.jpg)
ដំរីពពោះកូនមួយក្បាលត្រូវបានសម្លាប់ក្នុងប្រទេសឥណ្ឌា ក្រោយពីបានស៊ីផ្លែឈើញាត់គ្រឿងផ្ទុះ។ រូបថត AFP
ក្រុងញូវដែលី: មន្ដ្រី បានឲ្យដឹងកាលពីថ្ងៃពុធថា ដំរីពពោះកូនមួយក្បាលត្រូវបានសម្លាប់ក្នុងប្រទេសឥណ្ឌា ក្រោយពីបានស៊ីផ្លែឈើញាត់គ្រឿងផ្ទុះ ដែលបង្កជាកំហឹងលើការប្រើប្រាស់អន្លាក់ការពារដំណាំ និងផ្ទះសម្បែង។
ដំរីព្រៃដើរលុកលុយក្នុងភូមិក្បែរឧទ្យានជាតិជ្រលងសម្ងាត់ ភាគខាងត្បូងរដ្ឋកេរ៉េឡា កាលពីថ្ងៃពុធ នៅពេលវាស៊ីផ្លែឈើទុំ ដែលជឿថាជាផ្លែម្នាស់ ញាត់គ្រឿងផ្ទុះ បានបង្ករបួសមាត់យ៉ាងធ្ងន់ធ្ងរ។ នេះបើយោងតាមក្រុមមន្ដ្រីឥណ្ឌា។
ប្រធានឆ្មាំអនុរក្សសត្វព្រៃរដ្ឋកេរ៉េឡា ស៊ូរ៉េនត្រា គូម៉ា បានប្រាប់ AFP ថា៖ «យើងកំពុងស៊ើបអង្កេតពីប្រភេទគ្រឿងផ្ទះ ព្រមទាំងចំណីដែលត្រូវបានផ្ដល់ឲ្យដំរីញីនេះ»។
លោក គូម៉ា បានបន្ដថា អ្នកភូមិក្នុងតំបន់តែងតែប្រើផាវ ឬគ្រឿងផ្ទះផ្សេងទៀតញាត់ក្នុងផ្លែម្នាស់ ដែលមានមុខងារដូចគ្រាប់មីនប្រើសម្ពាធ ដើម្បីការងារស្រែពីសត្វព្រៃបំផ្លាញ។
ឧប្បត្ដិហេតុស្រដៀងគ្នាមួយទៀត បានកើតឡើងកាលពីមួយខែមុន នៅពេលដំរីញីមួយក្បាលត្រូវបានប្រទះឃើញរងរបួសមាត់ធ្ងន់ក្នុងស្រុកក្បែរខាង។
វាក៏បានស្លាប់ដោយសាររបួសនោះផងដែរ។
ដំរីនៅតែត្រូវបានពលរដ្ឋឥណ្ឌាមួយចំនួនប្រើប្រាស់ជាសត្វសម្រាប់ការដឹកជញ្ជូន។ រូបថត AFP
នៅលើបណ្ដាញសង្គម អ្នកប្រើប្រាស់នាំគ្នាបញ្ចេញកំហឹងក្រោយពីមន្ដ្រីរុក្ខបង្ហោះលើហ្វេសប៊ុក កាលពីថ្ងៃសៅរ៍ ទទួលបានប្រតិកម្មជិត ១ ម៉ឺនសំណេរ។
មហាន់ គ្រីស្នាន់ បានសរសេរថា៖ «ដំរីញីនោះមិនបានប៉ះពាល់ដល់មនុស្សណាម្នាក់ទេ ទោះពេលវារត់ទាំងក្ដីឈឺចាប់តាមដងផ្លូវក្នុងភូមិយ៉ាងណាក៏ដោយ»។
ឥណ្ឌាបានបាត់បង់ព្រៃឈើពីគម្រោងពង្រីកទីក្រុងនាពេលប៉ុន្មានទសវត្សរ៍ចុងក្រោយ ដោយបង្ខំសត្វព្រៃមកកាន់តែកៀកភូមិឋានមនុស្ស ដែលជាលទ្ធផល វាបង្កើនហានិភ័យរវាងមនុស្ស និងសត្វ។
មនុស្សប្រមាណ ២ ៣៦០ នាក់ ត្រូវបានសម្លាប់ពីការវាយប្រហារដោយសត្វដំរី ចន្លោះឆ្នាំ ២០១៤ និងឆ្នាំ ២០១៩។ នេះបើយោងតាមទិន្នន័យកត់ត្រាដោយរដ្ឋាភិបាល។
ដំរីប្រមាណ ៥១០ ក្បាល បានស្លាប់អំឡុងពេលដូចគ្នា រួមមាន ៣៣៣ ក្បាលស្លាប់ដោយសារឆក់ខ្សែភ្លើង និងប្រមាណ ១០០ ក្បាលទៀត រងគ្រោះព្រោះការបរបាញ់ និងថ្នាំពុល៕ AFP/HR
រូបភាពខាងក្រោមនេះ បង្ហាញពីទំនាក់ទំនងរវាងសត្វដំរី និងពលរដ្ឋឥណ្ឌា៖
ដំរីត្រូវបានពលរដ្ឋឥណ្ឌាខ្លះគោរពស្រឡាញ់ តែក៏ជាសត្វដែលមនុស្សមួយចំនួនទៀតបារម្ភខ្លាចបង្កគ្រោះថ្នាក់ដល់ជម្រក និងដំណាំ។ រូបថត AFP
រូបភាពកាលបីចុងឆ្នាំ ២០១៧ បង្ហាញ អ្នកភូមិឥណ្ឌានាំគ្នាឈរមើលហ្វូងដំរីព្រៃ ៤៦ ក្បាល ដើរកាត់ដំណាំតែ នៅចម្ងាយ ៣៨ គីឡូម៉ែត្រ ពីក្រុង ស៊ីលីហ្គូរី។ រូបថត AFP
ហ្វូងដំរីដើរឆ្លងកាត់ផ្លូវថ្នល់នៅប្រទេសឥណ្ឌា។ រូបថត AFP
ដំរីនៅតែត្រូវបានពលរដ្ឋឥណ្ឌាមួយចំនួនប្រើប្រាស់ជាសត្វសម្រាប់ការដឹកជញ្ជូន។ រូបថត AFP
រូបភាពកាលបីចុងឆ្នាំ ២០១៧ បង្ហាញ អ្នកភូមិឥណ្ឌានាំគ្នាឈរមើលហ្វូងដំរីព្រៃ ៤៦ ក្បាល ដើរកាត់ដំណាំតែ។ រូបថត AFP
អ្នកភូមិឥណ្ឌាសម្លឹងមើលសត្វដំរីរងរបួសដោយត្រូវរថភ្លើងបុក កាលពីខែកញ្ញា ឆ្នាំ ២០១៩។ រូបថត AFP
រូបឆ្វេង : ដំរីត្រូវបានគេចាក់ថ្នាំសណ្ដំ ដោយសារតែវាបានសម្លាប់មនុស្ស ៥ នាក់នៅឥណ្ឌា។ រូបស្តាំ : ហ្វូងដំរីបំផ្លាញដំណាំពលរដ្ឋឥណ្ឌា។ រូបថត AFP
អ្នកភូមិឥណ្ឌាបួងសួងដល់សពដំរីញី ២ ក្បាល ដែលងាប់ដោយសារឆក់ខ្សែភ្លើង នៅឧទ្យានដំណាំតែ កាលពីខែកញ្ញា ឆ្នាំ ២០១៦។ រូបថត AFP
