The Phnom Penh Post Search

Search form

Logo of Phnom Penh Post newspaper Phnom Penh Post - តាប៊ុយ និង រ៉ូលីន បន្ទរ​ពាក្យ​សោក​ស្ដាយ​ចំពោះ Allen




តាប៊ុយ និង រ៉ូលីន បន្ទរ​ពាក្យ​សោក​ស្ដាយ​ចំពោះ Allen

Content image - Phnom Penh Post
រូបភាព​ដក​ស្រង់​ចេញពី​​កម្មវិធី ពេញ​ចិត្ត​អត់ បញ្ចាំង​កាល​ពី​ថ្ងៃ​អាទិត្យ​កន្លង​ទៅ​នេះ។ រូបថត Youtube

តាប៊ុយ និង រ៉ូលីន បន្ទរ​ពាក្យ​សោក​ស្ដាយ​ចំពោះ Allen

ភ្នំពេញ: វត្ត​មាន​ក្មេង​ស្រី ​ព្រាត់ម្ដាយ​ ដែល​រំពៃ​រក​មើល​អ្នកមាន​គុណ​ទាំង​​ទឹក​ភ្នែក​រលីង​​រលោង​នៅលើ​ផែន​ថ្ពាល់​ ក្រោយ​ពិធីការិនី ពេជ្រ សេរីរត្ន ប្រកាស​ក្ដែងៗ​ថា នាង​នឹង​បាន​ជួប​មាតា​បង្កើត នៅ​ក្នុង​កម្មវិធី «ពេញ​ចិត្ត​អត់» តែ​បែរ​ជា​​លេច​នូវ​មុខ​តារា​កំប្លែង រ៉ូលីន ជំនួស​ទៅ​វិញ​នោះ បាន​ធ្វើ​ឲ្យ​មហាជន​ប្រតិកម្ម​យ៉ាង​ខ្លាំង​ថា​ នេះ​ជា​ទង្វើ​មិន​សមរម្យ​​ហាក់​បីដូច​ជា​យក​​អារម្មណ៍​សោក​សៅ​របស់​ក្មេង​ស្រីខ្វះ​ភាព​កក់​ក្ដៅ​ម្នាក់​មក​លេង​សើច​។

ឈុត​មួយ​នៃ​កម្មវិធី «ពេញ​ចិត្ត​អត់?» របស់​ទូរទស្សន៍ MYTV បញ្ចាំង​នៅថ្ងៃ​អាទិត្យ ទី​១០ ខែ​ឧសភា ចំ​ទិវា​បុណ្យ​អ្នកម្ដាយ តាម​វប្បធម៌​បស្ចិម​ប្រទេស បាន​តម្រូវ​ឲ្យ​កញ្ញា រ៉ូលីន ដើរ​តួ​អង្គ​ម្ដាយ​ក្លែង​ក្លាយ​របស់​ក្មេង​ស្រី​កូន​កាត់ Autumn Allen ទាំង​រូប​នាង​មិន​ដឹង​​ខ្លួន​ជា​មុន​សោះ។

រឿង​រ៉ាវ​ដែល​អ្នក​ប្រើ​ប្រាស់​បណ្ដាញ​សង្គម​ហ្វេសប៊ុក​រិះ​គន់​​ខ្លាំងៗ​លើ​ក្រុម​ពិធីករ ជា​ពិសេស​​ផលិតករ​ដែល​​បាន​រៀប​ចំ​ជា​ការ​ជួប​ជុំ​អ្នក​ម្ដាយ​ក្លែង​ក្លាយ​ធ្វើ​ឲ្យ​ក្ដី​សង្ឃឹម​របស់​ក្មេង​ស្រីម្នាក់​​រលាយ​​មួយ​រំពេច​នោះ​ ត្រូវ​បាន​​លោក តាប៊ុយ ទទួល​ស្គាល់​ថា​វាគឺ​​ជា​កំហុស​ឆ្គង​អចេតនា​មួយ។

