ភ្នំពេញ៖ ជាមួយជក់ខ្យល់បាញ់ពណ៌ ម្សៅ និងសម្ភារច្នៃប្រឌិតឥតព្រំដែន អ្នកជំនាញផាត់មុខជនជាតិខ្មែរ អ្នកនាង ឌូ ពុទ្ធម៉ូលីតា បានប្រើជំនាញផាត់មុខបីដូចវេទមន្តប្រែកាឡា ធ្វើឲ្យតារាភាពយន្ត និងម៉ូដែលបរទេស ក្លាយជាតួអង្គសត្វ និងមនុស្សចម្លែកយ៉ាងជាក់នឹងភ្នែក។
មុនដំណើរហោះហើរទៅកាន់ដែនដីហូលីវូដ អ្នកអាជីពផាត់មុខវិស័យភាពយន្តរហស្សនាម Apple រូបនេះ បានធ្វើដំណើរលើវិថីពោរពេញដោយភាពភ្ញាក់ផ្អើល។
ជាមួយស្នាដៃផាត់មុខក្នុងខ្សែភាពយន្តក្នុងស្រុក និងហូលីវូដដល់ទៅជាង ៣០ រឿង អ្នកនាង Apple បាននិយាយពីក្ដីស្រឡាញ់អាជីពផាត់មុខប្រែកាយនេះថា៖ «រាល់យប់ខ្ញុំតែងចំណាយពេលរៀន ៤ ទៅ ៥ ម៉ោង តែងមុខខ្លួនឯងយ៉ាងរីករាយ។ ខ្ញុំក៏ចូលចិត្តក្នុងការផ្លាស់ប្ដូរខ្លួនឯងទៅជាម្នាក់ផ្សេងទៀត បូករួមការតែងជាឈាម និងមុខដ៏គួរឲ្យភ័យរន្ធត់»។
ជាអ្នកខេត្តស្ទឹងត្រែង Apple ដើមឡើយជានិស្សិតអក្សរសាស្រ្តអង់គ្លេសនៅសាកលវិទ្យាល័យបញ្ញាសាស្រ្ត។ ប៉ុន្តែនៅឆ្នាំទី ៤ នាងស្រាប់តែសម្រេចចិត្តបោះបង់ការសិក្សា ដើម្បីសម្រេចក្ដីសុបិនក្លាយជាអ្នកសិល្បៈផាត់មុខអាជីព។ ការងារដំបូង ដែលនាងទទួលបាន គឺកិច្ចការប្រែកាយតួសម្រាប់ភាពយន្តហ្សំប៊ីដំបូងនៅកម្ពុជា គឺរឿង «រត់» តាមរយៈការណែនាំពីមិត្តភក្ដិជាផលិតករ។
Apple បានរំឭកប្រាប់ ភ្នំពេញ ប៉ុសិ៍្ត ថា៖ «កាលនោះ ខ្ញុំគ្មានចំណេះដឹងផ្នែកផាត់មុខក្នុងកុនបែបនេះទេ តែខ្ញុំក៏ទទួលយ៉ាងរីករាយ។ រហូតដល់ឆ្នាំ ២០១២ ខ្ញុំក៏បានបង្កើតផេកបង្ហោះរូបដែលខ្ញុំបានផាត់គូរលើខ្លួនឯង ពេលនោះខ្ញុំទទួលបានការគាំទ្រជាច្រើនពីមិត្តភក្តិទាំងខ្មែរ និងបរទេស»។
ទេពកោសល្យផាត់មុខ ចំណេះដឹងភាសាអង់គ្លេស គួបផ្សំនឹងបណ្ដាញទំនាក់ទំនងបាននាំឲ្យ Apple ក្ដាប់បានការងារជាច្រើនមិនថាក្នុងវិស័យភាពយន្ត បង្ហាញម៉ូដ នៅក្នុងនិងក្រៅប្រទេសនោះទេ។
នាងថែមទាំងមានឱកាសក្នុងការរួមការងារក្នុងភាពយន្តដឹកនាំដោយកំពូលតារាហូលីវូដ អេនជេលីណា ជោលី «មុនដំបូងគេសម្លាប់ឪពុកខ្ញុំ» នៅក្នុងឆ្នាំ ២០១៦ ផងដែរ។
នាងបាននិយាយថា៖ «ដោយទទួលបានការលើកទឹកចិត្តពីប្រធានធំផ្នែកផាត់មុខ ក្នុងរឿងនេះ ឲ្យទៅរៀនបន្តនៅអាមេរិក ឬក៏អង់គ្លេស ខ្ញុំក៏ព្យាយាមរហូតទទួលបានអាហារូបករណ៍ទៅរៀននៅសហរដ្ឋអាមេរិកក្នុងឆ្នាំ ២០១៧ នៅសាលា Cinema Makeup School និងបញ្ចប់ការសិក្សានៅឆ្នាំ ២០១៨»។
