The Phnom Penh Post Search

Search form




Logo of Phnom Penh Post newspaper Phnom Penh Post - តារា​ប្រុស​សាច់​ដុំធំ សន ពិសិដ្ឋ កាន់​តែ​ទាក់​ចិត្ត​ផលិត​ករ​ក្នុងការ​សម្តែង​​កុន​រឿង ​«អន្ទាក់​ស្នេហ៍»

តារា​ប្រុស​សាច់​ដុំធំ សន ពិសិដ្ឋ កាន់​តែ​ទាក់​ចិត្ត​ផលិត​ករ​ក្នុងការ​សម្តែង​​កុន​រឿង ​«អន្ទាក់​ស្នេហ៍»

Content image - Phnom Penh Post
តារាសម្តែង​មាឌធំ និង​សាច់ដុំ​ធំ​លោក សន ពិសិដ្ឋ ដែល​កំពុង​ត្រូវ​ចិត្ត​ផលិត​ករ​ក្នុង​រឿង ​«អន្ទាក់ស្នេហ៍»។ រូប សហការី

តារា​ប្រុស​សាច់​ដុំធំ សន ពិសិដ្ឋ កាន់​តែ​ទាក់​ចិត្ត​ផលិត​ករ​ក្នុងការ​សម្តែង​​កុន​រឿង ​«អន្ទាក់​ស្នេហ៍»

ភ្នំពេញ: លេច​វត្ត​មាន​តារា​សម្តែង​ប្រុស​មាឌ​ឌាំង​គ្រោង​ដំណែង​តួឯក​ប្រុស​ក្នុង​ភាព​យន្ត​ថ្មី«អន្ទាក់​ស្នេហ៍​»​ ត្រៀម​នឹង​ចាក់​បញ្ចាំង​នៅគ្រប់​រោង​កុន​​ ពី​ថ្ងៃ​ទី ២០ ខែ កុម្ភៈ នេះ​ សន ពិសិដ្ឋ​ ធ្វើ​ឲ្យ​អ្នក​ទស្សនា​ភ្ញាក់​ផ្អើល​នឹងសម្រស់​​សាច់​ដុំ​ ដែល​បង្ហាញ​នៅ​ក្នុង​រឿង​តាម​របៀប​បុរស​ស្រុក​ស្រែ​ ដោះ​អាវ​បញ្ចេញ​សាច់​ពេល​កំពុង​ធ្វើ​ការ​។

ជំនួប​ក្នុង​ថ្ងៃ​សម្ភោធ​ភាព​យន្ត ​«អន្ទាក់​ស្នេហ៍»​ កាល​ពី​ថ្ងៃ​ទី ១៧ ខែ កុម្ភៈ កន្លង​មក​​នេះ​ ​​នៅ​រោង​ភាព​យន្ត​ Major Cineplex ផ្សារ​ទំនើប​អ៊ីអន​ ២ លោក ​សន​ ពិសិដ្ឋ​ បាន​ផ្តល់​បទ​សម្ភាស៍​មក​កាន់​ភ្នំពេញ​ប៉ុស្តិ៍​ថា​៖ ​«​ក្នុង​រឿង​នេះ ​«​អន្ទាក់​ស្នេហ៍​» ខ្ញុំ​សម្តែង​ជា​តួឯក​ប្រុស​ ដោយ​ចាប់​ដៃ​គូ​ជា​មួយ​អ្នក​នាង​ សុខ សោម៉ាវត្តី​។ ខ្ញុំ​សម្តែង​ជា​តួ​អង្គ​ដែល​មាន​អត្តចរិក​សុភាព​រាប​សារ​ ជា​ពិសេស​មាន​ស្នេហ៍​ស្មោះ​ ហើយ​ក៏​សុខ​ចិត្ត​ឈឺ​ចាប់​ ដើម្បី​ឲ្យ​មនុស្ស​ដែល​ខ្លួន​ស្រលាញ់​មាន​ក្តី​សុខ​ និយាយ​ទៅចរិក​តួឯក​ប្រុស​ក្នុង​រឿង​ល្អ​ពេក​ ល្អ​លើស​ចរិក​ខ្ញុំ​នៅ​ក្រៅ​បន្តិច​»។

គួរ​បញ្ជាក់​ថា​ រឿង ​«អន្ទាក់​ស្នេហ៍» ជា​ខ្សែភាព​យន្ត​បែបស្នេហា​​ស្រុក​ស្រែ​ របស់​ផលិត​កម្ម​ Space SP ដែល​ស្តែង​ចេញ​ពី​ស្នេហា​របស់​កំលោះ​ក្រមុំ​មួយ​គូ​ ដែល​ត្រូវ​ម្តាយ​ខាង​ស្រី​បំបែក​ ទៅ​រៀប​ការ​ជា​មួយ​បុរស​ពោះ​ម៉ាយ​ចំណាស់​ ដោយសារ​​ទឹក​លុយ​ និង​ការ​តស៊ូ​រហូត​បាន​ជួប​ជុំ​គ្នា​វិញ​ ដោយ​មាន​បង្កប់​អត្ថន័យ​ស្នេហា​ស៊ី​សជម្រៅ​លាយ​ឡំ​នឹង​កំប្លែង និង​កំសត់​។

