹក​ ដោយ​លោក​យាយ​មិន​មាន​របរ​អ្វីចិញ្ចឹម​ខ្លួន​ច្បាស់លាស់​ឡើយ ក្រៅ​ពី​រំពឹង​ការ​ដាំដំណាំ​បន្តិច​បន្តួច​សម្រាប់​ហូប​ខ្លួនឯង និង​ទទួល​បាន​ការ​ជួយជ្រោម​ជ្រែង​ពី​អ្នក​ភូមិ​»។

ចំណែក​កូន​ប្រុសអកតញ្ញូ​​វិញ មិន​ត្រឹម​តែ​មិន​ដែលខ្វល់ខ្វាយនឹង​រឿ​ង​​ជីវ​ភាព​ម្តាយ​ទេ ថែម​ទាំងបាន​ទៅ​សេព​គប់​មិត្ត​ភក្តិ​ដើរ​លេង​ស៊ីផឹក​ក្រៅ​ផ្ទះ​ចោល​ម្តាយចាស់​ជរា​ទាំង​ថ្ងៃ​ទាំងយប់​ ខណៈ​ទី​ជម្រក​បែក​បាក់ ធ្លុះ​ធ្លាយស្ទើរ​តែ​ដួល​រលំ​តាម​ខ្យល់បក់​ទៅ​ហើយ​ក្តី។ ពេល​មាន​ភ្លៀង​ធ្លាក់​ខ្លាំង​ហូរ​សាច​ពេញ​ផ្ទះ គ្មាន​កន្លែងជ្រក​កោន យាយ​ សួន តូច បាន​ទៅជ្រក​ក្នុង​ទ្រុង​មាន់​ជំនួស​វិញ ដោយ​ខ្លាច​ខ្ទម​ដួល​រលំ​ដោយ​ខ្យល់​បោក​បក់​ខ្លាំង។ ​

នា​ពេល​កន្លង​មក​ខាង​អង្គការ​ពុទ្ធសាសនា​ដើម្បី​ការអប់រំ​នៃ​កម្ពុជា ព.អ.ក ធ្លាប់​បាន​នាំ​យក​នូវអំណោយ​ជា​គ្រឿង​ឧបភោគ​បរិ​ភោគ​ដើម្បី​ជា​ស្បៀង​អាហារ​ជួយ​សង្គ្រោះ​លោក​យាយ​ចាស់ជរា​រស់នៅ​ឯកាបណ្តោះ​​អាសន្ន​ និង​មាន​គម្រោង​ចង់​សាង​សង់​ផ្ទះតូច​ថ្មី​មួយ ​ជូន​ដូន​ចាស់​ដែរ​តែ​ពុំទាន់​មាន​លទ្ធភាពគ្រប់​គ្រាន់​។

ព្រះ​តេជគុណ​ ហាក់ សៀង​ហៃ ប្រធាន​អង្គ​ការ​.ព.អ.ក មាន​សង្ឃ​ដីកា​ថា៖ «អង្គការ​ពុទ្ធសាសនា​ដើម្បី​ការអប់រំ​នៃ​កម្ពុជា តែង​យក​ចិត្ត​ទុក​ដាក់ និង​ជួយ​លោក​យាយទៅ​តាម​លទ្ធភាព ជា​ស្បៀង​អាហារ រៀង​រហូតមក តែ​មិន​បាន​ជាប់​លាប់ ដោយ​សារតែ​មាន​ប្រជាពល​រដ្ឋ​ក្រីក្រ​ច្រើន​មិន​អាច​ជួយ​បាន​ច្រើន​ឡើយ»។

ព្រះតេជគុណ​ថ្លែង​ទៀត​ថា៖ «ព.អ.ក បាន​និង​កំពុង​តែចិញ្ចឹម​ជន​ចាស់​ជរា និង​ក្រីក្រ​ច្រើន​ដែរ។ មិន​ត្រឹម​តែ​ប៉ុណ្ណោះ​ក៏​មាន​ជួយ​ដល់​ក្មេង​កំព្រា​ឲ្យ​បាន​ចូល​សិក្សា​ផងដែរ»៕​

អត្ថបទគួរចាប់អារម្មណ៍