ក្រោយបញ្ចប់ការសិក្សា Apple បានប្រឡូកកិច្ចការជាមួយក្រុមការងារហូលីវូដ ផ្ដើមពីការស្ម័គ្រចិត្តឥតប្រាក់កម្រៃ ហើយព្យាយាមបំពេញការងារយ៉ាងផ្ចិតផ្ចង់បំផុត។
អ្នកជំនាញផាត់មុខវ័យ ២៨ ឆ្នាំរូបនេះបានបញ្ជាក់ថា៖ «ទាល់តែយើងមានសម្ថភាពតាមស្តង់ដារបស់គេ ទើបការងារយើងទទួលបានការទទួលស្គាល់។ បើសិនជាចង់ធ្វើអ្នកផាត់មុខអន្តរជាតិ អ្នកត្រូវតែបើកចិត្តឲ្យទូលាយសម្រាប់កិច្ចការថ្មីៗ និងបន្តអភិវឌ្ឍខ្លួនឯងជានិច្ច»។
ក្រោយពីពុះពារកសាងស្នាដៃ អ្នកនាង Apple បានប្រាប់ថា៖ «សព្វថ្ងៃខ្ញុំមានមនុស្សជាច្រើន ទាក់ទងមកទាំងតាមទូរស័ព្ទ និងអ៊ីមែល»។
នាងរៀបរាប់ថា៖ «ខ្ញុំទទួលការងារបានប្រហែលជា ១០ ទៅ ១៥ រឿងនៅអាមេរិកមានដូចជា Judgement Call, Airport Security Squad, Lisa and Liza, Harana, The Wall និងជាច្រើនទៀត»។
ការផាត់មុខតួអង្គរបស់នាងភាគច្រើន កើតចេញពីភាពច្នៃប្រឌិតក្រោយឥទ្ធិពលធម្មជាតិ សត្វព្រៃ បរិស្ថាន ជីវិតសត្វនៃមហាសាគរ ស្ថាបត្យកម្ម វប្បធម៌ខ្មែរ និងអ្វីៗគ្រប់យ៉ាងដែលនៅជុំវិញនាង។
ដើម្បីប្រែក្លាយមនុស្សទៅជាតួអង្គក្នុងក្ដីស្រមៃដូចពិតៗ អ្នកនាង Apple បានប្រាប់ថា៖ «នៅក្នុងសិល្បៈផាត់មុខខ្ញុំពេលខ្លះគូរដោយដៃ ពេលខ្លះខ្ញុំប្រើថ្នាំបាញ់ពណ៌ ប៉ុន្តែខ្ញុំផ្សំសម្ភារផ្សេងទៀតដែរ។ វាអាចជាអេប៉ុង ក្រដាសផ្កាជ័រ ឬថ្នាំពណ៌»។
យ៉ាងណាមិញ នាងបញ្ជាក់ថា៖ «កិច្ចការនេះចំណាយពេលយូរ ប៉ុន្តែពេលធ្វើកិច្ចការជាមួយម៉ូដែល ឬតួអង្គភាពយន្ត ខ្ញុំព្យាយាមធ្វើវាឲ្យលឿនបំផុតតាមដែលអាចធ្វើទៅបាន ដោយការផាត់មុខជាសត្វធម្មតាត្រូវចំណាយ ៤ ម៉ោងយូរបំផុត»។
ទន្ទឹមនឹងការសាងកេរ្តិ៍ឈ្មោះជាអ្នកសិល្បៈផាត់មុខនៅហូលីវូដ Apple ក៏មានគំនិតបំផុស និងចែករំលែកជំនាញដ៏កម្រនេះតាមរយៈការបណ្ដុះបណ្ដាលនៅទឹកដីកំណើតផងដែរ។
អ្នកអាជីពផាត់មុខវិស័យភាពយន្តរូបនេះបានប្រាប់ថា៖ «បន្ទាប់ពី Covid-19 ចប់ ខ្ញុំគ្រោងនឹងត្រលប់ទៅបើកសាលារៀននៅប្រទេសកម្ពុជា។ ខ្ញុំសង្ឃឹមថា នឹងអាចធ្វើជាស្ពានរវាងប្រទេសទាំង ២ តាមរយៈការនាំមនុស្សពីហូលីវូតមកបង្រៀននៅទីនេះ និងនាំបងប្អូនកម្ពុជាទៅរៀននៅសហរដ្ឋអាមេរិក ប្រសិនបើពួកគេចង់រៀនបន្ត»៕