The Phnom Penh Post Search

Search form




Logo of Phnom Penh Post newspaper Phnom Penh Post - ឌីជេ​បរទេស​បើក​បង្រៀន​ជំនាញ​​ធ្វើ​ឌីជេ​អាជីព​នៅ​រាជធានី​ភ្នំពេញ

ឌីជេ​បរទេស​បើក​បង្រៀន​ជំនាញ​​ធ្វើ​ឌីជេ​អាជីព​នៅ​រាជធានី​ភ្នំពេញ

DJ Saint Vincent កំពុង​ធ្វើការ​បង្ហាត់​បង្ហាញ​ដល់​សិស្ស​ដែល​ចង់​ចាប់​យក​ជំនាញ​ឌីជេ​។
DJ Saint Vincent កំពុង​ធ្វើការ​បង្ហាត់​បង្ហាញ​ដល់​សិស្ស​ដែល​ចង់​ចាប់​យក​ជំនាញ​ឌីជេ​។ រូបថត សហការី

ឌីជេ​បរទេស​បើក​បង្រៀន​ជំនាញ​​ធ្វើ​ឌីជេ​អាជីព​នៅ​រាជធានី​ភ្នំពេញ

ភ្នំពេញ: គ្រូ​អង់គ្លេស​ម្នាក់ និង​ឌីជេជើស​ចាស់​អាមេរិក​ម្នាក់ បាន​បើក​សាលាបង្រៀន​ឌីជេ​លើក​ដំបូង​ក្នុង​រាជធានី​ភ្នំពេញ​ក្នុង​គោលបំណង​ចង់​បង្កើត​ Tiestos និង​ Skrillexes នា​ពេល​អនាគត​នៅ​កម្ពុជា​។

ស្ទេវ ម៉ាណូវ មកពី​ភេនស៊ីលវ៉ានៀរ បាន​និយាយ​ថា លោក​ចង់​​ចែករំលែក​ជំនាញ​នេះ​ដើម្បី​ជា​ប្រយោជន៍​ដល់​ឧស្សាហកម្ម​កម្សាន្ដ​ក្នុង​ស្រុក​ដែល​មិន​ពេញនិយម​ធ្វើ​ជំនួញ​លើ​ប្រភេទ​តន្ដ្រី​អគ្គិសនី​នេះ​។

លោក ឲ្យ​ដឹង​ថា​៖ «​មនុស្ស​គ្រប់​រូប​ស្ដាប់​តន្ដ្រី​ដដែលៗ ពីព្រោះ​មាន​តែ​ប៉ុណ្ណឹង​។ ពួកគេ​មិន​ស្គាល់​តន្ដ្រី​ប្រភេទ​ផ្សេងៗ​ទៀត​ឡើយ​»។

នៅ​ក្បែរ​ហាង KTH Power Mall ទល់​មុខ​ស្ថានទូត​ចិន គ្រូ​បង្រៀន ៨ នាក់​នៅ​ Cambodia DJ Academy បាន​បង្រៀន​មេរៀន​មួយ​ម្ដងៗ​សម្រាប់​ជំនាញ​ឌីជេ​គ្រប់​កម្រិត​។ ​កម្រិត​ដំបូង លោក វីត បាន​និយាយ​ថា វគ្គ​នេះ​មាន​គោលបំណង​ចង់​ណែនាំ​អំពី​មូលដ្ឋានគ្រឹះ​នៃ​​ឌីជេ​រយៈពេល ១២ ម៉ោង​។

ដោយ​យល់​ថា សាលា​ឌីជេ​នេះ​ចង់​បំពេញ​បំណង​អ្នក​រៀន​យក​ជា​អាជីព និង​ការ​កម្សាន្ដ​​ លោក វីត បាន​ឲ្យ​ដឹង​ថា​៖ «​​ពេល​ចប់​វគ្គ​សិក្សា ១២ ម៉ោង អ្នក​នឹង​អាច​យល់​ដឹង​ថា ពេល​មើល​​ឃើញ​ឌីជេ​ម្នាក់ លោក​អ្នក​នឹង​ដឹង​ថា ពួកគេ​កំពុង​ធ្វើអ្វី​»។

លោក នីវីត ទេព ជា​សហស្ថាបនិក​ក្លិប​កម្សាន្ដ Pontoon ដែល​លោក​បាន​គាំទ្រ​ដល់​សាលាបង្រៀន​ជំនាញ​ឌីជេ​នេះ​។
លោក នីវីត ទេព ជា​សហស្ថាបនិក​ក្លិប​កម្សាន្ដ Pontoon ដែល​លោក​បាន​គាំទ្រ​ដល់​សាលាបង្រៀន​ជំនាញ​ឌីជេ​នេះ​។ រូបថត សហការី

