The Phnom Penh Post Search

Search form




Logo of Phnom Penh Post newspaper Phnom Penh Post - តុកកែ​ញញឹម​ បង្កើត​សួន​បន្លែ និង​រីសត​ផ្ទះខ្មែរ​ ទ្រទ្រង់​សាលាភូមិ​ស្ដង់ដា




តុកកែ​ញញឹម​ បង្កើត​សួន​បន្លែ និង​រីសត​ផ្ទះខ្មែរ​ ទ្រទ្រង់​សាលាភូមិ​ស្ដង់ដា

Content image - Phnom Penh Post
សាលារៀន​​ភូមិ​ ​បច្ចុប្បន្ន​​មាន​​សិស្ស​ប្រមាណ ៣០០​​នាក់​ ហើយ​​អង្គការ​​មាន​គោលដៅ​​បង្កើត​​សាកល​វិទ្យាល័យ។ រូបថត សហ​ការី

តុកកែ​ញញឹម​ បង្កើត​សួន​បន្លែ និង​រីសត​ផ្ទះខ្មែរ​ ទ្រទ្រង់​សាលាភូមិ​ស្ដង់ដា

កំពង់ឆ្នាំង៖​ លោក Hannes Schmid បាន​ជួប​កុមារី​កម្ពុជា​ម្នាក់​ ដែល​ត្រូវ​បាន​បង្ខំ​ឱ្យ​ដើរ​សុំទាន​នៅ​តាម​ដង​ផ្លូវ​នៃ​ប្រទេស​ថៃ ​ក្នុង​ឆ្នាំ​ ២០១២​។ គ្រា​នោះ លោក​បាន​សង្គ្រោះ​នាង​ដែល​​ជា​ជន​រងគ្រោះ​ពី​ទឹក​អាស៊ីត និង​អំពើ​ជួញ​ដូរ​មនុស្ស​​ ត្រឡប់​មក​មាតុភូមិ​​វិញ​។ នោះ​ជា​វេលា​ដែល​បុរស​ជនជាតិ​ស្វ៊ីស​​រូប​នេះ បាន​មក​ដល់​កម្ពុជា​​ជា​លើក​ដំបូង​។ លោក​ គឺ​ជា​សមាជិក​ក្រុម​ប្រឹក្សា​នៃ​អង្គការ​តុកកែ​ញញឹម​ស្វ៊ីស​។

លោក ងន់ សុខលាភ ជា​នាយក​ប្រតិបត្ដិ​អង្គការ​តុកកែ​ញញឹម​កម្ពុជា (SGC) បាន​ប្រាប់​ ភ្នំពេញ ប៉ុស្ដិ៍​ ថា​៖ «​​លោក Hannes បាន​ស្គាល់​កម្ពុជា​ និង​នាំ​នាង​មក​ផ្ទះ​វិញ​។ លោក​មើល​ឃើញ​ថា ពលរដ្ឋ​រស់នៅ​ក្នុង​តំបន់​មិន​រៀប​រយ​ ភាគ​ច្រើន​ជា​ជន​ចំណាក​ស្រុក​ ដែល​ប្រឈម​​នឹង​បញ្ហា​ជា​ច្រើន​»។

ប៉ុន្មាន​ឆ្នាំ​ក្រោយ​មក​ អង្គការ​តុកកែ​ញញឹម​កម្ពុជា​ក៏​ចាប់​កំណើត​ បំណង​ធ្វើ​ឱ្យ​ប្រសើរ​​ឡើង​នៃ​ការ​អប់រំ​ ដែល​ប្រកប​ដោយ​គុណភាព​ប្រចាំ​តំបន់​ តាមរយៈ​ការ​ធានា​មូលនិធិ​គ្រប់គ្រាន់​រយៈពេល​យូរ​អង្វែង​ និង​លើក​ស្ទួយ​ជីវភាព​ពលរដ្ឋ​សហគមន៍​តាមរយៈ​កសិកម្ម​គ្មាន​គីមី​ និង​គម្រោង​តូចៗ​ជា​ច្រើន។

