.jpg)
តារាកំប្លែង និងចម្រៀងស្រី អ្នកនាង ខ្ញុង ល្បីថា នឹងទៅចូលទ្រនំថ្មីរាម ជាមួយ មាស សុខសោភា។ ហ្វេសប៊ុក
ភ្នំពេញ៖ តារាសម្តែង ចម្រៀង និងកំប្លែងស្រី រាសីឡើងខ្ពស់ត្រដែតលើវិថីសិល្បៈអ្នកនាង ស្រេង សុកាន់ដា ហៅអ្នកនាង ខ្ញុង ហាក់ពុំទាន់ហ៊ានបង្ហើបការពិតថា តើខ្លួនឯងកំពុងតែត្រៀមចូលរួមនៅទ្រនំថ្មីរាម ជាមួយនឹងតារាចម្រៀងស្រីរៃកណ្តឹង មាស សុខសោភា នៅឡើយនោះទេ ក្រោមហេតុផលមិនទាន់បានដឹងពីខាងផលិតកម្មនៅឡើយ។
នាពេលថ្មីៗនេះ កញ្ញា មាស សុខសោភា បានសារភាពប្រាប់ផ្ទាល់ហើយថា នឹងចូលទ្រនំថ្មីផលិតកម្មរាម បន្ទាប់ពីអូសបន្លាយអស់ ១ ឆ្នាំ ដោយមិនបរិយាយប្រាប់មហាជន អ្នកគាំទ្រពីពន្លឺទ្រនំថ្មីនោះ ពោលគឺចាប់ពីបានឈប់ពីទ្រនំចាស់ថោនមក និងមហាជនសង្កេតឃើញកញ្ញាឧស្សាហ៍មានទំនាក់ទំនងជាមួយនឹងថៅកែស្រីផលិតកម្មថ្មីផងដែរ តាមរយៈរបរពាណិជ្ជកម្មនៃផលិតផលសុខភាព មានយីហោថា «សម្រស់ធម្មជាតិ» នោះ។
តារាស្រីសម្តីញ៉ែតៗមិនខ្វះពាក្យនៅក្នុងការសម្តែងកំប្លែង អ្នកនាង ខ្ញុង ដែលបានរៀបការជាមួយ ស្វាមីទី២ លោក អ៊ុំ ក្សត្រា ហៅនាយ កៃដ កាលពីថ្ងៃទី ៨ ខែ សីហា ឆ្នាំ ២០១៩ មហាជនក៏សង្កេតឃើញថា មានទំនាក់ទំនងស្និទ្ធស្នាលនឹងថៅកែស្រីផលិតកម្មរាមនោះដែរ តែអ្ននាង ខ្ញុង ហាក់នៅស្ទាក់ស្ទើរមិនទាន់ប្រាប់ការពិតថា នឹងចូលរួមទ្រនំថ្មីនេះទេ។
តារាកំប្លែងស្រីពូកែសម្តី និងជាតារាចម្រៀងនៅឯផលិតកម្មថោនដូចជា មាស សុខសោភា ដែរនោះបានបញ្ជាក់ដូច្នេះថា៖ «ចំពោះរឿងចូលរួមផលិតកម្មថ្មីនោះ នាងខ្ញុំផ្ទាល់មិនទាន់ដឹងច្បាស់ផងថាយ៉ាងណាតែខាងបងហាក់បានដឹងច្បាស់ហើយនោះ នាងខ្ញុំមិនទាន់ហ៊ាននិយាយថាយ៉ាងម៉េចដែរ ចាំដល់ពេលថ្ងៃទី ១៩ ខែ កុម្ភៈ ឆ្នាំ ២០២១ សិនចុះ»។
សម្រាប់អ្នកនាង ខ្ញុង ទោះបីជាខ្លួនធ្លាប់ជាតារាចម្រៀងនៅផលិតកម្មថោនមែនក្តី តែបើតាមស្តាប់សម្តីបង្ហើបប្រាប់នោះ អ្នកនាងពុំមែនជាតារាចម្រៀង ដែលមានជាប់កុងត្រានោះទេ ខណៈខ្លួនគាត់មានទ្រនំជាម្ចាស់ជាប់កុងត្រារួចហើយ គឺជាតារាកំប្លែងប្រចាំនៅក្រុមហ៊ុន CBS ដែលមានប៉ុស្តិ៍ទូរទស្សន៍ CTN ប៉ុស្តិ៍ MyTV និងនៅប៉ុស្តិ៍ CNC៕
