ភ្នំពេញៈ ក្រោយពីតារាស្រីសម្តីញ៉ែតៗមិនខ្វះពាក្យនៅក្នុងការសម្តែងកំប្លែង មានឈ្មោះពិត ស្រេង សុកាន់ដា ហៅ ខ្ញុង និងលោក អ៊ុំ ក្សត្រា ហៅនាយ កៃដ បានសម្រេចភ្ជាប់ពាក្យនៅថ្ងៃឡើងគេហដ្ឋានថ្មីកាលថ្ងៃទី ៣០ ខែសីហា ឆ្នាំ ២០១៧ មកក៏ស្រាប់តែលេចចេញធៀបការកំណត់ថ្ងៃចូលរោងជ័យនៅថ្ងៃទី ៨ ខែសីហា ឆ្នាំ ២០១៩ ខាងមុខនេះហើយ។
បើគិតត្រឹមពេលភ្ជាប់ពាក្យបំពេញមុខចាស់ទុំទាំងសងខាងតាំងពីឆ្នាំ ២០១៧ មកដល់ពេលនេះគឺថាចំណងស្នេហ៍រវាងតារាកំប្លែងស្រី និងតារាចម្រៀងប្រុស នាយ កៃដ បង្កាត់ភ្លើងស្នេហ៍នឹងគ្នាបានរយៈពេលជិត ២ ឆ្នាំមកហើយ បន្ទាប់ពីបានស្គាល់ចិត្តស្គាល់ថ្លើមគ្នាមកនោះ។
តារាកំប្លែងស្រីដែលកំពុងតែមានរាសីឡើងខ្ពស់ត្រដែតដោយទទួលបានទាំងផ្ទះទ្រនំថ្មី និងអនាគតស្វាមីទី ២ ដែលបានភ្ជាប់និស្ស័យសម្រេចចិត្តរួមរស់ជាមួយគ្នាហាក់ដូចជាប្តីប្រពន្ធទៅហើយគឺជាបុរសរួមអាជីពសិល្បៈមានឈ្មោះហៅនៅក្នុងសង្គមសិល្បៈ នាយ កៃដ នោះនឹងចូលរោងការនៅដើមខែសីហា ឆ្នាំ ២០១៩ ខាងមុខនេះហើយដែលនឹងរៀបចំនៅចំថ្ងៃខួបកំណើតរបស់អ្នកនាង ខ្ញុង តែម្តង។
នេះបើតាមការបង្ហើបពីលោក អ៊ុំក្សត្រា ហៅនាយ កៃដ ដែលជាអនាគតស្វាមីទី ២ អ្នកនាង ស្រេង សុកាន់ដា ហៅនាង ខ្ញុង បានប្រាប់ភ្នំពេញប៉ុស្តិ៍ថា៖ «បាទបង!នោះជាដំណឹងពិតប្រាកដមែន ដែលពួកយើងបានសម្រេចចូលរោងការនៅថ្ងៃទី ៨ ខែ ៨ ដែលចំថ្ងៃខួបកំណើតរបស់គាត់ [ខ្ញុង] តែម្តង»។
ទោះយ៉ាងណាពិធីមង្គលការរបស់អ្នកសិល្បៈមួយគូនេះមិនទាន់ត្រូវបានកំណត់ចំនួនភ្ញៀវប៉ុន្មានតុ និងមានអ្នកសិល្បៈចូលប៉ុន្មានតុនៅឡើយដែរទេ ដោយសារតែកំពុងស្ថិតនៅក្នុងការគិតពិភាក្សាគ្នាហើយការរៀបចំពិធីមង្គលការគឺនៅផ្ទះរបស់ពួកគេដែលបានទិញរួមគ្នានោះតែម្តងគឺស្ថិតនៅភូមិដូង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ឬនៅម្តុំរោងចក្រផលិតមីម៉ែនសារុន។
លោក ក្សត្រា ហៅនាយ កៃដ បានបន្តថា៖ «នៅពេលនេះយើងអត់ទាន់ដឹងច្បាស់ថានឹងមានចំនួនប៉ុន្មានតុនៅឡើយទេចំពោះការអញ្ជើញភ្ញៀវនោះដោយសារតែយើងធ្វើការសម្រេចចិត្តមានលក្ខណៈបែបបន្ទាន់បន្តិច ហើយពិធីមង្គលការនេះនឹងរៀបចំធ្វើនៅផ្ទះពួកយើងនៅឯម្តុំរោងចក្រផលិតមីម៉ែនសារុនឯណោះ មិនបានទៅធ្វើពិធីនៅទីកន្លែងផ្សេងនោះឡើយ។
ម្យ៉ាងវិញទៀតដោយសារតែយើងមានក្រុមចុងភៅធ្វើម្ហូបខ្លួនឯង ខណៈក្រុមភ្លេង ផ្នួងសម្អាងការផ្សេងៗនោះក៏សុទ្ធសឹងតែជារបស់ក្រុមអ្នករួមអាជីពសិល្បៈដូចគ្នាផងដែរ ទើបបានជាសម្រេចចិត្តរៀបចំនៅផ្ទះខ្លួនឯងតែម្តងទៅ»។
បន្ទាប់ពីភ្ជាប់ពាក្យនឹងគ្នានាកន្លងមកនោះ តារាកំប្លែងស្រីពូកែសម្តី និងជាតារាចម្រៀងនៅផលិតកម្មថោន អ្នកមេម៉ាយកូនមួយមានឈ្មោះពិត ស្រេង សុកាន់ដា ហៅ នាង ខ្ញុង ក៏ពើបនឹងរឿងចំណាយមាត់ញាតិមួយដែរថា គឺនាង និងបុរសរួមអាជីពសិល្បៈដែលមានឈ្មោះហៅក្នុងសិល្បៈថា នាយ កៃដ កំពុងតែរួមរស់ជាមួយគ្នាដូចជាប្តីប្រពន្ធទៅហើយក្រោមដំបូលតែមួយ។
គួររំឭកដែរថាតារាកំប្លែងស្រីមានសម្តីញ៉ែតៗ និងមានវ៉ូលីមខ្ពស់ពេលសម្តែងម្តងៗមានវ័យ ៣៤ ឆ្នាំដែលបានហក់ចូលវិស័យសិល្បៈកំប្លែង និងផុសភាពល្បីខ្លាំង ខណៈពេលបានចូលរួមសម្តែងជាមួយដៃគូសម្តែងប្រុសជាតារាកំប្លែងល្បីដ៏សមឥតទាស់ដែរនោះគឺនាយ ពែកមី តាំងកាលពីឆ្នាំ ២០០៩ មកម្ល៉េះ៕