ភ្នំពេញៈ ខណៈជីវិតគូជាប្តីប្រពន្ធស្របច្បាប់ដោយក្រាបផ្ទឹមរោងជ័យ ជាមួយនឹងសា្វមីលោក ប៉ុល វិបូ ទើបរំលងមិនទាន់បាន ៣ ខែផងនោះ ក៏ស្រាប់តែតារាស្រី ពិធីការិនី និងជាថៅកែហាងអាហារដ្ឋាន «ផែសមុទ្រ» អ្នកនាង ម៉ាក់ សែនសូនីតា ហៅ តូតា បង្ហើបរឿងបង្កើតមុខរបរថ្មីបន្ថែមទៀត បង្អួតប្រាប់ទៅប្រិយមិត្ត និងអ្នកសិល្បៈនៅតាមបណ្តាញសង្គម។
តារាស្រីស្រស់រូបស្អាតមានបបូរមាត់សិចស៊ីអ្នកនាង តូតា បង្ហោះសារថា៖ «មុខរបរថ្មីជិតចេញជារូបរាងហើយ!ចាំជួយគាំទ្រផងណាមនុស្សជាទីស្រឡាញ់ទាំងអស់គ្នា!»។
មើលទៅការត្រៀមបង្កើតមុខរបរថ្មីរបស់តារាសម្តែងស្រីអុ្នកនាង តូតា នេះទំនងជាការពួតដៃគ្នារកស៊ីតាំងពីកាលពីនៅជាអតីតគូដណ្តឹងនឹងគ្នា ខណៈបច្ចុប្បន្នក្លាយជាស្វាមីនាងគឺលោក ប៉ុល វិបូ ក្នុងគម្រោងបើករីសតថ្មីសន្លាងមួយឈ្មោះថា «ផែសមុទ្ររីសត» ស្ថិតនៅក្រុងកំពត ខេត្តកំពតនោះហើយមើលទៅ។
បន្ថែមពីនេះអ្នកទាំង ២ ក៏ធ្លាប់បានសហការគ្នាបើករបររកស៊ីតាំងពីមុនពេលពួកគេបើករីសតនៅខេត្តកំពតផងដែរគឺដាក់ទុនរួមគ្នាបើកអាហារដ្ឋានមានយីហោល្បីឈ្មោះ «ផែសមុទ្រ» ដោយបានពង្រីកសាខា ជាច្រើនបន្តបន្ទាប់ នៅភ្នំពេញ និងខេត្តកណ្តាលមុនឈានដល់ដាក់ទុនបេះដូងនោះ។
ចំពោះគម្រោងបង្កើតរីសតឈ្មោះ «ផែសមុទ្ររីសត» ដែលមហាជនកំពុងតែសង្ស័យថា ដែលជារបរថ្មីសន្លាងរបស់តារាសម្តែងស្រី តូតា និងស្វាមីលោក ប៉ុល វិបូ នោះគឺមានទីតាំងស្ថិតនៅក្នុងភូមិតាដិប សង្កាត់អណ្តូងខ្មែរ ក្រុងកំពត ខេត្តកំពត។
លោក ប៉ុល វិបូ ធ្លាប់ប្រាប់ភ្នំពេញប៉ុស្តិ៍មុនពេលរៀបការដែរថាតាមពិតទៅ ទីនេះគឺគ្រាន់តែចាប់ផ្តើមបើកការដ្ឋានរៀបចំប្រែក្លាយឲ្យទៅជារីសតតែប៉ុណ្ណោះ យើងមិនទាន់បានរួចរាល់ ១០០ ភាគរយនោះទេ។ ផ្ទៃដីនៃតំបន់រីសតនេះមានទំហំចំនួន ៤ ហិកតាមានទីតាំងល្អស្ថិតនៅក្នុងភូមិតាដិប សង្កាត់អណ្តូងខ្មែរ ក្រុងកំពត ជាប់ដងព្រែក ហើយអាចជាទីកន្លែងសម្រាប់បោះតង់កម្សាន្តនានាបានហើយនេះក៏ជាការដាក់ហ៊ុនរួមគ្នារវាងលោក និងភរិយា តូតា ផងដែរ។
ទោះជាយ៉ាងណាការបង្ហើរសារខាងលើនោះអាចជារីសតបើកថ្មីនៅខេត្តកំពត មែន ឬមិនមែននោះទេ ព្រោះមិនមានការបកស្រាយពីប្តីប្រពន្ធដែលបានរួមមុខរបរជំនាញតាំងពីនៅជាគូស្នេហ៍នឹងគ្នាបាននោះឡើយ ដោយសារប្រព័ន្ធទូរស័ព្ទរបស់តារាស្រី អ្នកនាង តូតា និងស្វាមីលោក ប៉ុល វិបូ មិនអាចទាក់ទងបានឡើយ ខណៈភ្នំពេញប៉ុស្តិ៍បានព្យាយាមទូរស័ព្ទច្រើនលើក៕