ភ្នំពេញ៖ បណ្តុំរូបភាពនៃក្រុមតន្រ្តីករចាប៉ីដងវែង និងក្រុមនាដកា សហការរួមគ្នាបង្កើតស្នាដៃថ្មីមួយឈ្មោះ «ចាប៉ីរឿងសុវណ្ណសាម» ដោយកំណត់យកឧបករណ៍តន្រ្តីបុរាណចាប៉ីដងវែងធ្វើជាមូលដ្ឋាន។
បើយោងទៅតាមគេហទំព័រផ្លូវការឈ្មោះ «Cambodia Cinema Department» បានបង្ហោះសារថា៖ «សកម្មភាពការហាត់សមចាប៉ីរឿងសុវណ្ណសាម។ ចាប៉ីរឿង គឺជាទម្រង់សិល្បៈល្ខោនមួយបែប ដែលក្រសួងវប្បធម៌ និងវិចិត្រសិល្បៈទើបបានស្រាវជ្រាវ និងបង្កើតឡើងដោយឈរលើមូលដ្ឋានចាប៉ីជាគោល និងរួមផ្សំជាមួយការសម្តែងក្បាច់រាំ។ ខណៈទស្សនីយភាពនេះ គ្រោងនឹងធ្វើការផ្សាយផ្ទាល់តាមផេកផ្លូវការរបស់ក្រសួងវប្បធម៌ និងវិចិត្រសិល្បៈ នាព្រឹកថ្ងៃសៅរ៍ទី ២៣ ខែ ឧសភា ឆ្នាំ ២០២០ វេលាម៉ោង ៩:០០»។
លោក សុវណ្ណ ពាងពីរ គឺជាតន្រ្តីករចាប៉ីដងវែង ដែលបានប្រកបអាជីពនេះតាំងពីលោកបានក្លាយខ្លួនជាម្ចាស់ជយលាភីលេខ ១ នៃការប្រឡងចាប៊ីដងវែងថ្នាក់ជាតិនៅឆ្នាំ ២០១៥ មានស្រុកកំណើតនៅភូមិស្មាច់ ឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ និងលោក ជ័យ សូដា រស់នៅភូមិរពាក់ ឃុំឈ្នួរមានជ័យ ស្រុកព្រះនេត្រព្រះ ខេត្តបន្ទាយមានជ័យ គឺជាជយលាភីលេខ ៥ នៃការប្រឡងចាប៉ីដងវែងថ្នាក់ជាតិឆ្នាំ ២០១៧។ លោកទាំង ២ ក៏ទើបទទួលបានចាប៉ីដងវែងម្នាក់ ១ គ្រឿង ពីអគ្គនាយកដ្ឋានបច្ចេកទេសវប្បធម៌កាលពីថ្ងៃទី ១៤ ខែ ឧសភា ឆ្នាំ ២០២០ កន្លងមក និងបានមកចូលរួមជាមួយអ្នករបាំក្នុងការថតផលិតចាប៉ីរឿងសុវណ្ណសាមផងដែរ។
ដោយសារក្តីស្រឡាញ់ខ្លាំងចំពោះតន្រ្តីចាប៉ីដងវែងនេះ លោក សុវណ្ណ ពាងពីរ បានចំណាយពេលរៀនចាប៉ី ២ ឆ្នាំ ហើយលោកគឺជាសិស្សរបស់តន្រ្តីករចាប៉ីដងវែងជើងចាស់លោក សុវណ្ណតន់តា និងត្រូវជាសិស្សចៅរបស់ស្មៀនប៉េ។
លោក សុវណ្ណ ពាងពីរ បានបង្ហើបប្រាប់ភ្នំពេញប៉ុស្តិ៍ឲ្យដឹងពីការមកហាត់សមជាមួយក្រុមសិល្បករ-ការិនី ផ្នែករបាំ នាថ្ងៃថតផលិតចាប៉ីរឿងសុវណ្ណសាម កាលពីរសៀលម្សិលមិញថា៖ «នេះគឺជាការជួយផ្តួចផ្តើមដ៏សំខាន់មួយរបស់ក្រសួងវប្បធម៌ និងវិចិត្រសិល្បៈ ក្នុងការអភិវឌ្ឍស្នាដៃថ្មីនៃទម្រង់សិល្បៈចាប៉ីដងវែង តាមរយៈការសាកល្បងផលិតជាចាប៉ីរឿងសុវណ្ណសាមនេះឡើង និងរួមចំណែកអភិរក្សមរតកវប្បធម៌»៕