ភ្នំពេញៈ ចាប់ពីម៉ោង ៤ រសៀលដល់ម៉ោង ៩ យប់ នៅថ្ងៃទី ៨ ខែមីនា ឆ្នាំ ២០១៩ នេះនឹងមានការប្រគំតន្ត្រីដ៏ធំមួយមានការចូលរួមយ៉ាងសស្រោកសស្រាំពីសំណាក់ក្រុមសិល្បការិនីល្បីៗនៃប្រទេសកម្ពុជាមកពីចម្រុះនៃផលិតកម្ម និងអង្គភាពនានានៅអគារវិចិត្រសាល Phnom Penh Factory ដែលរៀបចំដោយក្រុមហ៊ុនស្មាត។
នេះបើយោងតាមសេចក្តីប្រកាសព័ត៌មានរបស់ស្ថានទូតស៊ុយអែតប្រចាំនៅប្រទេសកម្ពុជាដែលជាអ្នកឧបត្ថម្ភធំនៃកម្មវិធីមួយនេះដែរបានឲ្យដឹងថា៖ «ព្រឹត្តិការណ៍នេះនឹងរួមបញ្ចូលនូវទីផ្សារដ៏ធំមួយដែលមានបណ្តាក្រុមហ៊ុនអាជីវកម្មជាង ៤០ ដោយក្នុងនោះមានជាងពាក់កណ្តាលកាន់កាប់ដោយស្ត្រីខ្មែរ។ កម្មវិធីនេះក៏មានការសម្តែងសិល្បៈ តាំងពិព័រណ៍សិល្បៈ សកម្មភាពគ្រួសារ អាហារ និងកម្មវិធីជាច្រើនទៀតដោយយើងដំណើរការចាប់តាំងពីម៉ោង ៤ រសៀលបន្តដល់ម៉ោង ៩ យប់។ ដោយឡែកចាប់ពីម៉ោង ៦ ល្ងាចទៅនឹងមានការប្រគំតន្ត្រីចាប់ផ្តើមជាមួយនឹងការច្រៀងចម្រៀងសម័យបុរាណដ៏ល្បីល្បាញនាសម័យកាលលោកស្រី រស់ សិរីសុធា និងលោកស្រី ប៉ែន រ៉ន មានការសម្តែងក្បាច់របាំរបស់ក្រុមរបាំសហសម័យ NCA and OMG Girls Dance Crew ក្រុមចម្រៀង Vartey Ganiva Band ក្រុម Smallword Smallband ក្រុមក្មេងខ្មែរ និងក្រុមតារាចម្រៀងស្រីល្បីៗមានអ្នកនាង មាស សុខសោភា កញ្ញា អេដា កញ្ញា ឡូរ៉ា ម៉ម កញ្ញា សុខ ពិសី និងមានការបញ្ចប់កម្មវិធីជួបជាមួយឌីជេ រ៉ូស (DJ Rose)»។
អ្នកស្រី តេង សុផាន់ណា ប្រធានធនធានមនុស្សនៃក្រុមហ៊ុនស្មាតក៏បានឲ្យដឹងថា៖ «ខ្ញុំពិតជាមានក្តីរំភើបខ្លាំងណាស់ដែលឃើញព្រឹត្តិការណ៍ដ៏អស្ចារ្យមួយនេះកើតឡើងដែលអាចធ្វើឲ្យយើងផ្លាស់ប្តូរការគិតថា ស្ត្រីមិនអាចទៅណាឆ្ងាយបាន។ ព្រឹត្តិការណ៍នេះនឹងបង្កើតឲ្យមានភាពវិជ្ជមានសម្រាប់ស្ត្រីនៅក្នុងសង្គមមានភាពជឿជាក់លើខ្លួនឯង»។
ចំណែកកញ្ញា ឡូរ៉ា ម៉ម ដែលជាតារាចម្រៀង និងជានាយកប្រតិបត្តិនៃផលិតកម្មបារមីក៏បង្ហាញចំណាប់អារម្មណ៍ខ្លួនដែរថា៖ «នេះគឺជាព្រឹត្តិការណ៍ដ៏ពិសេសមួយដែលប្រារព្ធឡើងបង្ហាញពីកម្លាំង និងអំណាចរបស់ស្ត្រី»។
ខណៈលោកស្រី Pauline Tamesis អ្នកសម្របសម្រួលអង្គការសហប្រជាជាតិនៅកម្ពុជាមានប្រសាសន៍ថា៖ «ការប្រគំតន្ត្រីនេះគឺជាចក្ខុវិស័យដ៏សំខាន់មួយដើម្បីជំរុញឲ្យមានការផ្លាស់ប្តូរ និងធានាថា សិទ្ធិ និងសំឡេងរបស់ស្ត្រី និងយុវតីនៅទូទាំងប្រទេសកម្ពុជាត្រូវបានគេទទួលស្គាល់ពេញលេញ។ យើងពិតជាមានមោទនភាពណាស់ដែលបានចូលរួមប្រារព្ធទិវាសិទ្ធិនារីអន្តរជាតិឆ្នាំ ២០១៩ ជាមួយនឹងក្រុមស្ត្រីអ្នកដឹកនាំវ័យក្មេងរបស់កម្ពុជា»។
គួរបញ្ជាក់ដែរថាការប្រគំតន្ត្រីអបអរសាទរទិវាសិទ្ធិនារីនេះរៀបចំដោយផលិតកម្មបារមី និង The Sound Initiative សហការជាមួយនឹងក្រុមហ៊ុនស្មាត។ ខណៈម្ចាស់ជំនួយសប្បុរសនានាដែលចូលរួមនៅក្នុងការរៀបចំកម្មវិធីប្រគំតន្ត្រីនេះរួមមានស្ថានទូតស៊ុយអែតប្រចាំប្រទេសកម្ពុជា ក្រុមបណ្តាញអង្គការសហប្រជាជាតិនៅកម្ពុជា (UNDP, OHCHR, WFP, UNFP,UNAIDS) ក្រុមហ៊ុន Vivo ក្រុមហ៊ុន Mekong Homes កិច្ចសហប្រតិបត្តិការ និងអភិវឌ្ឍន៍អន្តរជាតិរបស់ស្វ៊ីស ស្ថានទូតចក្រភពអង់គ្លេស ស្ថានទូតអូស្ត្រាលី និងក្រុមហ៊ុនតូយ៉ូតាផងដែរ៕