ភ្នំពេញៈ ដោយសារតែមើលឃើញចំណងស្នេហ៍តារាសម្តែងស្រីស្រស់កញ្ញា តូតា និងពាណិជ្ជករខ្មែរទ្រព្យស្តុកលោក ប៉ុល វិបូ ត្រូវបានមហាជន និងមិត្តអ្នកសិល្បៈដឹងឮ សុសសាយតាមរយៈការពួតដៃគ្នាបើកមុខជំនួញអាហារ «ផែសមុទ្រ» នៅក្នុងទីក្រុងភ្នំពេញ និងដាក់ទុនរួមគ្នាលើការបើករីសត នៅក្នុងខេត្តកំពតទៀតនោះ ក៏ស្រាប់តែថ្មីៗនេះ លេចឮដំណឹងពីលោក ហេង ឡុង បង្ហើបថា គូស្នេហ៍ ១ គូ នេះជិតចូលរោងការហើយ។
ចេញពីគណនីហ្វេសប៊ុកលោក ហេង ឡុង ដែលជាគូស្នេហ៍របស់តារាសម្តែងស្រីជើងចាស់អ្នកនាង ចន ច័ន្ទលក្ខិណា នោះបានបង្ហើរសារមួយឃ្លាខ្លី អមនឹងរូបថតជុំគ្នាថា៖ «កញ្ញា តូតា ហៅការ។ ទៅមួយគូទៀតហើយ! ហ៊ិហ៊ិ»។
គ្រាន់តែឃើញរូប និងសារនោះភ្លាម មានអ្នកចូលចុច Like មានចំនួន 1.7 K ហើយ Comment និង Share យ៉ាងច្រើនតែម្តងចំពោះដំណឹងនេះ។
តែតារាសម្តែងស្រី មានបបូរមាត់សិចស៊ីកញ្ញា ម៉ាក់ សែនសូនីតា ហៅ តូតា ដែលទើបតែបានបង្កើតការភ្ញាក់ផ្អើលរឿងបើករីសតឈ្មោះ «ផែសមុទ្ររីសត» ស្ថិតនៅក្រុងកំពត ខេត្តកំពត នាពេលថ្មីៗនេះ បានបដិសេធដំណឹងនេះថា៖ «អត់ទេបង! មិនទាន់មានដំណឹងដូច្នោះនោះឡើយ។ សូមអធ្យាស្រ័យផងបង ពេលនេះខ្ញុំជាប់រវល់ថតស្ប៉ត ហើយរឿងនេះ ប្រសិនបើពិតមែននោះ នាងខ្ញុំនឹងសរសេរប្រាប់ដំណឹងលើហ្វេសប៊ុកខ្ញុំមិនខានទេ»។
ដំណឹងដ៏គួរឲ្យភ្ញាក់ផ្អើលថ្មី ក្រោយពីរឿងថៅកែផលិតកម្មអង្គរភិចឈ័រ លោក ប៉ុល វិបូ ទៅបើករីសតវិញនៅឯកំពតនោះ ក៏ត្រូវលោកបញ្ជាក់ឲ្យដឹងច្បាស់ ពីរឿងលេចឮតាមសារហ្វេសប៊ុកលោក ហេង ឡុង នោះដែរ។ លោក ប៉ុល វិបូ ប្រាប់ភ្នំពេញប៉ុស្តិ៍ ខណៈពេលលោកកំពុងបើកបរទៅមើលការដ្ឋានដំណើរបើករីសតថ្មីមួយទៀតនៅ ខេត្តកំពង់ស្ពឺ ក្បែរតំបន់ភ្នំស្រង់នោះថា៖ «មិនពិតទេ! រឿងហ្នឹង ពួកយើងនៅមិនទាន់បានគិតគូរនៅឡើយទេ។ តាមពិតទៅ ការថតរូបថ្មីជាមួយនឹងលោក ហេង ឡុង និងមិត្តភក្តិដទៃទៀតនោះ គឺជាការជួបជុំគ្នាលក្ខណៈធម្មតាតែប៉ុណ្ណោះ»។
មុននេះបន្តិចចំពោះការសហការរឿងបើករីសត «ផែសមុទ្រ» ថ្មីសន្លាងរបស់តារាសម្តែងស្រីកញ្ញា តូតា និងម្ចាស់ស្នេហ៍លោក ប៉ុល វិបូ មានទីតាំងស្ថិតនៅក្នុងភូមិតាដិប សង្កាត់អណ្តូងខ្មែរ នៃក្រុងកំពត ខេត្តកំពតនោះ ក៏លោកបានបញ្ជាក់ឲ្យដឹងដែរថា៖ «តាមពិតទៅទីនេះគឺគ្រាន់តែជាការចាប់ផ្តើមបើកនូវការដ្ឋានរៀបចំប្រែក្លាយឲ្យទៅជារីសតតែប៉ុណ្ណោះ យើងមិនទាន់បានរួចរាល់មួយរយភាគរយទេ។ ផ្ទៃដីមានទំហំ ៤ ហិកតា មានទីតាំងល្អស្ថិតនៅក្រុងកំពត ជាប់ដងព្រែកអាចជាកន្លែងសម្រាប់បោះតង់កម្សាន្តនានាបាននេះ ក៏ជាការដាក់ហ៊ុន រវាងខ្ញុំ និង កញ្ញា តូតា»៕