.jpg)
សារពិធីការិនី និងតារាសម្ដែង ណា សាឌី បញ្ជាក់ពីទំនាក់ទំនងនឹងលោក ហ៊ុន ម៉ានី។ ហ្វេសប៊ុក
ភ្នំពេញ: ក្នុងសារអាស្រូវស្នេហ៍ទម្លាយតាមបណ្តាញសង្គម បែបជាសម្លកំពឹស អស់អ្នកសិល្បៈល្បីៗទាំងហ្វូង ដឹកញីស៊ីឈ្មោលឲ្យមន្ត្រីធំៗ ក្នុងនោះ ស្រីស្រស់កូនកាត់ខ្មែរ-ថៃ សម្រស់ក្មេងខ្ចីល្វក់កំពុងរីកចាយក្លិនលើវិថីសិល្បៈក្នុងអាជីពជាពិធីការិនីទូរទស្សន៍បាយ័ន កញ្ញា ណា សាឌី ហាក់ទទួលបានការចាប់អារម្មណ៍ខ្លាំងពីសំណាក់មជ្ឈដ្ឋានសង្គម ផ្សំនឹងពាក្យចចាម-អារ៉ាមថា នាងគឺជាស្ត្រីស្នេហ៍លួចលាក់របស់កូនប្រុសនាយករដ្ឋមន្ត្រីគឺលោក ហ៊ុន ម៉ានី ។
ក្នុងដំណើរជីវិតសិល្បៈ ក្រោមទង់ជ័យ ហ្រ្វេសស៊ី ហ្គើល ឆ្នាំ ២០១៥ កញ្ញា ណា សាឌី ដែលមានឈ្មោះ ហៅក្រៅថា ក្វាន់ៗ កូនកាត់ខ្មែរ-ថៃ រូបនេះបានវិវឌ្ឍខ្លួនពីអ្នកអានព័ត៌មាននៅទូរទស្សន៍ប៉ុស្តិ៍បាយ័ន មកធ្វើជាពិធីការិនី កម្មវិធី «តន្ត្រីខារ៉ាបាវ» និង «ពិភពរីករាយ»។
កញ្ញា ណា សាឌី ក៏ជាតារាថតស្ពតពាណិជ្ជកម្មម្នាក់ដ៏គួរឲ្យចាប់អារម្មណ៍ផងដែរ។ ប៉ុន្តែថែមលើឱកាសថតភាពយន្តភាគជាច្រើនរឿងចាក់បញ្ចាំងក្នុងកញ្ចក់ទូរទស្សន៍ ដែលនាងធ្លាប់អានព័ត៌មាននោះ មានដូចជារឿង «សុបិនយុវវ័យ» «ព្យុះជីវិតចិត្តអ្នកលេង», «មន្តស្នេហ៍លេខា» និងរឿង «ផ្លូវមរណៈ» ជាដើម។
ខណៈកេរ្តិ៍ឈ្មោះសិល្បៈស្ទុះឡើង នាងក៏ត្រូវបានផលិតករជាច្រើនទំនាក់ទំនងសុំឲ្យថតសម្តែង តែបែរជាត្រូវតារាស្រីកូនកាត់ខ្មែរថៃរូបនេះប្រកាសបិទការលក់កាយវិការមុខកាមេរ៉ា លើផ្នែកអាជីវកម្មថតភាពយន្ត ដែលនាំឲ្យមានមន្ទិលជាច្រើនលើកឡើង ភ្លាមៗថា៖ «តារាស្រីវ័យ ២៣ ឆ្នាំ ប្រសូតការប្រឡងស្រីស្អាតឆ្នាំ ២០១៥ រូបនេះ ទំនងជាមានគំនាបពីម្ចាស់ស្នេហ៍បង្ខំចិត្តឲ្យនាងដកខ្លួនចេញពីការសម្តែងទាំងប្រជាប្រិយ ភាពកំពុងតែហក់ឡើងខ្លាំងបែបនេះ»។
យ៉ាងណាមិញក្រោមហេតុផលដោះស្រាយ ពីការមិនទទួលថតភាពយន្ត គេចពីឈុតឱបថើបស្រើបស្រាលនោះ ត្រូវបាន កញ្ញា ណា សាឌី ក៏លើកហេតុផលថា ចង់ពង្រឹងអាជីពពិធីការិនី និងអាចរកផលកម្រៃពីអាជីពនេះដល់ចាស់នោះ មិនទាន់បានប៉ុន្មានផង ក៏ស្រាប់តែត្រូវបានគេទម្លាយថា «តារាស្រីល្បីមានសម្ផស្សមុខទាក់ទាញ និងជាកូនកាត់ថៃរូបនេះ មានស្នេហាលួចលាក់ជាមួយនឹងកូននាយករដ្ឋមន្ត្រី គឺលោក ហ៊ុន ម៉ានី »។
ក្នុងសារទម្លាយទំនាក់ទំនងស្នេហ៍ជាមួយកូនប្រុសនាយករដ្ឋមន្ត្រី លើជំនួបស្នេហាត្រីកោណនោះ ក្នុងបណ្តាញសង្គមក៏បង្ហាញដែរថា «តារាស្រីម្នាក់នេះក៏បានធ្វើឲ្យបុរសដែលជាមន្ត្រីធំរូបនេះងប់ងុលស្នេហ៍នាងខ្លាំងណាស់ដែរ ហើយថែមទាំងបានបន្សល់ទុកស្លាកស្នាមអនុស្សាវរីយ៍ពីស្នាមខាំរបស់បុរសម្ចាស់ស្នេហ៍នេះនៅ លើខ្លួនប្រាណនាង និងជើងទៀតផង»។
បើទោះជាយ៉ាងណា កញ្ញា ណា សាឌី នៅមិនបានបកស្រាយឲ្យបានក្បោះក្បាយដើម្បីលាងមន្ទិលស្នេហ៍អាស្រូវក្នុងវ័យខ្លួនដ៏ក្មេងខ្ចីនោះដែរ។
កញ្ញា ណា សាឌី បានត្រឹមតែសរសេរសារបង្ហោះជាសាធារណៈនៅក្នុងគណនីហ្វេសប៊ុករបស់នាងថា៖ «ខ្ញុំ ណា សាឌី សូមធ្វើការបដិសេធចំពោះព័ត៌មាន ដែលថា «ខ្ញុំមានទំនាក់ទំនងស្នេហាជាមួយ ឯកឧត្ដម ហ៊ុន ម៉ានី»។
ប៉ុន្តែក្នុងសារនោះ ស្រីស្រស់ ណា សាឌី ក៏បានទទួលស្គាល់ពីទំនាក់ទំនងស្និទ្ធស្នាល រាប់អានគ្នាបែបមិត្តភាពជាមួយកូនប្រុសនាយករដ្ឋមន្ត្រីរូបនេះផងដែរ។
ទាំងមិនបង្ហាញប្រតិកម្មតបតនោះ ពិធីការិនី និងតារាសម្ដែង ណា សាឌី ក៏បានបញ្ជាក់ផងដែរថា៖ «ខ្ញុំ និង ឯកឧត្ដម ហ៊ុន ម៉ានី គ្រាន់តែជាមិត្តភក្តិធម្មតាប៉ុណ្ណោះ មិនមានអីលើសហ្នឹងទេ។ ខ្លួនខ្ញុំមិនមានទំនាក់ទំនងពិសេសអ្វីនោះឡើយ ពោលគឺគ្រាន់តែជាមិត្តភក្តិតែប៉ុណ្ណោះ»៕
