.jpg)
កញ្ញា ដា លីណា តារាចម្រៀងស្រីអូរីជីណលរលកថ្មីរបស់ក្រុម TMS ត្រៀមចេញបទថ្មី។ រូបថត សហការី
ភ្នំពេញៈ ក្រៅពីឃើញវត្តមានតាមរយៈការច្រៀង Cover បទចម្រៀងរបស់តារាចម្រៀងប្រុសស្រីផ្សេងៗឲ្យកាន់តែមានភាពល្បីនោះ ឥឡូវនេះតារាចម្រៀងស្រីអូរីជីណលដែលជារលកសិល្បៈក្រោយមានទេពកោសល្យចេះលេងហ្គីតា កញ្ញា ដា លីណា ត្រៀមចេញបទចម្រៀងថ្មីរបស់ខ្លួនមកបំពេអារម្មណ៍ប្រិយមិត្តយុវវ័យវិញម្តង។
នេះបើតាមការបង្ហើបប្រាប់ពីក្រុមការងារ TMS ដែលជាទ្រនំសិល្បៈរបស់កញ្ញា ដា លីណា បានឲ្យដឹងនាពេលថ្មីៗថានាងកំពុងតែត្រៀមចេញបទថ្មីមានចំណងជើងថា «អ្នកទី ៣»។
កញ្ញា ប៊ូ រចនី ហៅថា អាឈីង ជាជំនួយការគ្រប់គ្រងក្រុម TMS បានរំឭកឲ្យដឹងពីប្រវត្តិតារាចម្រៀងស្រីមានរូបស្រស់សោភា វ័យក្មេងកញ្ញា ដា លីណា ថា៖ «ផ្តើមចេញពីចំណូលចិត្តច្រៀង Cover បទចម្រៀងរបស់តារានានា ហើយបានថតបង្ហោះតាមបណ្តាញសង្គមយូធូប និងចេះលេងហ្គីតាតាំងពីរៀននៅវិទ្យាល័យមកផងដែរនោះ ក៏ជំរុញឲ្យកញ្ញា ដា លីណា ខំប្រឹងរហូតបានក្លាយជាតារាចម្រៀងអូរីជីណលប្រចាំក្រុម TMS និងកំពុងតែទទួលបានប្រជាប្រិយភាពពីយុវវ័យខ្លាំងទៀត»។
ស្រទាប់យុវវ័យបានស្គាល់កញ្ញា ដា លីណា ច្បាស់តាមរយៈសំនៀងច្រៀង Cover បទ «ឆ្ងាយ» ដែលបង្ហោះនៅតាមបណ្តាញសង្គមយូធូបក៏ដូចជាបទ «ខុសជំនាន់» របស់លោក ថេណា ដែលទទួលបាននូវការចាប់អារម្មណ៍យ៉ាងខ្លាំងពីមហាជនទាំងក្នុង និងក្រៅសិល្បៈមានចំនួនរាប់ម៉ឺននាក់ឯណោះ។
ជំនួយការគ្រប់គ្រងក្រុម TMS បន្តឲ្យដឹងទៀតដែរថា៖ «បច្ចុប្បន្នកញ្ញាមានវ័យ ២០ ឆ្នាំជាតារាចម្រៀងផង និងសម្តែងផង កំពុងតែសំងំផលិតបទថ្មីជាប្រភេទអូរីជីណល និងត្រៀមចេញមកបំពេអារម្មណ៍ប្រិយមិត្តយុវវ័យឆាប់ៗនេះដែរគឺបទមានចំណងជើងថា «អ្នកទី ៣» ដែលមានអត្ថន័យបែបចាក់ដោតអារម្មណ៍របស់យុវវ័យខ្លាំង។ បទនេះគឺនឹងចេញឆាប់ៗតែម្តងទំនងជាត្រូវត្រៀមចេញនៅក្នុងពាក់កណ្តាលខែឧសភានេះតែម្តង។
ដោយឡែកកញ្ញា ដា លីណា ក៏មានចំណូលចិត្តលើការតែងនិពន្ធបទចម្រៀងរៀបរាប់ពីរឿងខ្លួនឯង និងអ្នកនៅជុំវិញខ្លួនផងដែរ ក្រៅពីចំណូលចិត្តលេងឧបករណ៍តន្ត្រីហ្គីតានោះ»។
ក្រៅពីអាជីពជាតារាចម្រៀងស្រីអូរីជីណល ស្រីស្អាតរាងតូចច្រឡឹង ចូលចិត្តតែងខ្លួនបែបឃ្យូតៗមានត្រេមុខញញឹមស្រស់ កញ្ញា ដា លីណា ក៏ឈោងទៅចាប់អាជីពជាតារាសម្តែងផងដែរ ខណៈឱកាសសម្តែងកុនដំបូងរបស់នាងគឺរឿង «លួចស្នេហ៍អ្នកជិតខាង » ដែលចាក់បញ្ចាំងនៅលើកញ្ចក់ទូរទស្សន៍ MyTV ដែលជាខ្សែភាពយន្តនិយាយពីខ្សែជីវិតរបស់យុវវ័យនោះ៕
