ក្រុងឡុងដ៍: និស្សិតនៅ Goldsmiths ទីក្រុងឡុងដ៍នឹងលែងមានឱកាសបានទំពាប៊ឺហ្គឺរ ក្រោយពីសាកលវិទ្យាល័យល្បីនេះប្រកាសថា ខ្លួននឹងដាក់បម្រាមលើផលិតផលពីសាច់គោទាំងអស់ដើម្បីទប់ទល់នឹងការប្រែប្រួលអាកាសធាតុ។
សាស្ដ្រាចារ្យ ហ្វ្រង់សេស ខូរន័រ ជាអ្នកដឹកនាំ Goldsmiths ថ្មីបាននិយាយថា អ្នកស្រីបានដាក់វិធានការក្ដៅនេះដើម្បីដកផលិតផលសាច់គោចេញពីបរិវេណសាលាទាំងអស់ចាប់ពីខែក្រោយ ពីព្រោះសេចក្ដីប្រកាសគ្រោះអាសន្នពីបញ្ហាអាកាសធាតុមិនអាចធ្វើតែមាត់បានឡើយ។
អ្នកស្រីបានបន្ថែមថា៖ «ទោះខ្ញុំទើបដល់សាកលវិទ្យាល័យ Goldsmiths វាច្បាស់ណាស់ថា បុគ្គលិក និងនិស្សិតយកចិត្ដទុកដាក់យ៉ាងខ្លាំងចំពោះអនាគតបរិស្ថាន និងជាអ្វីដែលពួកគេក៏បានតាំងចិត្ដជួយផងដែរ»។
សាកលវិទ្យាល័យ Goldsmiths សង្ឃឹមថាខ្លួននឹងក្លាយជាទីឋានជួយកាត់បន្ថយជាតិកាបូននៅឆ្នាំ ២០២៥ និងមិនមែនជាសាកលវិទ្យាល័យដំបូងដែលផ្លាស់ប្ដូរតារាងមុខម្ហូបក្នុងបំណងកាត់បន្ថយការបំពុលបរិស្ថាន។
សេវាកម្មអាហាររបស់សាកលវិទ្យាល័យខេមប្រ៊ីដ អត់លក់សាច់គោ ឬចៀមតាំងពីឆ្នាំ ២០១៦។ និស្សិតនៅ Goldsmiths ក៏នឹងប្រឈមការពិន័យ ១០ សេនលើការប្រើប្រាស់ប្លាស្ទិកម្ដង ពេលពួកគេប្រឡប់មកវិញវិស្សមកាលរដូវក្ដៅវិញ។
អ្នកយុទ្ធនាការបម្រែបម្រួលអាកាសធាតុ Rosie Rogers បានហៅវិធានការនេះជា «ការលើកទឹកចិត្ដ»។
សកម្មជនសន្ដិភាពបៃតងមកពីចក្រភពអង់គ្លេសរូបនេះបាននិយាយថា៖ «យើងអំពាវនាវដល់អ្នកដទៃទៀតឲ្យមានវិធានការបន្ទាន់ និងរួមទាំងការកាត់បន្ថយការវិនិយោគលើឧស្ម័ន ប្រេងគ្រប់ប្រភេទដើម្បីជាកិច្ចឆ្លើយតបនឹងគ្រោះអាសន្នលើអាកាសធាតុ»៕ HR