.jpg)
ក្រុមម៉ូតូសប្បុរសធម៌ KMR នាំយកអំណោយទៅជូនដូនចាស់អាយុ ៩២ ឆ្នាំ។ សហការី
ក្រុងសំរោង: សូរសំឡេងសម្រែកស្រែកពីជីវិតដ៏សែនទុរគតរបស់ដូនចាស់អាយុជិតមួយសតវត្សរ៍ ទទួលបន្ទុកចិញ្ចឹមបីបាច់ចៅទួត ភ្នែករហង់រង់ចាំចំណីចម្អែតក្រពះប្រចាំថ្ងៃ ចំនួន ៤ នាក់រួមនឹងដូនចាស់អាយុពី ៦២ ដល់ ៨៤ ឆ្នាំ ៣ នាក់ផ្សេងទៀតបានលាន់ឮដល់ក្រុមយុវជនម៉ូតូសប្បុរសធម៌ខិតខំបំបោលទោចក្រយានយន្តលើចម្ងាយផ្លូវរាប់រយគីឡូម៉ែត្រ ដើម្បីដឹកនាំយកអំណោយជាគ្រឿងឧបភោគបរិភោគសម្រាលភាពលំបាកដូនចាស់ទាំងនោះមួយគ្រា។
លោកយាយ មង ចន អាយុ ៦៤ ឆ្នាំ និងលោកយាយ មេវ សុខ អាយុ ៦២ ឆ្នាំ រស់នៅក្នុងភូមិគោកប្រាសាទ ឃុំត្រពាំងតាវ ស្រុកអន្លង់វែង ព្រមទាំងលោកយាយ ហែម និប អាយុ ៨៤ ឆ្នាំ និងលោកយាយ សមុទ្រ យ៉ៃ អាយុ ៩២ ឆ្នាំ រស់នៅភូមិបុស្ប ឃុំកូនក្រៀល ក្រុងសំរោង ខេត្ដឧត្ដរមានជ័យ បានទទួលគ្រឿងម្ហូបអាហារ ពីក្រុមម៉ូតូសប្បុរសធម៌ Khmer Mini Rider (KMR) រវាងសមាជិកមកពីខេត្ដសៀមរាប និងខេត្ដឧត្ដរមានជ័យ។
ដោយមើលឃើញពីភាពលំបាកតោកយ៉ាករបស់លោកយាយ សមុទ្រ យ៉ៃ អាយុ ៩២ ឆ្នាំ ដែលរស់នៅក្រោមដំបូលខ្ទមធ្លុះធ្លាយជាមួយកូនចាបកំព្រា ៤នាក់ ស្រី ២ នាក់ និងប្រុស ២ នាក់ អាយុ ១២ ឆ្នាំ ១០ ឆ្នាំ ៨ ឆ្នាំ និង ៦ឆ្នាំ ដោយពឹងអាស្រ័យទានពីសំណាក់អ្នកជិតខាងហុចព្រឹកហុចល្ងាច ក្រុមម៉ូតូសប្បុរសធម៌ KMR បានស្រាក់គ្នារៃអង្គាសប្រាក់បន្ដិចបន្ដួចសម្រាប់ដូនចាស់បានជួសជុលដំបូលផ្ទះ។
លោក ធន តុលា ប្រធានក្រុមម៉ូតូសប្បុរសធម៌ KMR ដែលខិតខំជិះម៉ូតូចេញដំណើរតាំងពីខេត្ដសៀមរាបចាប់ដៃគ្នាជាមួយសមាជិកដទៃប្រមាណ ៨០ ម៉ូតូ បាននិយាយថា៖ «លោកយាយ សមុទ្រ យ៉ៃ មានជីវភាពលំបាកជាងគេហើយគាត់ មានបន្ទុកចិញ្ចឹមចៅទួតប្រុសស្រី ៤ នាក់ទៀត។ ពួកគាត់រស់នៅពឹងដោយការឲ្យទានពីអ្នកជិតខាង រាល់ថ្ងៃនៅក្នុងខ្ទម ស្ទើរតែប្រក់មេឃ ជញ្ជាំងធ្លុះធ្លាយ»។
លោកបន្ដថា៖ «លោកយាយ មានវ័យ ៩២ ឆ្នាំទៅហើយ ហើយពេលនេះ ភ្នែកគាត់ស្រវាំងឡើងបាយ មើលមិនស្គាល់ទិសតំបន់ឡើយ។ គាត់គ្មានលទ្ធភាពណាចេញរកម្ហូបអាហារចិញ្ចឹមជីវភាពចៅទួតទាំង ៤ នាក់ទេ»។
លោក តុលា បានបញ្ជាក់ថា៖ «ទោះបីជាអត់បាយក្រហាយទឹកយ៉ាងណាក៏ដោយ ក៏ដូនចាស់រូបនេះមានបំណងចង់ឲ្យចៅទួតទាំង ៤ នាក់បានចូលរៀនដែរ តែក្រពេក ទើបអត់មានលទ្ធភាព»។
ក្រុមម៉ូតូបន្តដំណើរជាជួរលើផ្លូវដ៏វែងឆ្ងាយឆ្លងខេត្ត។ សហការី
ប្រធានក្រុមយុវជនលេងម៉ូតូប្លែកៗ តែមានទឹកចិត្ដមនុស្សធម៌បានឲ្យដឹងថា ដំណឹងទុរគតរបស់ដូនចាស់ទាំង ៤ ត្រូវបានផ្ដល់ឲ្យដោយលោក សរ សៀងហ៊ាង ប្រធានកាកបាទក្រហម ខេត្ដឧត្ដរមានជ័យ។
លោកបន្ថែមថា៖ «លោកក៏បានរួមដំណើរ ជូនពួកខ្ញុំចុះដល់មូលដ្ឋានដូនចាស់ក្នុងទឹកមុខរីករាយដោយមើលឃើញពីសាមគ្គីភាពរបស់ក្រុមម៉ូតូ KMR នៃយុវជនខ្មែរតែមួយ»។
ទោះបីជាធម្មជាតិមិនយោគយល់លើដំណើរជិះម៉ូតូវែងឆ្ងាយរបស់ក្រុមយុវជនដោយការបង្អុរភ្លៀងមួយមេធំពេលធ្វើដំណើរពីខេត្តឧត្ដរមានជ័យមកសៀមរាបវិញ តែក្រុមម៉ូតូនៅតែបង្ហាញភាពរីករាយ និងបន្ដដំណើរឆ្ពោះទៅមុខជានិច្ច៕