លោក សុខលាភ ជា​សហស្ថាបនិក​អង្គការ​តុកកែ​ញញឹម​កម្ពុជា​បាន​ឱ្យ​ដឹង​ថា​៖ «​យើង​ចាប់​ផ្ដើម​បង្កើត​អង្គការ​​តុកកែ​ញញឹម​កម្ពុជា ក្នុង​ឆ្នាំ​ ២០១៤ ដែល​បច្ចុប្បន្ន​មាន​បុគ្គលិក​សរុប​ជាង ២៦០ ​នាក់»​។ ស្ថិត​ក្នុង​ស្រុក​សាមគ្គីមានជ័យ​ ​ខេត្ដ​កំពង់ឆ្នាំង គម្រោង​ស្នូល​ដំបូង​​របស់​អង្គការ​​គឺ​ កសិកម្ម​។

លោកក៏បាន​ឱ្យ​ដឹងថា​៖ «​ថ្មីៗ​នេះ យើង​កំពុង​តែ​ប្រើប្រាស់​ដី​ប្រមាណ​ពាក់​កណ្ដាល​​នៃ​ដី​ ១៣០ ​ហិកតា។ ចំពោះ​វិស័យ​កសិកម្ម​ យើង​បាន​បង្កើត​គម្រោង​កសិកម្ម​ចិញ្ចឹម​មាន់​ ចិញ្ចឹមជ្រូក និង​ត្រី​ រួម​ជាមួយ​គម្រោង​កសិកម្ម​គ្រួសារ​ (AFP) លើ​ផ្ទៃដី​ប្រមាណ ៣០ ​ហិកតា​»។

ឆ្នាំ​ ២០១៥ អង្គការ​បាន​បង្កើត​ផ្ទះ​ស្នាក់​ប្រណីត​មួយ​ដើម្បី​ទទួល​ភ្ញៀវ​ និង​សិស្ស ​និស្សិត​ ក៏​ដូច​ជា​ការ​ទទួល​អាហារ​ដែល​ដាំដុះ​នៅ​ក្នុង​កសិដ្ឋាន​ផ្ទាល់​។​លោក​បាន​និយាយ​​អង្គុយ​លើ​កៅអី​មុខ​កន្លែង​ទទួល​ភ្ញៀវ​​រីសត​ផ្ទះ​កសិដ្ឋាន​ថា​៖ «យើង​មាន​ផ្ទះ​ឈើ​សរុប​ ១៧ ខ្នង ស្មើ​នឹង​ ៣៤ ​បន្ទប់​ តម្លៃ​ចាប់​ពី ៤៥ ដល់​ ១៧០ ​ដុល្លារ​»។

គម្រោង​សាលា​រៀន​ក្នុង​ភូមិ​ត្រូវ​បាន​បង្កើត​ឡើង​ក្នុង​ឆ្នាំ​ ២០១៥។ SGC អនុវត្ដ​យុទ្ធសាស្ដ្រ​តាមរយៈ​កិច្ច​សហការ​ជាមួយ​ Zurich University of Teacher Education ដើម្បី​សម្រប​សម្រួល​កម្មវិធី​សិក្សា​ឱ្យ​ស័ក្ដិសម​នឹង​បរិបទ​នៅ​កម្ពុជា​ និង​ធ្វើ​ការ​ជាមួយ ETH ដើម្បី​​សង់​អគារ​សិក្សា និង​ហេដ្ឋា​រចនា​សម្ព័ន្ធ​នានា។

លោក​បន្ត​ថា​៖ «​យើង​មាន​សាលារៀន​ក្នុង​ភូមិ​មួយ​ ដែល​​បច្ចុប្បន្ន​មាន​សិស្ស​ប្រមាណ ៣០០ ​នាក់​។ យើង​ត្រៀម​បើក​​​មជ្ឈមណ្ឌល​អប់រំ​សម្រាប់​​​សិស្ស​ប្រមាណ​ជា​ ១ ១០០ ​នាក់​ ដែល​ជាគំរូ​សម្រាប់​ប្រព័ន្ធ​អប់រំ​នៅ​កម្ពុជា​»។

Content image - Phnom Penh Post
លោក ងន់ សុខលាភ សហស្ថាបនិក​អង្គការ​តុកកែ​ញញឹម​កម្ពុជា​។ ហុង មិនា

