.jpg)
តូតា បង្ហើរសារប្រាប់មហាជនឲ្យដឹង ខណៈខ្លួន និងស្វាមីមានបុត្រដំបូងចំរដូវកាលកូវីដ១៩។ ហ្វេសប៊ុក, តារាសម្តែងស្រីមានបបូរមាត់សិចស៊ី ម៉ាក់ សែនសូនីតា ហៅតូតា។ រូបថត ហេង ជីវ័ន
ភ្នំពេញ៖ ខណៈទើបតែបានបង្កើតមុខរបរថ្មីបន្ថែម ក្រោយពីរៀបមង្គលការបានប្រមាណជាង ៣ ខែនោះ ឥឡូវនេះប្តីប្រពន្ធតារាសម្តែង និងស្វាមីជាពាណិជ្ជករខ្មែរទ្រព្យស្ដុកលោក ប៉ុល វិបូ ទទួលដំណឹងល្អមួយគឺមានបុត្រដំបូងរឹតបន្តឹងចំណងស្នេហ៍អាពាហ៍ពិពាហ៍នៅចំគ្រាដែលស្ថានភាពមានវិបត្តិជំងឺកូវីដ ១៩។
បន្ទាប់ពីស្ងាត់ក្នុងសិល្បៈមួយរយៈ ក្រោយរៀបការរួចពេលនេះតារាសម្តែងស្រីល្បីអ្នកនាង ម៉ាក់ សែនសូនីតា ហៅតូតា បានបង្ហាញការភ្ញាក់ផ្អើលដល់ហ្វេនៗរបស់នាង ដោយបង្ហើបដំណឹងកំពុងពពោះជូនស្វាមីលោក ប៉ុល វិបូ បង្ហោះតាមហ្វេសប៊ុកថា៖ «សូមឲ្យមានថ្ងៃល្អទាំងអស់គ្នាចា!» និងសារថា៖ «ជិតដល់ម៉ោងគាត់ធាក់ឥឡូវហើយ គឺថាធាក់ពោះមាំមីទាល់តែមាំមីគេងលក់ហ្មង៎»។
មួយរយៈមុនចំពោះរូបដែលនាងបង្ហោះ មិនមានអ្នកណាបានដឹងនោះទេថា តារាស្រីរូបនេះ មានពោះធំដោយសាររូបនាងតែងតែពាក់អាវរលុងៗ ទើបធ្វើឲ្យគ្រប់គ្នាមិនចាប់អារម្មណ៍ ហើយក៏មិនមែននាងចង់លាក់លៀមទេ តែទំនងជារូបនាងចង់ Surprise មហាជនច្រើនជាងមើលទៅ។
យ៉ាងណា ការពពោះបុត្រដំបូងនេះ មានរយៈពេលប៉ុន្មានសប្តាហ៍ ឬប៉ុន្មានខែហើយនោះមិនត្រូវបានតារាសម្តែងស្រី ជាថៅកែស្រីវ័យក្មេងអ្នកនាង តូតា បានបង្ហើបប្រាប់ឲ្យបានដឹងឡើយដោយសារទូរស័ព្ទនាង និងស្វាមី ភ្នំពេញប៉ុស្តិ៍ បានទំនាក់ទំនងចូលតែបែរជាគ្មានអ្នកលើកទទួលទៅវិញ។
មុននេះបន្តិចជីវិតគូជាប្តីប្រពន្ធស្របច្បាប់ដោយបានក្រាបផ្ទឹមរោងជ័យ ជាមួយលោក ប៉ុល វិបូ ដែលបានរៀបការកាលពីថ្ងៃទី ១៦ ខែមីនា ឆ្នាំ ២០២០ នោះ ក៏ស្រាប់តែតារាស្រី ពិធីការិនី និងជាថៅកែហាងអាហារដ្ឋានឈ្មោះ «ផែសមុទ្រ» អ្នកនាង ម៉ាក់ សែនសូនីតា ហៅ តូតា បង្ហើបរឿងបង្កើតមុខរបរថ្មីបន្ថែមទៀត បង្អួតប្រាប់ទៅប្រិយមិត្ត និងអ្នកសិល្បៈនៅតាមបណ្តាញសង្គម ខណៈតារាស្រីស្រស់រូបស្អាតមានបបូរមាត់សិចស៊ីអ្នកនាង តូតា បង្ហោះសារថា៖ «មុខរបរថ្មីជិតចេញជារូបរាងហើយ! ចាំជួយគាំទ្រផងណាមនុស្សជាទីស្រឡាញ់ទាំងអស់គ្នា!»។
មើលទៅការត្រៀមបង្កើតមុខរបរថ្មីរបស់តារាសម្តែងស្រីអុ្នកនាង តូតា នេះទំនងជាការពួតដៃគ្នារកស៊ីតាំងពីកាលពីនៅជាអតីតគូដណ្តឹងនឹងគ្នា ខណៈបច្ចុប្បន្នក្លាយជាស្វាមីនាង គឺលោក ប៉ុល វិបូ ក្នុងគម្រោងបើករីសតថ្មីសន្លាងមួយឈ្មោះថា«ផែសមុទ្ររីសត» ស្ថិតនៅក្រុងកំពត ខេត្តកំពតនោះហើយមើលទៅ បន្ថែមពីនេះអ្នកទាំង ២ ក៏ធ្លាប់បានសហការគ្នាបើករបររកស៊ីតាំងពីមុនពេលពួកគេបើករីសតនៅខេត្តកំពតផងដែរ គឺដាក់ទុនរួមគ្នាបើកអាហារដ្ឋានមានយីហោល្បីឈ្មោះថា «ផែសមុទ្រ» ដោយបានពង្រីកសាខាជាច្រើនបន្តបន្ទាប់ នៅភ្នំពេញ និងខេត្តកណ្តាល មុនឈានដល់ការដាក់ទុនបេះដូងរៀបការនោះ៕