ក្រៅ​ពី​សាច់​រឿង​បែបថ្មី​ និយាយ​ពី​ស្នេហា​កំសត់​បែប​ស្រុក​ស្រែ ដែល​ជា​រស​ជាតិ​ថ្មី​មួយ​បង្កប់​ដោយអត្ថន័យ​អប់​រំ​នេះ​ហើយ​ អ្នក​ទស្សនា​ក៏​មាន​ការ​ភ្ញាក់​ផ្អើល​ តាម​រយៈ​ ឆុត​ឆាក​ខ្លី​របស់​ភាព​យន្ត​នេះ​ ដោយ​បង្ហាញ​វត្ត​មាន​តួ​ឯក​ប្រុស (សន ពិសិដ្ឋ) ​បង្ហាញ​សាច់​ដុំ​ធំៗ​ សាក​សម​ជា​បុរស​ពេញ​លក្ខណៈ​ លី​បាវ​ស្រូវ​យ៉ាង​រឹង​មាំ​ផង​ដែរ​។

Content image - Phnom Penh Post

ទាក់​ទង​ជា​មួយ​ភាព​ទាក់​ទាញ​នៃ​សាច់​ដុំ​នេះ​ តារា​សម្តែង​ប្រុស ​ដែល​មាន​រូប​រាង​សម​នឹង​កម្ពស់លោក​​ សន ពិសិដ្ឋ ក៏​បាន​បង្ហើប​ដែរ​ថា​៖ ​«​តាម​ពិត​​ពេល​កំពុង​សម្តែង​រឿង​ «អន្ទាក់​ស្នេហ៍» រាង​ស្រក​សាច់​ហើយ​ ដោយ​សារ​ការងារ​រវល់​ពេក​ មិន​សូវ​បាន​ថែសុខ​ភាព​ ប៉ុន្តែ​គ្រប់​ពេល​​ដែល​ទំនេរ​ពី​ការងារ​បន្តិច​ ដឹង​តែ​ទៅ​ហាត់​ប្រាណ​ហើយ​ ព្រោះ​យើង​ជា​មនុស្ស​ម្នាក់​ដែល​ស្រលាញ់​រូប​រាង​បែប​នេះ​ និង​សុខ​ភាព​»។

សន ពិសិដ្ឋ ក៏​បានបញ្ជាក់​ពី​មូល​ហេតុ​ដែល​ការ​ទទួល​បាន​ការ​សម្តែង​ក្នុង​ភាពយន្ត​ភាគ​ និង​ដុំ​ជា​បន្ត​បន្ទាប់​ដូច្នេះ​ដែរ​ថា​៖ ​«​វា​អាច​មក​ពី​មូល​ហេតុ​ ៣ យ៉ាង ទី ១ ទាក់ទង​ជា​មួយ​ទេពកោសល្យ​ក្នុង​ការ​សម្តែង​ ទី ២ សំលេង​យើង​អំណោយ​ផល​ ដោយ​សារ​ភាព​យន្ត​យើង​ឥឡូវ​​គេ​ប្រើ​សំលេង​ផ្ទាល់​ និង​ចុង​ក្រោយ​អាច​មក​ពី​ខ្ញុំ​មាន​មាឌ​ធំ ខ្ពស់ ហើយ​ក៏​ទាក់​ទង​ជា​មួយ​សាច់​ដុំ​នេះ​ដែរ​ ព្រោះ​ថា​បើ​ថត​រឿង​បែប​ស្រុក​​ស្រែ​ រឿង​បែប​បុរាណ​ គឺ​ផលិត​ករ​តែ​តែ​នឹក​ដល់​ខ្ញុំ​ ព្រោះ​តែ​ខ្ញុំ​មាន​រូប​រាង​សម​នឹង​ខ្សែភាព​យន្ត​ ពេល​ខ្លះ​គេ​ក៏​ហៅ​ខ្ញុំ​ថា​ តារា​សាច់​ដុំ​ ទៀត​ផង​»។

Content image - Phnom Penh Post

បន្ទាប់​ពី​​សម្ភោធ​ខ្សែភាព​យន្ត​ដែល​ខ្លួន​បាន​សម្តែង​ជា​តួឯក​ប្រុស​នេះ​ សន ពិសិដ្ឋ​ ក៏​បាន​បង្ហើប​ថា​ កំពុង​ត្រៀម​ខ្លួន​ថត​នៅ​ក្នុង​ខ្សែភាព​យន្ត​ខ្នាត​ធំ​មួយ​ទៀត​នៅ​ដើម​ខែ​ ៤ រឿង​ «The Clock ឬ នាឡិកា​ ដាស់​វិញ្ញាណ​» វគ្គ​ ២ ផង​ដែរ​៕

អត្ថបទគួរចាប់អារម្មណ៍