តុកកែ​ញញឹម​ផ្ដល់​ក្ដី​សង្ឃឹម​ថ្មី​ លោក សុខលាភ បាន​លើក​ហេតុផល​ថា តុកកែ​ជា​ប្រភេទ​សត្វ​ម្យ៉ាងដែល​មាន​ការ​ពុះពារ​បើ​ទោះបី​ជា​វា​រងគ្រោះ​ដោយសារ​ការ​ដាច់​ម្រាម​ដាច់​ជើង​ អី​​ក៏​អវយវៈ​របស់​ពួក​វា​លូតលាស់​ឡើង​វិញ​។

លោក​បន្ដ​ថា​៖ «​យ៉ាង​ណា​មិញ​ចំពោះ​មនុស្ស​ដែល​ជួប​ការ​លំបាក​នៅ​តែ​អាច​បន្ដ​ក្ដី​សង្ឃឹម​ឡើង​វិញ​ ទោះបី​ជា​ជួប​បរាជ័យ​ក្នុង​ឆាក​ជីវិត​។ ចំពោះ​ទស្សនវិស័យ​របស់​អង្គការ​​វិញ​វា​មាន​អត្ថន័យ​ ១ ​ទៀត គឺ​ផ្សារ​ភ្ជាប់​តម្រូវ​ការ (bridging need) រវាង​អ្នក​មាន​លើស​លុប​ និង​អ្នក​ខ្វះ​ខាត​។ យើង​អាច​ផ្ដល់​ស្នាម​ញញឹម​ដល់​អ្នក​ទាំង​នោះ​ឱ្យ​មាន​ទឹក​ចិត្ដ​ក្នុង​ការ​កែ​ប្រែ​ជីវភាព​»។

បច្ចុប្បន្ន​ប្រជាពលរដ្ឋ​មក​ពី​តំបន់​អនាធិបតេយ្យ​តំបន់​គំនរ​សំរាម ១២ ​គ្រួសារ ​ទទួល​បាន​ចំណែក​ដី​កន្លះ​ហិកតា​សម្រាប់​ការ​ដាំដុះ​ដំណាំ​កសិកម្ម​ចិញ្ចឹម​សត្វ និង​ផ្ទះ​មួយ​ខ្នង​ផង​ដែរ​។

អតីត​និស្សិត​ច្បាប់​វ័យ ៣២ ​ឆ្នាំ​រូប​នេះ ​បន្ដ​ថា​៖ «​ចាប់​ផ្ដើម​ពី​ផ្ទៃ​ដី​ដំបូង ៩ ហិកតា ​ក្នុង​ស្រុក​សាមគ្គីមានជ័យ​សម្រាប់​បែង​ចែក​ ១២ ​ប្លង់ ​សម្រាប់ ១២ ​គ្រួសារ​ បច្ចុប្បន្ន​អង្គការ​បាន​ពង្រីក​​វិសាលភាព​ដល់ ១៣០ ​ហិកតា លើ​​វិស័យ​ផ្សេងៗ​ទៀត​ ដូចជា កសិកម្ម​បដិសណ្ឋារកិច្ច រោង​ជាង ជា​ពិសេស​សាលារៀន»​។

ការ​បង្កើត​កញ្ចុំ​គម្រោង​ដើម្បី​ធានា​និរន្ដរភាព​​

លោក សុខលាភ និយាយ​ថា ឆ្នាំ​​សិក្សា​ថ្មី​នេះ សាលា​សហគមន៍​​ចាប់​ផ្ដើម​បង្កើន​ថ្នាក់​ដល់​ឆ្នាំ​ទី៤។ ១ ឆ្នាំ​អង្គការ​បង្កើន​​ ១ ថ្នាក់​តាម​​លទ្ធភាព​​។

Content image - Phnom Penh Post
សិស្ស​ពាក់​ម៉ាស់ និង​​ឯកសណ្ឋាន​យ៉ាង​មាន​របៀប​រៀបរយ​​នៅ​​សាលារៀន​​របស់​​អង្គការ​។ រូបថត សហ​ការី