ជាមួយ​តម្លៃ ២៤០ ដុល្លារ សម្រាប់​រយៈពេល​រៀន ១២ ម៉ោង និង​ការ​អនុវត្ដ​ដោយ​ឥត​គិត​ថ្លៃ លោក​បន្ថែម​ថា​៖ «យើង​បង្រៀន​សិស្ស​គ្រប់​វ័យ និង​​គ្រប់​ជាតិសាសន៍​ទាំងអស់​ដែល​​ចូលចិត្ដ​តន្ដ្រី​ទិចណូឡូជី និង​អ្នក​ដែល​ចង់​បង្កើន​សំឡេង​តន្ដ្រី​ដោយ​ឯង​ជា​ជាង​ស្ដាប់​តន្ដ្រី​ស្រាប់​»។

ក្រុម​គ្រូបង្រៀន​ទាំងនេះ​បញ្ជាក់​អំពី​សារៈសំខាន់​នៃ​ការ​បង្រៀន​​ជំនាញ​ឌីជេ​​មូលដ្ឋាន​ដែល​កុំ​​ឲ្យ​ពួកគេ​ចេះ​តែ​ប្រើ​ឧបករណ៍​ស្វ័យប្រវត្តិ​ងាយៗ​។

លោក អេនថូនី វីត បញ្ជាក់​ថា​៖ «អ្នក​​អាច​ទិញ​ម៉ាស៊ីន​បញ្ជា​មួយ​ដោយ​ភ្ជាប់​ជាមួយ​កុំព្យូទ័រ និង​គ្រាន់តែ​ចុច​ប៊ូតុង​តែ ២ ឬ៣ ជា​ការ​ស្រេច​។ ប៉ុន្ដែ​ ភាព​ងាយស្រួល​ពេក​អាច​បង្ក​គ្រោះអាសន្ន បើ​សូហ្វវែរ​ជួប​បញ្ហា​រអាក់រអួល»។

ក្លិប​រាត្រី​ក្នុង​ក្រុង​បាន​សម្លឹង​ថ្នាក់​រៀន​​ឌីជេ​នេះ​ទុក​រួច​ហើយ​។ Nivit “DJ Illest” Tep ជា​សហស្ថាបនិក Pontoon ក្លិប Duplex និង​ Epic ​បាន​និយាយ​ថា លោក​សង្ឃឹម​ថា ថ្នាក់​រៀន​ជំនាញ​នេះ​នឹង​អាច​បង្កើន​សមត្ថភាព​ឌីជេ​នៅ​កម្ពុជា​។

លោក ទេព បាន​ឲ្យ​ដឹង​ថា​៖ «​បើ​លោក​អ្នក​ចង់​អភិវឌ្ឍ​ជំនាញ​ផ្នែក​តន្ដ្រី អ្នក​​ប្រាកដ​ជា​ត្រូវការ​ឌីជេ​ ហើយ​​ឌីជេ​ត្រូវ​បាន​ចំណេះដឹង​ពិតប្រាកដ​។ ខ្ញុំ​គិត​ថា យើង​មាន​ក្រុម​ឌីជេ​ដែល​មាន​ដំណេះដឹង​ហើយ ហើយ​សាលា​នេះ​អាច​ជួយ​ឌីជេ​ថ្មីៗ​របស់​ក្លិប​»។

ខណៈ​ពេល​ដៃគូ​របស់​លោក ម៉ាណូវ លោក អេនថូនី វីត ដែល​បាន​បើក​វគ្គ​បណ្ដុះបណ្ដាល​ជំនាញ​ទំនាក់ទំនង​ឆ្លង​វប្បធម៌​ក្នុង​ទីក្រុង​ឡុងដ៍ និយាយ​ថា លោក​មិន​ចង់​លក់​ដូរ​ឧបករណ៍​តន្ដ្រី​​ទៅ​យុវជន​កម្ពុជា​ទេ ដោយ​លោក​គ្រាន់តែ​ណែនាំ​សម្ភារ​តន្ដ្រី​មួយ​ចំនួន​សម្រាប់​សិក្សា​ដល់​ពួកគេ​ប៉ុណ្ណោះ​។

លោក បាន​លើក​ឡើង​ថា​៖ «​យើង​ស្វាគមន៍​អ្នក​ដែល​មាន​ឧបករណ៍​ខ្លួនឯង ដែលរៀន​ជាមួយ​យើង ពួកគេ​នឹង​ចេះ​បង្កើត​សំឡេង​ថ្មីៗ។​ វា​សុទ្ធតែ​ជា​គំនិត​ច្នៃប្រឌិត​របស់​យើង​ផ្ទាល់​»។

ក្រៅពី​នេះ លោក Ritchie បាន​និយាយ​ថា សិស្ស​ទាំងអស់​ត្រូវតែ​មាន​​ចិត្ដ​ស្រឡាញ់​តន្ដ្រី​ដែល​ខ្លួន​លេង។

លោក Ritchie បាន​បញ្ជាក់​ថា​៖ «អ្នក​នឹង​ចូលចិត្ដ​នូវ​អ្វី​ដែល​ខ្លួន​បាន​បង្កើត បើ​មិន​អ៊ីចឹង អ្នក​ជា​មនុស្ស​គ្មាន​បេះដូង​ទេ​»៕ HR

អត្ថបទគួរចាប់អារម្មណ៍