ផលិតករ​កម្មវិធី «​ពេញ​ចិត្ដ​អត់​» រូប​នេះ បាន​បកស្រាយ​​ថា៖ «សម្រាប់​សារ​ដែល​ខ្ញុំចង់​បង្ហាញ​​នៅ​ថ្ងៃ​បុណ្យ​អ្នកម្ដាយ​ ប្រហែល​ជា​ការ​ថ្លោះ​ធ្លោយ​មួយ​របស់​ពួក​ខ្ញុំ​ចំពោះ​ Allen។ បើ​ចង់​ដឹង​ច្បាស់ ពួក​ខ្ញុំ​នឹង​បក​ស្រាយ​នៅ​កម្មវិធី​អូឡាឡា។ អ៊ីចឹង ​ខ្ញុំ​អត់​និយាយ​អ្វី​ច្រើន​ទេ សូម​រង់​ចាំ​មើល​កម្មវិធី​អូឡាឡា​នៅ​​ថ្ងៃ​សៅរ៍​អាទិត្យ​ក្រោយ»។

Content image - Phnom Penh Post
ក្មេង​ស្រី Allen និង​ រ៉ូលីន ដើរតួ​ជា​ម្ដាយក្លែង​ក្លាយ​​​។ រូបថត Youtube

លោក​បាន​រៀប​រាប់​ថា កម្មវិធី​បាន​ជូន​ដំណឹង​ដល់​ក្មេង​ស្រី Allen តាមរ​យៈការ​អញ្ជើញ​នាង​មក​ច្រៀង​តែ​​ប៉ុណ្ណោះ រីឯ​ឈុត​ឆាក​សម្ដែង​​ធ្វើជា​ម្ដាយ​ក្លែង​ក្លាយ​នោះ​គឺ​​ចង់​ធ្វើ​ឲ្យ​នាង​ភ្ញាក់​ផ្អើល​សប្បាយ​ចិត្ត។

តាប៊ុយ ​បក​ស្រាយ​ទៀត​ថា៖ «សម្រាប់​ Allen មួយ​ គឺ​ពួក​ខ្ញុំ​មាន​​សារ​ចង់​ប្រាប់​គាត់​ថា ទោះ​ជា​គាត់​មិន​នៅជិត​ម៉ាក់​​មែន តែ​យើង​ទាំង​អស់​គ្នា​ស្រឡាញ់​គាត់​​ដូច​គ្រួសារ​អ៊ីចឹង​ ដូច្នេះ​បាន​ពួក​យើង​ថ្ងៃ​ហ្នឹង​លេង​ដើម្បី​​ឲ្យ​គាត់​សប្បាយ​​ចិត្ត»។

ជាមួយ​នឹង​សម្ដី​បង្កប់​ភាព​ក្រៀម​ក្រំ ​កញ្ញា រ៉ូលីន ជាតួ​អង្គ​​ម្ដាយ​ក្លែង​ក្លាយ​របស់ក្មេង​ស្រី Allen ​បាន​ថ្លែង​ប្រាប់​ភ្នំពេញ ប៉ុស្ដិ៍​ថា៖ «ខ្ញុំ​សូម​អភ័យ​ទោស​ជា​សាធារណៈ​ចំពោះ​ការ​សម្ដែង​របស់​ខ្ញុំ​ទៅ​តាម​ការ​រៀបចំ។ ខ្ញុំ​ក៏​មាន​សោក​ស្ដាយ​ដែរ​ ដែល​មាន​រឿង​នេះ​កើត​ឡើង​។ ដើម្បី​ជា​ប្រយោជន៍​រួម ខ្ញុំ​សង្ឃឹម​ថា​នឹង​មាន​ដំណោះ​ស្រាយ​ណា​មួយ​ល្អ​»។