អង្គការ​​កំពុង​តែ​អភិវឌ្ឍ​ក្នុង​វិស័យ​អប់រំ​ ដោយ​ប្រមែប្រមូល​ក្មេងៗ​តាំងពី​តូច​នៅ​អាយុ ៣ ​ឆ្នាំ​​។ អង្គការ​​បាន​ចុះ​អនុស្សរណៈ​ នៃ​ការ​យោគយល់​ជាមួយ​ក្រសួង​អប់រំ​ ដើម្បី​បើក​ដំណើរការ​ជា​លក្ខណៈ​គម្រោង​ និង​​កំពុង​រៀបចំ​ចុះ​បញ្ជី​ជា​សាលា​រៀន​ឯកជន​អន្ដរជាតិ​ ដោយ​​​ប្រើ​​កម្មវិធី​សិក្សា​អន្ដរជាតិ​លាយ​ឡំ​ជាមួយ​កម្មវិធី​សិក្សា​រដ្ឋ​។

សហស្ថាបនិក​អង្គការ​វ័យ​ក្មេង​រូប​នេះ ឱ្យ​ដឹង​ថា​៖ «គោលដៅ​របស់​យើង យើង​កំណត់​ឱ្យ​ដល់​សាកលវិទ្យាល័យ​។» លោក​បញ្ជាក់​ថា៖ «ទោះបី​ជា​មាន​ជំនួយ​ផ្សេងៗ​យ៉ាង​ណា​ក៏​ដោយ ក៏​ចុង​ក្រោយ​បង្អស់​ គឺ​មាន​តែ​ការ​អប់រំ​ដល់​ក្មេងៗ​ជំនាន់​នោះ​ទេ​»។

កិច្ច​សហការ​ពី​ដៃគូ​នានា​អង្គការ​តុកកែ​ញញឹម​ទទួល​មូលនិធិ​ពី​ទូទាំង​ពិភព​លោក​ ដែល​ភាគ​ច្រើន​​ជា​អង្គការ​ផ្សេងៗ​នៅ​​​ស្វ៊ីស និង​អាល្លឺម៉ង់ រួម​ទាំង​​សាកល​វិទ្យាល័យ ​វិទ្យាស្ថាន​អភិវឌ្ឍន៍​នានា​។

លោក​បញ្ជាក់​ថា​៖ «​យើង​មាន​​អ្នក​គ្រប់គ្រង​ជា​ជនជាតិ​ខ្មែរ ​​ទទួល​ការ​បណ្ដុះបណ្ដាល​ពី​អ្នក​បង្ហាត់​បង្ហាញ​ដែល​មក​បម្រើ​ការ​រយៈពេល​ខ្លី​នៅ​ក្នុង​ប្រទេស​យើង​»។

អង្គការ​តុកកែ​ញញឹម​កម្ពុជា ស្ថិត​ក្នុង​ឃុំ​ត្បែង​ខ្ពស់ ស្រុក​សាមគ្គីមានជ័យ ខេត្ដ​កំពង់ឆ្នាំង ចម្ងាយ​ប្រមាណ ៧០ ​គីឡូម៉ែត្រ​ពី​រាជធានី​ភ្នំពេញ៕

អត្ថបទគួរចាប់អារម្មណ៍

  • ខេត្តបាក់និញៈ សួនឧស្សាហ​កម្ម​ Yen Phong 1 Industrial Park នៅខេត្ត Bac Ninh ភាគខាងជើង​បាន​ក្លាយជា​​សួនឧស្សាហ​កម្មលើក​ដំបូង​នៅក្នុងប្រទេស​វៀតណាម ដែលទទួល​បាន​​បណ្ដាញ​ទូរគមនា​គមន៍​ 5G ដោយ​បច្ចេកវិទ្យាថ្មីនេះ​​ បានដាក់​​ឲ្យដំណើរការ​នៅទីតាំងនោះ​ដោយ​ក្រុមហ៊ុន Viettel កាល​ពីថ្ងៃព្រហស្បតិ៍។​​

