ភ្នំពេញ៖ ខណៈនិស្ស័យស្នេហ៍ប្តីប្រពន្ធនឹងអតីតស្វាមីសញ្ជាតិហូឡង់ និងតារាចម្រៀងឯករាជ្យ កូន ១ បានលាតត្រដាងការពិត កាលពីថ្ងៃទី ៥ ខែ កញ្ញា ឆ្នាំ ២០២០ ដោយភាគីស្វាមីគឺ លោក Morten Kvamman បានបង្ហោះលិខិតមួយដែលមានបញ្ជាក់ពីចំណងស្នេហ៍បែកបាក់នោះ ស្រាប់តែថ្មីៗនេះ អ្នកនាង ទូច ស្រីល័ក្ខណ៍ ហាក់បង្ហាញពីសម្ព័ន្ធស្នេហ៍ថ្មី ដោយបើកចំហមានការសាកសួរមតិយោបល់ពីមហាជន ដើម្បីឱ្យជួយសម្រេចចិត្តទៀតផង។
នេះតាមសារ ១ ឃ្លា ដែលតារាចម្រៀងស្រីកាត់សក់ខ្លីជាស្ទីលថ្មីដូចមនុស្សប្រុស អ្នកនាង ទូច ស្រីល័ក្ខណ៍ បង្ហើរសារអមបណ្តុំរូបភាព ដែលមានបុរសម្នាក់ទំនងជាគូស្នេហ៍ថ្មី ដោយនាងបានហៅថាលោកគ្រូនោះថា៖ «ចុមលោកគ្រូមក surprise ខួបកំណើតដល់មន្ទីរពេទ្យសំខាន់កូនឈឺនៅពេទ្យនៅឡើយ។ គិតម៉េចទៅ លោកគ្រូប្រាប់ថា សុំចូលខ្លួនថែចិត្ត បងប្អូន តើខ្ញុំត្រូវគិតម៉េច?» ធ្វើឱ្យផ្អើលអ្នកគាំទ្រ។
រំពេចនោះ ក៏មានអ្នកគាំទ្រចូលទៅបញ្ចេញយោបល់យ៉ាងច្រើនសន្ធឹក ក្រោយពីមានការស្នើសុំជំនួយមហាជនពីតារាចម្រៀងអ្នកនាង ទូច ស្រីល័ក្ខណ៍ មកដោយមតិភាគច្រើនជាការជំរុញឱ្យទទួលយកស្នេហ៍ថ្មីតាមតម្រូវការបេះដូង។ មានអ្នកខ្លះបានតបថា៖ «ប្រសិនបើ បងគិតថាគាត់ ជាចំណែកដែលខ្វះនោះទទួលទៅ។ មានតែបងទេ ទើបដឹងថាគាត់ជាចំណែកដ៏ត្រឹមត្រូវសម្រាប់បំពេញចំណុចខ្វះ។ បើអ្នកចាស់មិនទៅ អ្នកថ្មីក៏មិនមកដែរសំខាន់គិតថា គេល្អ មើលថែយើង និងកូនបានទទួលទៅ។ យកទៅបង សម័យនេះកុំខ្វល់ច្រើន រកស្នាមញញឹម រកក្តីសុខ និងសុភមង្គលឱ្យខ្លួនឯងបង។ បងធ្លាប់ឈឺចាប់ ចឹងត្រូវរកអ្នកដែលមកបំពេញស្នាមញញឹមរបស់បង ជាជាងយកមនុស្សដែលគិតខ្លី (មានន័យថាគិតតែបច្ចុប្បន្ន) មនុស្សយើង ធ្លាប់ឈឺចាប់ ឥឡូវនេះ គឺរឹតតែមាំមានន័យថាអាចការពារខ្លួនឯងបានគ្រប់យ៉ាង ហើយជាបទពិសោធមួយដ៏មានន័យសម្រាប់អនាគត។ មិនអាស្រ័យលើអ្នកដទៃសម្រេចទេ សំខាន់បងស្គាល់គាត់ បងនៅជិតដិតជាមួយគាត់ បើបងគិតថា អាចទទួលយកបានក៏ធ្វើតាមបេះដូងបងស្រីចុះ»។
ចំណែកអ្នកខ្លះថា៖ «ធ្វើតាមបេះដូង ប្អូនចុះ បងជូនពរប្អូន ឱ្យមនុស្ស ដែលចូលមកជីវិតប្អូនជាមនុស្ស ដែលស្រឡាញ់ប្អូនខ្លាំងហើយជីវិតរបស់គាត់បាត់ប្អូនមិនបាន។ បើសិនជាត្រូវយកម្តងទៀត គួរតែយកមនុស្សប្រុស ដែលមើលថែយើង និងកូន ហើយស្រឡាញ់កូនយើងជាងខ្លួនយើង តែបើគេស្រឡាញ់ត្រឹមតែយើង ស៊ូនៅម្នាក់ឯងជាជាងយកមនុស្សប្រុសចូលមកក្នុងជីវិតរបស់យើង!»។
តែយ៉ាងណានារសៀលថ្ងៃមិ្សលមិញ ភ្នំពេញ ប៉ុស្តិ៍ ក៏មិនអាចទំនាក់ទំនងទៅកាន់អ្នកនាង ទូច ស្រីល័ក្ខណ៍ បានដើម្បីបញ្ជាក់ការពិតអំពីសម្ព័ន្ធស្នេហ៍ថ្មីនោះឡើយ ដោយប្រព័ន្ធទូរស័ព្ទមិនអាចទាក់ទងបាន៕