ភ្នំពេញ: Dolphin Swimming Club Cambodia ក្លិបបង្រៀនកុមារហែលទឹកចាប់ពីអាយុ ៦ ខែ បានរៀបចំគម្រោងមនុស្សធម៌ជាលើកដំបូងនៅប្រទេសកម្ពុជាក្នុងការបណ្ដុះបណ្ដាលដល់កុមារគថ្លង់ឲ្យចេះពីវិធីរំដោះខ្លួនពីមហន្ដរាយលង់ទឹក ក្រោមជំនួយរបស់នាយកសាលារៀន SCI Education មានទីតាំងនៅប្រទេសកូរ៉េខាងត្បូង និងកាណាដា។
កុមារគថ្លង់ មកពីអង្គការគ្រួសារថ្មី សិក្សានៅវិទ្យាល័យអប់រំពិសេសច្បារអំពៅទទួលបានវគ្គបណ្ដុះបណ្ដាលក្រោមគម្រោងកម្មវិធីហែលទឹករំដោះខ្លួន «Swimming for Survival Program» បំណងឲ្យពួកគេចេះជួយខ្លួនឯងពីគ្រោះថ្នាក់លង់ទឹក រៀបចំឡើងនៅសាលាអន្ដរជាតិវ៉េសឡាញ សាខាច្បារអំពៅ ចាប់ពីថ្ងៃទី ២ ដល់ថ្ងៃទី ៣ ខែសីហា នេះ។
កុមារ ៦២ នាក់ ដែលត្រូវបានបែងចែកជា ៣ ក្រុម ដោយ ២០ នាក់រៀនហែលទឹកចាប់ពីម៉ោង ៩ ដល់ម៉ោង ១១ ព្រឹក ២០ នាក់ ចាប់ផ្ដើមពីម៉ោង ១ ដល់ម៉ោង ៣ រសៀល និង ២២ នាក់ចាប់ពីម៉ោង ៣ រសៀលដល់ម៉ោង ៥ ល្ងាច ក្នុងរយៈពេល ២ ថ្ងៃ ត្រូវបង្ហាញបង្រៀនដោយគ្រូជំនាញចំនួន ៥ នាក់ក្នុងវេន។
ជាមួយនឹងសញ្ញាបត្រទទួលស្គាល់ពី ASCTA (Australian Swim Coach and Teacher Association) ជាស្ថាប័នបង្វឹកគ្រូបង្រៀនហែលទឹកអាជីពរបស់អូស្ដ្រាលី លោក ណាត់ថាសាក់ ថាវូដុម មកពីប្រទេសថៃ មានបទពិសោធបង្រៀនហែលទឹកជាង ១៣ ឆ្នាំ និងជាគ្រូបង្រៀនកុមារហែលទឹកនៅ Dolphin Swimming Club Cambodia ជាង ៨ ខែមកនេះ គឺជាគ្រូបង្គោលក្នុងការបណ្ដុះបណ្ដាលកុមារគថ្លង់ក្នុងព្រឹត្ដិការណ៍មនុស្សធម៌នេះ។
លោក សារឿន ដូរ៉ា គីមម៉េង ជាសហស្ថាបនិកម្នាក់នៃក្លិបហែលទឹកដូលហ្វីន និយាយថា៖ «គាត់តែងតែរៀបចំព្រឹត្ដិការណ៍មនុស្សធម៌សម្រាប់កុមារក្រីក្រ ឬកុមារពិការរាប់រយនាក់ក្នុង ១ ឆ្នាំៗ»។
លោកបន្ដថា៖ «លោកមករៀបចំព្រឹត្ដិការណ៍ដូចគ្នានេះនៅកម្ពុជាដើម្បីបណ្ដុះបណ្ដាលកុមារគថ្លង់ឲ្យចេះរំដោះខ្លួនពីការលង់ទឹក។ ប៉ុន្ដែវាមិនមែនជាការបង្ហាត់បង្រៀនហែលទឹកដើម្បីយកទៅប្រកួតប្រជែងអ្វីនោះទេ។ ដូច្នេះ ការហ្វឹកហាត់រយៈពេល ២ ម៉ោងក្នុង ១ ក្រុមគ្រប់គ្រាន់ល្មមសម្រាប់សមត្ថភាពរំដោះខ្លួនពីការលង់ទឹកដោយយថាហេតុ»។
សហស្ថាបនិកវ័យ ២២ ឆ្នាំរូបនេះ លើកឡើងថា៖ «យើងសង្ឃឹមថា កម្មវិធីដំបូងនេះនឹងអាចជួយកុមារទាំងឡាយឲ្យបានរៀនពីវិធីជួយខ្លួនឯងពីការលង់ទឹកពេលជួបគ្រោះថ្នាក់ ហើយសង្ឃឹមថា យើងនឹងបន្ដរៀបចំកម្មវិធីល្អៗក្នុងការជួយសង្គមបែបនេះទៀតដើម្បីផ្ទេរចំណេះដឹងដល់កុមារខ្វះឱកាស កុមារពិការនិងកុមារកំព្រាស្គាល់ពីតម្លៃនៃកីឡាហែលទឹក»។
Dolphin បើកថ្នាក់បង្រៀនក្មេងហែលទឹកពីអាយុ ៦ ខែដល់ ៤ ឆ្នាំ ដំបូងនៅកម្ពុជាតម្លៃ ៩០ ដុល្លារក្នុង ១ វគ្គ៕