  • ភ្នំពេញៈ កម្ពុជា​នាំចេញ​ទំនិញ​ទៅ​ទីផ្សារ​អាមេរិក​មានតម្លៃ​ជាង ៦ ​ពាន់​លាន​ដុល្លារ​ ក្នុង​រយៈពេល​ ១១ ​ខែ ឆ្នាំ​ ២០២០ កើន​ជាង ២២ ​ភាគរយ​ធៀបនឹង​រយៈពេល​ដូចគ្នា​ឆ្នាំ​ ២០១៩ ខណៈ​ទំហំ​ពាណិជ្ជកម្ម​ទ្វេភាគី​មានតម្លៃ​ជាង ៦,៣ ​ពាន់​លាន​ដុល្លារ​។ នេះ​បើ​យោងតាម​ទិន្នន័យ​ពី​ការិយាល័យ​ពាណិជ្ជកម្ម​អាមេរិក​។

  • ភ្នំពេញៈ ត្រឹម​រយៈពេល​ជិត​ ១ ​ខែ​ប៉ុណ្ណោះ​ចាប់ពី​ថ្ងៃទី​ ២០ ធ្នូ ដល់​ថ្ងៃទី​ ១៧ មករា ពលករ​ខ្មែរ​ដែល​បាន​វិលត្រឡប់​មកពី​ប្រទេស​ថៃ​តាម​ច្រក​នៃ​បណ្តា​ខេត្ត​ជាប់​ព្រំដែន​កម្ពុជា-ថៃ​ចំនួន​ ៦៩ ​នាក់ ​ត្រូវបាន​រកឃើញ​វិជ្ជមាន​កូវីដ​ ១៩ ដោយ​ក្នុង​នោះ​ពលករ​ដែល​បាន​ព្យាបាល​ជាសះស្បើយ​ ២១ ​នាក់​។

  • ស្ទឹងត្រែងៈ កម្លាំង​នគរបាល​ប្រឆាំង​គ្រឿងញៀន​គ្រោង​នឹង​បញ្ជូន​បុរស​ជនជាតិ​ឡាវ​​ ២ ​នាក់ និង​វត្ថុតាង​គ្រឿងញៀន​ជិត​ ៥០ ​គីឡូក្រាម​ទៅ​តុលាការ​នៅ​ព្រឹក​ថ្ងៃ​ចន្ទ​នេះ​ ខណៈ​ដែល​សមត្ថកិច្ច​កម្ពុជា​កំពុង​សហការ​ជាមួយ​សមត្ថកិច្ច​ឡាវ​ ដើម្បី​តាម​រក​ចាប់ខ្លួន​ជនជាតិ​ឡាវ​ ៤ ​នាក់​ទៀត​ដែល​រត់គេចខ្លួន​។

  • ភ្នំពេញៈ លោក ហង់ជួន ណារ៉ុន រដ្ឋមន្ត្រី​ក្រសួង​អប់រំ ​យុវជន និង​កីឡា​បាន​ដឹកនាំ​កិច្ចប្រជុំ​ដាក់​ចេញ​វិធានការ​បន្ថែម​ដល់​សាលារៀន​ដែល​កំពុង​ត្រូវបាន​ប្រើប្រាស់​ជា​មណ្ឌល​ចត្ដាឡីស័ក ពិសេស​សាលារៀន​តាម​ខេត្ដ​ជាប់​ព្រំដែន​ប្រទេស​ថៃ និង​វៀតណាម​ដើម្បី​ធ្វើយ៉ាងណា​ធានា​ផ្ដល់​ការសិក្សា​ដល់​សិស្ស​គ្រប់គ្នា​ក្នុង​ឆ្នាំ​សិក្សា​ថ្មី​នេះ​។

  • ភ្នំពេញៈ លោក​ឧបនាយករដ្ឋមន្ត្រី ស ខេង រដ្ឋមន្ត្រី​ក្រសួង​មហាផ្ទៃ​បាន​ណែនាំ​ឱ្យ​អាជ្ញាធរ​គ្រប់លំដាប់​ថ្នាក់​លុបបំបាត់​ការបង្ក​សំឡេង​រំខាន​លើស​កម្រិត​ដោយ​យានយន្ដ​គ្រប់​ប្រភេទ និង​លុបបំបាត់​កន្លែង​កែច្នៃ​បំពង់​ស៊ី​ម៉ាំង​ដែល​បង្ក​ភាព​រំខាន​ដល់​អារម្មណ៍ និង​សិទ្ធិ​រស់នៅ​របស់​ពលរដ្ឋ