ប៉ុន្តែ​​សម្រាប់​ក្មេង​ស្រី Allen ​ផ្ទាល់ នាង​ហាក់​មិន​ប្រកាន់​ទោស​ដំណើរ ហើយ​រូប​នាង​បាន​រំពឹង​ថា​នឹង​មក​បង្ហាញ​ខ្លួន​នៅតាម​កញ្ចក់ ទូរទស្សន៍​សាជា​ថ្មី។

Content image - Phnom Penh Post
ផលិតករ​កម្មវិធី «ពេញ​ចិត្ត​អត់» លោក តាប៊ុយ។ ហុង មិនា

តារា​ចម្រៀង​ក្មេង​ខ្ចី​វ័យ​ ១៣ ឆ្នាំ កូន​កាត់​ខ្មែរ​អាមេរិក​មាន​សំនៀង​ពីរោះ​រូប​នេះ បាន​បញ្ជាក់​ថា៖ «ដំបូង ខ្ញុំ​អស់​សង្ឃឹម​ខ្លាំង​ណាស់ ប៉ុន្ដែ​បង រ៉ូលីន បាន​ធ្វើ​ឲ្យ​ខ្ញុំ​សើច​។ ដូច្នេះ​ខ្ញុំ​មាន​អារម្មណ៍​រីករាយ​ចំពោះ​កម្មវិធី​នេះ​ណាស់​។ ប៉ា​របស់​ខ្ញុំ​យល់​អំពី​អារម្មណ៍​របស់​ពួកគេ​ និង​បាន​កោត​សរសើរ​ចំពោះ​ការ​គាំទ្រ​របស់​ពួកគេ​ ដែល​គ្មាន​ចេតនា​អាក្រក់​ណា​មួយ​ទេ ហើយ​ខ្ញុំ​នៅ​តែ​ចូលចិត្ដ​កម្ម​វិធី​នេះ»។

ក្មេង​ស្រី Allen បាន​បន្ដ​ថា​៖ «​ផលិតករ​ចង់​ឲ្យ​ខ្ញុំ​ត្រឡប់​មក​កាន់​វេទិកា​ម្ដង​ទៀត​ និង​ច្រៀង​ជា​ច្រើន​ភាសា។ ខ្ញុំ​កំពុង​ទន្ទឹង​រង់​ចាំ​ការ​អញ្ជើញ​នេះ​ ពីព្រោះ​ចូលចិត្ដ​ការ​សម្ដែង​។ ខ្ញុំ​ចង់​ឲ្យ​ពួកគេ​ហៅ​ឈ្មោះ​ខ្ញុំ​ថា Autumn»។

រំឭក​ពី​ដំណើរ​ជីវិត​បាត់​បង់​ភាព​កក់ក្ដៅ​ពី​ម្ដាយ​ ក្មេងស្រី Autumn Allen បាន​ឲ្យដឹង​ថា​ គ្រួសារ​នាង​​បាន​រើស​ទៅ​នៅ​ក្រុង​ព្រះ​សីហនុ​រយៈ​ពេល ៣​ ឆ្នាំ​ នៅ​ពេល​នាង​​អាយុ​ ៦​ ឆ្នាំ​ រួច​បន្ដ​ទៅ​កោះ​សូត្រ​ ហើយ​ទើប​តែ​ប្ដូរ​មក​រាជ​ធានី​ភ្នំពេញ​បាន ៦ ខែ​នេះ​។

