.jpg)
លោក ចាន់ សម័យ ពេលទៅស្ទូចត្រីដើម្បីយកធ្វើម្ហូបចិញ្ចឹមគ្រួសារក្រៅពេលច្រៀង។ ហ្វេសប៊ុក
ភ្នំពេញៈ ថ្មីៗនេះក្រោយពីឮដំណឹងផ្សព្វផ្សាយព័ត៌មានស្តីពីជីវភាពកម្សត់លំបាក និងបៀមទុក្ខសោកដោយជំងឺប្រចាំកាយរបេងឆ្អឹងយូរឆ្នាំ តែនៅខំប្រឹងពុះពារតស៊ូរួមរស់នឹងប្រពន្ធកូន ផ្ញើខ្លួននៅលើវិថីសិល្បៈដដែលនោះ តារាចម្រៀងប្រុសចំណូលថ្មីទ្រនំធំសម្បូរតារាល្បីៗហង្សមាសលោក ខេមរៈ សិរីមន្ត ហ៊ានលះបង់ធនធានផ្ទាល់ខ្លួនជាប្រាក់ចំនួន ១០០០ ដុល្លារ ជូនរៀមច្បងសិល្បៈលោក ចាន់ សម័យ គួរឲ្យកោតសរសើរពីសន្តានចិត្តដ៏ល្អនេះ។
ទោះបីជាលោក ខេមរៈ សិរីមន្ត មិនបានយកប្រាក់ទៅជូនផ្ទាល់ដល់លោក ចាន់ សម័យ ជាតារាចម្រៀងប្រុសល្បីប្រចាំផលិតកម្មព្រះវិហារ អំឡុងឆ្នាំ ២០០០-២០០១ ម្ចាស់បទចម្រៀងបែបញាក់ៗដូចជាបទ «អ្នកតាចង់មេមាន់ ឬសុំមេមាន់មួយ» បទ «អូនសាវា» បទ «គិតយ៉ាងណា» បទ «ស្តាយក្រោយ» បទ «ចាញ់ទាំងអស់» និងបទចម្រៀងក្នុងកុនចិន តៃវ៉ាន់រឿង «ស្នេហា F4» ជាដើមនោះក្តី តែលោកបានប្រគល់ភារកិច្ចទៅឲ្យបងប្រុសបង្កើតគឺលោក ខេមរៈ ភារុណ ដែលជាអ្នកនិពន្ធទំនុកច្រៀងផ្ទាល់របស់ខ្លួនដោយសារលោកជាប់រវល់ចេញទៅប្រទេសថៃ។
តាមរយៈការផ្សាយផ្ទាល់នៃវីដេអូ Live ហ្វេសប៊ុកនោះ គឺគេបានឃើញលោក ខេមរៈ ភារុណ ដែលជាបងប្រុសលោក ខេមរៈ សិរីមន្ត គឺថាពិតជាបាននាំយកថវិកាចំនួន ១ ០០០ ដុល្លារ ទៅជូនដល់ផ្ទះជួលរបស់លោក ចាន់ សម័យ ស្ថិតនៅក្នុងភូមិកៀនឃ្លាំង សង្កាត់ព្រែកលៀប ខណ្ឌជ្រោយចង្វារ ដែលបង្កការភ្ញាក់ផ្អើលខ្លាំងទាំងមហាជន និងសង្គមអ្នកសិល្បៈ ខណៈថ្មីៗនេះ ក៏ស្រាប់តែលេចវត្តមានលោកក្នុងជីវភាពយ៉ាប់យ៉ឺនខ្លាំងសឹងតែមិនគួរឲ្យជឿ ដើរស្ទូចត្រីតាមមាត់ទន្លេ ដើម្បីយកធ្វើម្ហូបចិញ្ចឹមជីវិតប្រពន្ធកូន សំងំលាក់ខ្លួនជិត ១០ ឆ្នាំមកហើយនោះមែន។
បើតាមសម្តីរៀបរាប់ប្រាប់ភ្នំពេញប៉ុស្តិ៍ របស់លោក ខេមរៈ ភារុណ ជាបងប្រុសនោះ ខេមរៈ សិរីមន្ត ក៏បានផ្តាំផ្ញើពាក្យពេចន៍លើកទឹកចិត្តដោយក្តីអាណិតអាសូរលោក ចាន់ សម័យ ដែរថា៖ «សិរីមន្ត ក៏ផ្តាំផ្ញើនូវពាក្យសម្តីដល់បង ចាន់ សម័យ ថា កុំឲ្យគាត់បាក់ទឹកចិត្តចំពោះស្ថានភាពបច្ចុប្បន្នខ្លួនអី ហើយក៏សោកស្តាយដែរពេលដឹងឮពីទុក្ខលំបាករបស់គាត់បែបនេះ»។
នាប៉ុន្មានថ្ងៃក្រោយពីបែកធ្លាយខ្លាំងពីរឿងជីវភាពលំបាកលោក ចាន់ សម័យ មក ក៏មានក្រុមសប្បុរសជននៅក្រៅ និងក្នុងសិល្បៈនាំគ្នាចូលរួមចែករំលែកសេចក្តីសប្បុរសរៀងៗខ្លួនជាហូរហែ ហើយកាន់តែពិសេស បន្ទាប់ពីមានការនាំយកនូវអំណោយជាគ្រឿងឧបភោគបរិភោគ រួមមានទាំងថវិកាខ្លះៗពីសំណាក់ក្រុមលោក ហេង ឡុង ដែលជាគូស្នេហ៍របស់អ្នកនាង ចន ច័ន្ទលក្ខិណា ជាប្រធានសមាគមអ្នកសិល្បៈកាលពីព្រឹកម្សិលមិញមក លោកក៏បាននាំពាក្យថា លោកនាយករដ្ឋមន្ត្រី ហ៊ុន សែន នឹងផ្តល់ទឹកប្រាក់ចំនួន ១ ម៉ឺនដុល្លារទៅដល់ក្រុមគ្រួសាររបស់លោក ចាន់ សម័យ ផងដែរ៕
