.jpg)
ក្រុងស៊ាងហៃ : តារាភាពយន្ដកំពូលបំផុតម្នាក់របស់ចិន និងជាសេដ្ឋីនីទ្រព្យស្ដុកបំផុតម្នាក់ នាង ហ្វាន ពីងពិង ធ្វើឲ្យអាប់ឱនមុខមាត់ ខណៈពេលក្រុមអាជ្ញាធរបានរកឃើញការគេចពន្ធដែលចោទប្រកាន់ឡើងដោយក្រុមហ៊ុនកម្សាន្ដនានា ដោយវាបង្កជាមន្ទិលសង្ស័យចំពោះជោគវាសនាអនាគតរបស់នាង។
តារាភាពយន្ដ ម៉ូដែល និងផលិតករ វ័យ ៣៦ ឆ្នាំរូបនេះ ក្លាយជាបុគ្គលល្បីក្នុងប្រទេសចិនជាច្រើនឆ្នាំ និងបានបោះជំហានចូលទីផ្សារសម្ដែងហូលីវូដក្នុងភាពយន្ដរឿង «X-Men: Days of Future Past» ឆ្នាំ២០១៤។
ប៉ុន្ដែហ្វាន ពីងពីង តែងតែសកម្មនៅលើបណ្ដាញសង្គម លែងបង្ហោះលើអនឡាញ និងមិនចេញមុខជាសាធរណៈជាច្រើនសប្ដាហ៍។ សំណេរមួយក្នុងចំណោមរាប់រយរាប់ពាន់ដែលបង្ហោះអំពីតារាភាពយន្ដល្បីនេះនៅលើ Weibo បានឲ្យដឹងថា «ហ្វាន ពីងពីង អាចដេកគុកឬទេ? ខណៈអ្នកខ្លះទៀតសង្ស័យថា តើនាងត្រូវជាប់បំរាមថតភាពយន្ដ ឬត្រូវឃុំឃាំងក្នុងផ្ទះ។
បញ្ហារបស់ ហ្វាន ពីងពីង បានកើតឡើងក្នុងខែឧសភា ពេលអតីតពិធីការិនីឲ្យទូរទស្សន៍រដ្ឋ CCTV លោក Cui Yongyuan បានបង្ហោះកុងត្រាតាមអនឡាញថា នាងបានទទួលចំណូលខុសច្បាប់។
ឯកសាររបស់លោក Cui ដែលបង្ហោះនោះ បានបង្ហាញថា ហ្វាន ពីងពីង ទទួលបានទឹកប្រាក់ ១០ លានយ័ន (១,៤៥ លានដុល្លារ) ចំពោះគម្រោងមួយ ខណៈទទួលប្រាក់បន្ថែមក្រៅផ្លូវការ ៥០ លានយ័នទៀត ចំពោះការងារចំនួន ៤ ថ្ងៃ។
ក្រោយពីឯកសារទាំងនោះត្រូវបានបង្ហោះដោយលោក Cui ល្បីពេញបណ្ដាញសង្គម រដ្ឋបាលពន្ធដារជាតិ បានប្រកាសថា ខ្លួនបានណែនាំដល់អាជ្ញាធរនៅភាគខាងកើតខេត្ដជៀស៊ូ បើកការស៊ើបអង្កេតចំពោះការចោទប្រកាន់លើកុងត្រាទាំងពីរនោះ។
សេចក្ដីថ្លែងការណ៍ដែលចេញផ្សាយដោយស្ទូឌីយូនាង ហ្វាន ពីងពីង បានឲ្យដឹងថា នាងជាជនរងគ្រោះចំពោះការចោទប្រកាន់គ្មានមូលដ្ឋាននោះ តែមិនសំដៅលើឯកសាររបស់លោក Cui ឡើយ។
តារាភាពយន្ដ ហ្វាន ពីងពីង ស្រាប់តែរក្សាភាពស្ងៀមស្ងាត់ខុសប្រក្រតីលើបណ្ដាញសង្គម ដោយអត់មានបានបង្ហោះអ្វីទាល់តែសោះលើ Weibo តាំងពីចុងខែឧសភាមក៕ AFP/HR