នាង​បានរៀបរាប់​ពីដំណើរ​ជីវិត​គ្មាន​វត្តមាន​ម្ដាយ​ចិញ្ចឹម​បីបាច់​នេះ​ទៀត​ថា៖ «ប៉ា​បាន​ចិញ្ចឹម​ខ្ញុំ​តាំង​ពី​ខ្ញុំ​ចាប់​កំណើត​មក។ ដូច្នេះ​ខ្ញុំ​មាន​អារម្មណ៍​ថា ខ្ញុំ​ស៊ាំនឹង​ការ​រស់​នៅតែ​ជាមួយ​ប៉ា​ហើយ។ ខ្ញុំ​គ្មានទំនាក់​ទំនង​អ្វី​ជាមួយ​ម្ដាយ​ទេ​ ពីព្រោះ​ប៉ា​របស់​ខ្ញុំ​ជា​អ្នក​មាន​សិទ្ធិ​ចិញ្ចឹម​ខ្ញុំ​តែ​ម្នាក់​គត់»។

ចំពោះ​ភាព​ស្និទ្ធស្នាល​រវាង​កូន​​ស្រី និង​ម្ដាយ Allen បាន​ប្រាប់ថា​៖ «​ខ្ញុំ​បាន​ជួប​ម្ដាយ​ខ្ញុំ​ពីរ​ដង​មុន​ពេល​យើង​រើស​មក​នៅ​ស្រុក​ខ្មែរ​។ ខ្ញុំ​ព្យាយាម​ទាក់​ទង​ទៅ​គាត់​ជា​ច្រើន​លើក​ច្រើន​សា​ ប៉ុន្ដែ​គាត់​នៅ​តែ​បន្ដ​ផ្លាស់​ប្ដូរ​លេខ​ទូរស័ព្ទ​ជា​និច្ច​។ ប៉ា​គិត​ថា គាត់​រស់​នៅ​ក្នុង​ទីក្រុង​ Scottsdale រដ្ឋ​ Arizona ប៉ុន្ដែ​យើង​មិន​ច្បាស់​ទេ»។

ថ្វីដ្បិត​តែ​នាង​ទម្លាប់​នឹង​ការ​ធំធាត់​ដោយ​គ្មាន​អ្នក​ម្ដាយ​បី​បាច់​ក្ដី ក៏​ជីវិត​រស់នៅ​ជាមួយ​នឹង​ឪពុក​ទាំង​មិន​ដឹង​តម្រុយ​រស់​នៅ​​ច្បាស់​លាស់​របស់​ម្ដាយ​បង្កើត​ បាន​បន្សល់នូវក្ដី​រំពឹង​ស្រមៃ​ចង់​ស្គាល់​អារម្មណ៍​នៅ​ក្បែរ​​ទ្រូង​ម្ដាយ​នឹង​គេ។ នាង​​ទទួល​ស្គាល់​ថា នាង​ពិត​ជា​រំភើប​ទប់ទឹក​ភ្នែក​មិន​បាន ខណៈ​ប្រាណ​រេរា​ឆ្វេង​ស្ដាំ​​រំពៃ​រក​មើល​ម្ដាយ​បង្កើត ក្រែង​បង្ហាញ​ខ្លួន​ដូច​ការ​ប្រកាស​របស់​ពិធីករ​របស់​កម្មវិធី។

ក្មេងស្រី Autumn Allen​សារភាព​ថា​៖ «​ចា! ខ្ញុំ​នឹក​គាត់​ ចង់​ជួប​មុខ​គាត់​ខ្លាំង​ណាស់​ ហើយ​ពេល​ឮ​ដំណឹង​នេះ ខ្ញុំ​មាន​​អារម្មណ៍​រំភើប​ខ្លាំង​ណាស់​ ពីព្រោះ​ខ្ញុំ​គិត​ថា គាត់​ពិត​ជា​មក​រក​ខ្ញុំ​មែន​។ ខ្ញុំ​ក្ដុក​ក្ដួល​ចិត្ដ​ខ្លាំង​ណាស់ ដែល​វា​មិន​មែន​ជា​ការ​ពិត​ ប៉ុន្ដែ​ខ្ញុំ​ពេញ​ចិត្ដ​ក្នុង​ការ​សម្ដែង​​នៅ​លើ​ឆាក​»៕

អត្ថបទគួរចាប់អារម្មណ៍