ក្រុងគួឡាឡាំពួ៖ការបង្អួតរុក្ខជាតិត្រចៀកដំរីពីសួនផ្កាបក្សីផ្លេមីងហ្គូក្នុងរបង បានក្លាយជាទំនោរថ្មីអំឡុងពេលជាប់បម្រាមនៃវិបត្ដិកូវីដ ១៩ នៅប្រទេសម៉ាឡេស៊ីជាទីដែលសួនច្បារតាមផ្ទះកំពុងតែបញ្ចេញសម្រស់ស្គុះស្គាយ។
អ្នកដាំផ្កាព្យាយាមប្រមាញ់ពូចផ្កាប្លែកៗដែលមានរូបភាពក្រឡេក្រឡាទាំងពណ៌ក្រហម លឿងនិងបៃតងព្រមទាំងបានចែករំលែកបង្អួតលើបណ្ដាញសង្គមផងដែរ។
អ្នកប្រមាញ់ផ្កាម្នាក់ឈ្មោះ ឡៃអ៊ីស្ទើរ ស៊ុន បានប្រាប់ AFP ពីផ្ទះក្នុងក្រុងគួឡាឡំាពួ ថា៖ «ដូចកំពុងមើលគំនូរអ៊ីចឹង។ ខ្ញុំពិតជាចូលចិត្ដស្លឹកត្រចៀកដំរីណាស់។ ការថែទាំរុក្ខជាតិទាំងនេះមានន័យថា ខ្ញុំអាចបង្វែចំណាប់អារម្មណ៍ពីរឿងស្មុគស្មាញ ហើយវាប្រសើរជាងការតាមដានពីតួលេខអ្នកឆ្លងជំងឺកូវីដ»។
រុក្ខជាតិទាំងនេះមានឈ្មោះថា «កេឡាឌី» ជាភាសាអ្នកស្រុកម៉ាឡេ តែទំនោរដាំពូជផ្កាផ្សេងៗ ដូចជា អានធូរីម ឬផ្កាបក្សីផ្លេមីងហ្គូ និងអាឡូស្យាសែន ដែលមានពូជខុសៗគ្នា រួមទាំង នាគប្រាក់ផងដែរ។
ធ្លាប់តែមានតម្លៃថោក ដោយមានតម្រូវការខ្ពស់ វាបានឡើងថ្លៃកាលពីឆ្នាំមុន ពេលបម្រាមបានតម្រូវឱ្យពលរដ្ឋម៉ាឡេស៊ីនៅតែក្នុងផ្ទះ និងអ្នកដាំផ្កាជាច្រើនចាប់ផ្ដើមបង្ហោះរូបរុក្ខជាតិសំណព្វចិត្ដលើបណ្ដាញសង្គម។
ខណៈរុក្ខជាតិខ្លះ នៅមានតម្លៃត្រឹម ២០ រីងហ្គីត (១៧ ០០០ រៀល) រុក្ខជាតិកម្រៗបំផុតអាចមានតម្លៃកើនឡើង ៦ ០០០ រីងហ្គីត (ជិត ៦ លានរៀល) ក្នុងមួយដើម។
លោក ស៊ុន បាននិយាយថា លោកចំណាយប្រាក់ជាង ២ ម៉ឺនរីងហ្គីត (៤ ៨០០ ដុល្លារ) លើការទិញរុក្ខជាតិដាំលម្អផ្ទះត្រឹមរយៈពេលមួយឆ្នាំប៉ុណ្ណោះ។
ដោដ កាស៊ីម ម្ចាស់កសិដ្ឋានបណ្ដុះរុក្ខជាតិ បានប្រាប់ AFP នៅទីក្រុង Sungai Besarចម្ងាយប្រមាណ ១០០ គីឡូម៉ែត្រភាគពាយព្យក្រុងគួឡាឡាំពួថា៖ «អំឡុងពេលជាប់បម្រាម មនុស្សនៅផ្ទះគិតតែពីរឿងតុបតែងផ្ទះរបស់ខ្លួន។ ពួកគេអាចសម្លឹងរកមើលរុក្ខជាតិប្លែកៗ ដែលអាចជួយរំសាយស្ដ្រេស»។
លោកដោដដែលជាអ្នកចូលចិត្ដសួនច្បារផងនោះបាននិយាយថាលោកចាប់ផ្ដើមលក់រុក្ខជាតិកេឡាឌីតាំងពីចុងឆ្នាំ ២០១៨ តែតម្រូវការបានផ្ទុះឡើងអំឡុងពេលវិបត្ដិកូវីដនេះ។
ស្ទើរតែពាក់កណ្ដាលនៃការច្នៃបណ្ដុះរុក្ខជាតិថ្មីៗឥឡូវប្រើរុក្ខជាតិប្រភេទនេះ ជាមួយពូជមកពីបរទេស ដូចជា ថៃ ចិន សហរដ្ឋអាមេរិក និងហូឡង់ជាដើម។
ឈរនៅក្បែររុក្ខជាតិរាប់ពាន់ផើងលោកដោដបាននិយាយថាការពេញនិយមនេះនៅតែបន្ដទោះបីជាអាជ្ញាធរចាប់ផ្ដើមបន្ធូរបន្ថយបម្រាមយ៉ាងណាក៏ដោយ។
ម៉ាឡេស៊ី ដាក់បម្រាមគោលចរណ៍លើកដំបូងកាលពីឆ្នាំមុនភ្លាមៗបន្ទាប់ពីវិបត្ដិកូវីដចាប់ផ្ដើម និងត្រូវអនុវត្ដការរឹតបណ្ដឹងម្ដងទៀតក្នុងខែមករានេះពេលរលកថ្មីបានមកដល់ តែការផ្ទុះរីករាលដាលមានសភាពយឺតៗ។
អាជ្ញាធរសុខាភិបាលបានរាយការណ៍ការឆ្លងវីរុសជាង ៣០ ម៉ឺនករណី និងស្លាប់ជាង ១ ពាន់នាក់៕ AFP/HR